ZAKHARIA 9
9
Pohakiman kon negara mita kon diugmai in Israel
1 #
Yes. 17:1-3; Yer. 49:23-27; Am. 1:3-5 Naa in koyow i Tuhan. Sia in nonantúdon kon mohukum kon negara in Hadrakh bo kotá in Damsyik. Deemanbí tongá suku mita in Israel, táe ibukotá in Siria in ki Tuhan kitogi. #Yes. 23:1-18; Yeh. 26:1–28:26; Yl. 3:4-8; Am. 1:9-10; Mat. 11:21-22; Luk. 10:13-14 2Hamat inta noyosigad in Hadrakh in ki Tuhan doman in kitogi, natua doman in kotá mita in Tirus bo Sidon takin bayongan kototaau in intaunea. 3Tirus in noposindogdon in dinding mita pogoḻingoi kon inia bo nomontuyung kon buḷawan bo saḷaka kino bayong totok dá naondadon bo pakakat biasa ná bungaion bo yoná kon daḷan. 4Táe baḻíonbí i Tuhan mobiag mobogá. Bayongan in kaoyúonan in kotá tatua in ḷumbúon-Neabí kon bonu in dagat bo kotá tatua tontaní in modaitbí kaanon in tuḷú.
5 #
Yes. 14:29-31; Yer. 47:1-7; Yeh. 25:15-17; Yl. 3:4-8; Am. 1:6-8; Zep. 2:4-7 Kotá in Askelon bo Gaza in mokoontongbí kon inia bo angoian in ondok. Ekron in mokoontongbí doman bo kobuḻian in bayongan in kamangnea. Gaza in kobuḻian in datunea, bo Askelon in mobaḻí moingongow diá in mogogutun. 6Asdod in pogutunanbí in intau mita nongkon bangusa mita inta noyagi-yagimai. Ki Tuhan in noguman, “Intau in Pilistin inta moḷoḷatú in yompaton-Kubí. 7Mosia in diá bidon mokaan bui kon ponoyá inta oyúonpa in dugú andeka kaanon ibanea inta pinoton. Bayongan intau inta kiagatneapa in mobaḻí umat-Ku bo inanggap kiagat in suku in Yohuda. Ekron in mobaḻídon umat-Ku, naonda bo intau in Yebus #9:7: intau in Yebus: in intau taakan in Yerusalem. Mosia in nobaḻí bobantung i Daud naonda in pinotungkudnea in kotá tatua. kon dungkuḷmai. 8Ḷukadan-Kubí in butá-Ku bo ḷonggaian-Kubí in tontara mita ango-angoi inta tumaḻib kon tua. Diá bidon ogoi-Ku in monondorot mononggata kon umat-Ku. Sin roriga monia in inontong-Kudon.”
Datu inta moiangoi kon singgai moiduduimai
9 #
Mat. 21:5; Yoh. 12:15 Ei intau in Sion, pokoḷungangadon!
Ei intau in Yerusalem, ponggoḷokapdon!
Indoiaika! Datumu in mamangoi takin nountung!
Sia in datu moadil inta nodia kon kasaḷamatan.
Táe moompá totok in dodia sia in noiyaput
sinumakoi kon keledai, keledai batánea.
10 #
Mzm. 72:8
Ki Tuhan in noguman,
“Kereta mita in parang nongkon Epraim in ḷumbúon-Kubí,
bayongan in kabaḷo kon Yerusalem in yopúon-Kubí
bo bayongan in piot in tokorimumudon-Kubí.
Datumu in mopotaaubí in dodamean kon sigad in bangusa mita.
Nongkon dagat mopobayá in dagat siabí in mongawasa,
nongkon Ongkag in Eprat nodapot in popod in dunia.”
Ponompiaan kon kaadaan in umat i Allah
11 #
Iḷn. 24:8 Ki Tuhan in noguman kon umat-Nea,
“Pinodoyon kon dodandian inta pinomia-Ku takin i monimu,
dodandian inta pinosah in dugú in kuruban sosumba,
poḷuat-Kudon in rayatmu
inta nororiga kon pinoḷumbúan
naonda bo intau inta kon bonu in parigí inta noingkag.
12Pobuidon ei intau mita iḷumbú,
tanaa in oyúondon in kamang monimu.
Pobuidon kon pononiunganmu
Akuoi in umuranbí momarakat kon i monimu.
Indongogaika: Kodua noguntuḷ in kobayongnea ogoi-Ku in barakat
popisí in bayongan roriga inta ain kinorasaan monimu.
13Yohuda in baḻíon-Ku piot in pahlawan,
bo Israel in mobaḻí piot inta sinadiadon popiot.
Intau mita in Sion pakéon-Ku mobaḻí kedang;
kedang tatua in pakéon-Ku pondudur kon intau mita in Yunani.”
14Ki Tuhan in mokipogontongbí kon umat-Nea,
naonda bo kilat in piot-Nea mita pinoḷutam-Nea.
Ki Tuhan Inta Totok in moḷantud in mogirupbí kon torompet tomponuot monubu
bo mayá kon bonu in deḷang nongkon toḷatan.
15Umat-Nea in notantú bidon kon ḷukadan-Nea,
dá bayongan in musung modait taḷowon monia.
Naonda bo kokow in intau inta noḷoḷangu in oinumon,
natuata in kokow monia kon in parang.
Naonda bo dugú in kuruban inta pinoburé kon tudu in mezbah,
natuata in dugú in musung moibutak.
16Aka singgai tatua moiangoi, ki Tuhan in moposaḷamatbí kon umat-Nea,
naonda bo gombala moposaḷamat in dombanea nongkon anib.
Mosia in monindarbí kon butá i Tuhan,
naonda bo permata mahkota inta mopouḻi-uḻinag.
17Totuu mopia in butá i Tuhan kon singgai moiduduimai,
totuu mopia bo moḷunat!
Kon tua anggur bo gandum motoḷubú in kobobiagnea,
mokoropot kon tayowmobiag bo mongodeaga.
Currently Selected:
ZAKHARIA 9: INOMOG
Highlight
Copy
Compare
Share
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
