YIDNAK YIDNAK WENE 13
13
Mbaranabas min Saulus min lena wirik inpidnak wene
13:1-3
1Antiokia-nen-e lambuk tak inpidnak nap ennggendumu-ge Mbal Pem Nagawan ene lomboksa yugwi nap min ap mirik unpugwi nap min woraiga-o. Iri yidnak nap unu-ge Mbaranabas min Simeon na unu misig-e Niget min Koreni nap unu-ge Lukius min Manaen min Saulus min irit woraiga-o. Nde, Menaen iri-ge Nagawan Erores eid-nen nggwel pidnak nap irit woragaij-o. 2Misik tarem ir-e mburu ninggit lak woragolat-nen Nagawan Indo nak erembel wanogolat worakmu-ge, Konak Indi-nen yak ondosolar-e: ”Mbaranabas min Saulus min iri-ge an neyabu wanuwakluk yonggo inpigirik me, an namanggim lenak enper-o” luk yak indij-o. 3Yak ondosoloma-ge, ir-e mburu ninggit lak woragolar-e, tepan luk, it ininggi-nen mberen nap na tena unpurug-e, wirik inpiga-o.
Wirik inpidnak nap-nen Siperus-nen aid wene yidnak wene
13:4-12
4Iri bem-e, Konak Indi-nen wirik inpidnak me, Mbaranabas min Saulus min-e o Selukia mbigarik, iri me-nen e koma arem ngguruk, Siperus mbiriga-o. 5Mbirigarik, o Salamis wok yogolar-e, Yawuri nap-nen tepan yugwi ma ereba na me-ge Mbal Pem Nagawan-nen yidnak wene yak indil niga-o. Nogola-ge, Yoanes na-ge it yongga ondosolat woragaij-o.
6Nde, it na-ge yi terapmu waring kil kil-e o Papos wok yiga-o. O Papos-nen-e Yawuri nap kwal ombo misik unu-ge Mbat Yesus imin lambuk yiga-o. At iri-ge enesiger-et nde, an-e Mbal Pem Nagawan ene lomboksa yoso nab-o yoso-o. 7Mbat Yesus iri-ge yi terapmu iri me nagawan unu-ge Seregius Paulus na anggam woragaij-o. Nagawan indi mondok pindong tak nap iri-nen-e Mbal Pem Nagawan-nen yidnak wene kuleyeklug-e, Mbaranabas min Saulus min yonggo inpij-o. 8Alat nde, Elimas iri-ge o iri nagawan-nen Yesus ebem indi angin tubu yuwa naru-nen mberen nap iri na tu nggolosolat woragaij-o. (At unu Elimas iri-ge Yunani wene bem-e kwal ombo yogolar-o.) 9Alat nde, Saulus na unu misig-e Paulus na-ge Konak Indi-ge at arem kobongsa woralat-nen erengen labi ap yu na mbal posolat-net 10yak tosolar-e: ”Kar-e Sere ambara-nen yusu-o. Kar-e lud tak kwarugwi min wim poso-o. Kat karem-e ap onmbol pem laso yi meya ndi meya nin tak nan tak kobong tak worasu-o. Kar-e Nagawan Indo-nen ndung tak pidnak tula-ge mbisik tak pusu-ge mepme-nen kondok yugun-o? 11Yawo yik ki-o. Nagawan Indo inggi-ge kebem mbuwasola, kar-e kerengen ugut luk, siyag-et woralar-e, molengen kagun pug-o” luk yak tij-o. Yak tosoloma ereya na-net o age nggal min ndamuk min-e at muruk tak posola-ge, at inggi waruk mbururak nap onkore yosolar-e, inggi yabak ndabak yij-o. 12Iri kwaridnak iri karug-e, o iri me nagawan-e indi angin tubu yij-o. Nagawan Indo owene mirik pidnak iri na bem mondok wi yij-o.
