YIDNAK YIDNAK WENE 12
12
Yakobus worogolat, Peterus o kubu mo pil nggwidnak wene
12:1-5
1Ereya tarem-net Nagawan Erores-nen-e lambuk tak inpidnak nap ereb-e mondok lel mberel onposo tel kwirij-o. 2At-nen-e Yoanes owot Yakobus iri-ge yalawi bem urusu mbarij-o. 3Nde, ap iri na wirid pem-e Yawuri nap-nen kijik kijak worogola karuk, Peterus na irit tenagaij-o. Iri tarem-e Oroti Lomboroso Mende Pigit Lak nggok sakwi tarem-et kwaridj-o. 4Peterus na tenaguruk, o kubu me pil nggosolar-e, at towarak wolmaklug-e, san winde nap enpe empat empat onposolar-e, ondoro empat pij-o. Erores-nen perasolar-e: ”O Anggul Pandok Mbiridnak Tarem na woraruk ndak yosola-ge, ap kwarat inmbiri bem nam tak pimin-o” luk peragaij-o. 5Iri kwasa Peterus na-ge o kubu me pil nggwidnak woragaij-et nde, lambuk tak inpidnak nap-nen-e at amanggim kundugu Mbal Pem Nagawan emengen mbarogolat woraiga-o.
Peterus-e o kubu me-nen wesera wirik pidnak wene
12:6-19
6Erores-nen kub-e ap kwarat inmbiri bem nam tak peyekluk kubu nene yogolar-e, Peterus na-ge san winde mberen-nen ennggendumu rak puruk, nene yiga-o. At iri-ge posid kere mberensa kamarak worasola-ge, it san winde erep-nen o kubu me tumende bem towarak woraiga-o. 7Worakmu-ge, Nagawan Indo-nen idnak aid nab-e mimo nak men yosola-ge, eyaya-nen o kubu me iri na me yaya rak pij-o. Iri lug-e, at-nen-e Peterus na men makluk araptap lel kasolat-nen yak tosolar-e: ”Ndaget nak men min-o” luk yak tosola ereya na-net at inggi kamaridnak posid kere na-ge wosoksa mbij-o. 8Mbosoloma-ge, aid nap-nen at yak tosolar-e: ”Kesani are ngonoksa yutluk, kijok sum iri na yiri-o” yak tosoloma-ge, irit kwasa yirij-o. Iri lug-e, aid nap-nen at yak tosolar-e: ”Kusum ambaram sum iri-ge langguksa yutlug-e, an langgal nibi-o” luk yak tij-o. 9Yak tosoloma-ge, at imbirik mbepme mbirij-o. Nde, aid nap-nen kwarid iri-ge ndemeret kwarusu-o luk Peterus na aru buk woragaij-o. Are, at-nen perasolar-e: ”An-e nabi nggwe nggal nde kasu-o” luk peragaij-o. 10It mborogolar-e, towarak woraso san winde misik wot wutluk, misik na wot wutluk, o siri ambigit mburugwi posid tumende na eralu wok yil mburukmu-ge, tumende iri-ge ondomok kuwak yij-o. Kuwak yosoloma, ir-e mbepme mbirigarik, tula misik nggwe mburukmu-ge aid nap na ereya na-net at keya buruk mbirij-o.
11Mborosoloma-ge, Peterus na indi wok yosolat-nen yosolar-e: ”Yawo-nen perak nde naru yigi-o. Nagawan Indo-nen at-nen idnak aid nap wirik ibil lobok yosola, an nimiri yosolar-e, Erores inggem-nen na, it Yawuri nap-nen kwat nuburak peraiga-t nde, nimiri yid kagi-o” luk yij-o.
12Iri yebet karug-e, Yoanes Marakus ija Maria na ama mbirij-o. Ma iri-ge ap kwarat ndok wutluk, tepan yogolat woraiga-o. 13Nde, leget tumende lel lel kasola-ge, ndegel onposo la kwami misik unu-ge Orore na kil lobok yij-o. 14Lobok yarik, Peterus ene yenggerak puruk, alen-nen ndowaga tumende na-ge wabigit lag-et, it endam pong pang mberarig-e: ”Peterus na-ge leget tumende bem mendak worasu-o” luk yak indij-o. 15Yak ondosoloma, it-nen yak togolar-e: ”Kar-e kindi wawa-nen yusu-o” yak tiga-t nde, at-nen-e ”Lag-o. Peterus-er-o” luk nomorenak ala karug-e, it-nen yogolar-e: ”Peterus-nen idnak aid nap-nen yusu-o” luk yiga-o. 16Alat nde, Peterus na-nen tu lel lel tenak worasoma-ge, it-nen tumende na kuwarak puruk, yik kaiganggal-e, at nde ala-ge wir-o luk kwiye-nen pabok piga-o. 17Nde, at-nen inggi warok pem nak-nen ”Kenne puk mer-o” yak unduruk, o kubu me-nen Nagawan Indo-nen lit uburuk lobok yidnak wene na kerengga yak indij-o. Yak undurug-e: ”Wene yu-ge Yakobus min nennggamirak tak inpidnak nap min kerengga yak undugup na-e” luk o nin me mbirij-o.
18Nene luk kub-e, Peterus na lak ala-ge, san winde ereba na-ge kwarat nari wari mbiga-o. 19Mbogolar-e, Erores-nen-e: ”Peterus ogore yer-o” yak ondosola, kore yiga-t nde, kagit lak yiga-o. Iri ala-ge, at-nen yik karok woraiga san winde ereba na mbenat unpurug-e, ”Mondok ender-o” luk yak indidj-o.
Iri lug-e, Erores na-ge Yurea-nen Kaisaria mbarig-e, iri me-t woragaij-o.
Erores wat yidnak wene
12:20-25
20Nde, Erores mondok isilepma-ge Tirus nap min Siron nap min enpem puruk woragaij-o. Iri bem-e it Tirus min Siron min-e nagawan iri ama-nen mburu onggo bugwi me, it iri-nen-e: ”At eram-et mburuwog-o” luk eram mbiriga-o. Mbirigarig-e, nagawan nene yoso ondoro konoso nap unu-ge Mbelatus na yak togolar-e: ”Nir-e Erores imin lambuk yuwok-nen yongga nindi-o” luk indi yanggonogolat, it enambigit yij-o.
21Nde, wene mbaruwokluk ndok wurul-o yidnak tarem-e Erores na-ge nagawan-nen yurugwi sum na yutluk, nagawan nak-nen kore yugwi sa ebem kore luk, wene mot wesera yak indij-o. 22Yak ondosoloma-ge, ap ereba na-nen enne nggoksa yogolar-e: ”Wene yu-ge Mbal Pem Nagawan ene nggal-o. Ki nap ene-ge lag-o” luk yiga-o. 23Yogolikma-ge, ar-e Mbal Pem Nagawan unu kek tak pigit lak ala-ge, Nagawan Indo-nen idnak aid nap-nen ereya na-net wirij-o. Worosola, mbese-nen nok posolar-e, wat yij-o.
24Nde, Mbal Pem Nagawan-nen yidnak wene-ge wigak yosolat, nggulok yij-o.
25Nde, it-nen kwarugwi eneyabu na ndak tak purug-e, Mbaranabas min Saulus min-e Yerusalem-nen lobok yogolar-e, Yoanes na unu misig-e Marakus na-ge inmin lobok yiga-o.
Currently Selected:
YIDNAK YIDNAK WENE 12: inondx
Highlight
Share
Compare
Copy
Want to have your highlights saved across all your devices? Sign up or sign in
@LAI 1992, 1994