Antiokia o Pisiria-nen Paulus min Mbaranabas min-nen kwariga wene
13:13-52
13Nde, Paulus min anggamirak inmin-e e koma arem ngguruk, Papos-nen mborogolar-e, o Pampilia-nen Perega wok yij-o. Alat nde, Yoanes na-ge it na keya unpuruk, tuguruk Yerusalem mbirij-o. 14Alat nde, ir-e Perega-nen mborogolar-e, o Pisiria-nen Antiokia wi wok yiga-o. Wok lug-e, we woragwi tarem-e ir-e tepan yugwi ma nggwigarik kore yiga-o. 15Kore yigarik worakmu-ge, imiri mbarak pidnak wene min Mbal Pem Nagawan ene lomboksa yugwi nap-nen mbaridnak wene min wonarak pogola karuk, tepan yugwi ma nagawan mendak inpidnak nap-nen wirik inpidnak nap na endam wene wosa pil mborogolar-e: ”Nenggamirak wa-e. Kit-nen nde kweyap yu yak undurak nggomo wene mbi worala-ge, yak undurag-o” luk yak indiga-o. 16Yak ondogolikma-ge, Paulus na men luk, inggi warok pem-nen yak ondosolar-e:
”Isarael nap min kit Mbal Pem Nagawan aye worak nap min wa-e. Wene yu koler-o. 17Isarael nap Enmbal Pem Nagawan-nen-e nit nenlawingga len unpurug-e, ir-e ap sal nggal Mesira wi woragola-ge, ap kwarat tak inpij-o. Iri lug-e Mesira wi-nen at inggi amawi bem-nen lit unpuruk mberamu-o. 18Mbal Pem Nagawan-nen-e karu me iri me-nen it enpage towarosolar-e, molengen ebis-et empat pulu (40) irit woragaij-o. 19Iri lug-e, o Kanan woragwi nap, ap enlem tuju iri na lak tak unpurug-e, at-nen nggweyak na-ge it onggweyak makluk, nit nenlawingga wok indij-o. 20Nde, o iri me woragolar-e, molengen ebis-et empat ratus lima pulu (450) nggal irit woraruk, ombol nggwe-nen-e Mbal Pem Nagawan-nen wene mbarugwi nap wok enderenak woralar-e, Mbal Pem Nagawan ene lomboksa yoso nap Semuwel woragaid kuri agaij-o. 21Worarug-e, it-nen nagawan misik nggi yogola-ge, Mbal Pem Nagawan-nen-e Kis ambara Saul, elem-e Mbenyamin nap irit wok indij-o. Wok endamu-ge, ap iri nagawan woralar-e, molengen ebis-et empat pulu (40) irit woragaij-o. 22Iri luk, Mbal Pem Nagawan-nen Saul na kona waburuk, Ndaud na it enmanggim nagawan mendak puruk, Mbal Pem Nagawan-nen Ndaud owene konggorosolar-e: ’Isai ambara Ndaud iri-ge an nindi kumburak-nen yusu-o. An nindi-n pidnak nak kwaruwa ala-nen wanigi-o’ luk yij-o. 23Nde, Mbal Pem Nagawan-nen ’Irit yimin-o’ luk urul pidnak ndak ndak tak posolar-e, Ndaud lolo-nen nderak Yesus iri-ge Mbal Pem Nagawan-nen Isarael nap Inmiri Yoso Nap tak pij-o. 24At na lobok yigit lak worala-ge, Yoanes na-nen Isarael nap pidsa nggomo ondosolar-e, it meya yogolat woraidnak kondok yogola-ge, yi mat unpurak pem nggomo ondosolat woragaij-o. 25Nde, Yoanes na-ge at eyabu worok tak peyekluk-nen yosolar-e: ’Kit-nen perali nap iri-ge an-e lag-o. Alat nde, ar-e abok an nimbirig-e lobok yuwa-o. At ijok sum-e an-nen yunggururag-e mondok meya-o’ luk yij-o.
26Nanggamirak, Abaram-nen wigarak nap min kit Mbal Pem Nagawan aye worak nap pidsa min wa-e. Ninmiri yurak wene yu-ge nit nendam-et pil lobok yij-o. 27It Yerusalem woragwi nap min it ese mendak inpidnak nap min-e Yesus-er-o luk yenggerak pigit lak yiga-o. At wururak wene ebem mbariga iri-ge Mbal Pem Nagawan ene lomboksa yugwi nap-nen urul pidnak wene-ge we woragwi tarem-nen wonat tenak woragwi na ndak ndak tak pogolat-nen ebem mbariga-o. 28At wuruwakluk, mabin kore yigarik, lak alat nde, Pilatus na nggi yak togolar-e: ’At yu-ge wiri-o’ luk yiga-o. 29Nde, nanduk mbaridnak engga bem at imin-e ’Iri nggal kwat puwa’ yidnak wene iri na pik paksa ndak ndak tak purug-e, e lang pang tak pem-nen waga pil mbuwarig-e, kerep ndome mbinggirik pil mbiriga-o. 30Alat nde, wat yidnak nap ennggendumu-nen Mbal Pem Nagawan-nen uruk tak pamu-ge, 31at langgal luk Nggalilea-nen Yerusalem laiga nap inmbiri bem nam yosola-ge, enlengen-nen kagolar-e kwarat woraiga-o. Nde, iri kaiga nap-nen-e ’Ar-et kaige-o’ luk Isarael nap yu yak indili-o. 32Nde, yawo-ge nit-nen-e konak wene yu yak kindili-o: Mbal Pem Nagawan-nen ’Irit kwarimin-o’ luk nit nenlawingga urul yak indidnak wene na-ge 33it inlirak nit nenmanggim-e wene na ndak ndak tak posolar-e, Yesus uruk tak pid irir-o. Iri nggal-e Ndawi Engga pasal mberen pem-nen yosolar-e:
’Kar-e an Nambara-nen yusu-o.
Yawo-t ndet kibigi-o’ luk yij-o.
34Nde, Mbal Pem Nagawan-nen wat yidnak nap ennggendumu-nen uruk tak pidnak me, tuguruk piri yurag-e mondok lak tak pidnak pem-nen at yak tosolar-e:
’Pem-et wolma marak wene Ndaud urul yak tidnak wene iri-ge kar-et wok kirimin-o’ luk yak tij-o.
35Iri bem-e, Ndawi Engga misik pem-nen wene yosolar-e:
’Kat-nen idnak Lenak Pidnak Nab-e piri makluk, keya bugun pug-o’ luk yij-o.
36Nde, Ndaud iri-ge at woragaid tarem woralar-e, Mbal Pem Nagawan indi-n pidnag-et kwat tenak woraruk, wat yamu-ge at omborak entalu yapma pikma, piri yij-et nde, 37Mbal Pem Nagawan-nen uruk tak pidnak nap Yesus iri perak nde piri yigit lag-o. 38Nanggamirak wa-e. Wene yu-ge kenaru mer-o. Ap yu na ebem-e kit meya yogolat woraidnag-e ambaram tak puruk, urugom tak kunpurak wene irit yak kundusu-o. 39Musa-nen imiri mbarak pidnak wene-nen wisirik kunpurag-e meya-t nde-o, inndi-ge Yesus ebem angin tubu yuwa nab-e at-nen wisirik unpurak perak ndag-o. 40Iri bem-e, Mbal Pem Nagawan ene lomboksa yugwi nap-nen yidnak wene-ge kit kenpem mbuma naru, kwil kwalsa wolmer-o. Wene iri-nen yosolar-e:
41’Kit pusurugwi nap wa-e. Kinndi yebet ker-o. Wir-o luk, lak mer-o. Kit woragola tarem-nen an-nen kwarimin iri-ge ap-nen yak kendelep nggal-e, wene na bem kinndi angin tubu yelep pug-o’ ” yij-o.
42Wene iri yuruk, Paulus min Mbaranabas min mbepme mborogola-ge, ap iri-nen nggi yogolar-e: ”Naptak wiwa-o. We woragwi tarem abok iri-nen wene yu tuguruk yak nundurag-o” luk nggi yiga-o. 43Nde, tepan yuruk, ndi yogolar-e, Yawuri nap kwarat min Yawuri nap nggal tak inpidnak nap kwarat min-e Paulus min Mbaranabas min langgal unpuruk mborogola karug-e, mberen nap na-nen it mul ondogolat-nen nggomo ondogolar-e: ”Kir-e Mbal Pem Nagawan-nen we wok ondoso ebem-et tugup lak wolmer-o” luk yak indiga-o.
44Nde, we woragwi tarem abok na-nen-e o siri iri me woragwi nab-e kwarat Mbal Pem Nagawan-nen yidnak wene kuluwog-o luk, ndok wiriga-o. 45Ndok worogola-ge, it Yawuri nap-nen ap kwarat ndok wiridnak karug-e, enlengen ale yogolat-nen Paulus-nen yidnak wene eyak worogolat, mbilaro ngin tak piga-o. 46Alat nde, Paulus min Mbaranabas min-nen kwiye lag-et yogolar-e: ”Mbal Pem Nagawan-nen yidnak wene-ge mondok nandug-et kir-et yak kundurag-o. Alat nde, wene iri-ge kit-nen keya bogolat, kit-nen-e ’Unlug-et woralik nalik momtak wene iri-ge nit-nen wanurak meya-o’ luk yogola me, nir-e keya kunpuruk, enlem nin nap endam mbitli-o.
47’Kar-e enlem nin nap eyaya rak onponokluk,
imiri yurak wene waruk o kuri ap kuri mboronok-nen lenak kibigi-o’ luk Nagawan Indo-nen nenpem pamu-o” luk yiga-o.
48Yogolikma-ge, enlem nin nap na-nen iri wene kuluruk yigarig-e, enalen luk, Nagawan Indo-nen yidnak wene na erembel wanogolat woraiga-o. Nde, it unluk pem-et wolmag-o luk lenak inpidnak nap-nen-e wene iri bem inndi angin tubu yiga-o.
49Nde, Nagawan Indo-nen yidnak wene-ge o iri me pidsa wigak yamu-o. 50Alat nde, Yawuri nap-nen o iri me nagawan nagawan min Mbal Pem Nagawan aye worak kwami min enarem worakola, Paulus min Mbaranabas min andi bandi rak unpuruk, mberen nap iri na it enma-nen langgara wirik inpiga-o. 51Langgara wirik onpogola-ge, it unuwok liri na-ge it endam pil karuk mborogolar-e, Ikonium mbiriga-o. 52Nde, Antiokia woragwi Yesus ene wanugwi nab-e enalin enalen enarem worasolar-e, Konak Indi enarem kobong tak woragaij-o.
Currently Selected:
YIDNAK YIDNAK WENE 13: inondx
Highlight
Share
Compare
Copy
Want to have your highlights saved across all your devices? Sign up or sign in
@LAI 1992, 1994
