ZAKHARIA 8
8
Ki Tuhan in nodandi kon moposindog bui in Yerusalem
1Ki Tuhan Inta Totok in mokawasa in nobogoi in koyow tanaa kon inakó, 2“Akuoi in moibog totok motuḷung kon Yerusalem popisí in Akuoi totok in motabi kon intaunea mita, bo popisí in tabi-Ku tatua, moyaat in gina-Ku kon musung mita in kotá tatua. 3Akuoi in mobui mangoi kon Yerusalem, kotá-Ku inta motusi tatua, bo mogutun kon tua. Yerusalem in kotaauandon saḷaku kotá inta motoindudui, bo tombuḷud i Tuhan Inta Totok in mokawasa #8:3: tombuḷud i Tuhan Inta Totok in mokawasa: Tombuḷud in Sion. in tangoionbí tombuḷud inta Motusi. 4Kon lapangan in kotá in Yerusalem, in ḻimitúbí bui in aki mita bo baay mita inta ain nogoguyangdon totok dá monungkudon in mayá. 5Daḷan mita kon kotá in mopuḻingbí in mongoadí mita inta moyambámai.
6Soaḷ tatua in koontongan diá kumaan kon akaḷ kon intau mita inta nobiagpa nongkon bangusa tanaa, táe diábí in diá kumaan kon akaḷ-Ku. 7Akuoi in moposaḷamat in umat-Ku nongkon butá mita inta ain pinogakutan kon i monia, 8bo modia bui kon i monia nongkon pomukaan bo nongkon toyopan, dá mosia in mogutun kon Yerusalem bui. Mosia in mobaḻí umat-Ku bo Akuoi in ki Allah monia. Akuoi in momarenta kon i monia takin satia bo moadil.”
9Ki Tuhan in noguman kon umat-Nea, “Koropot in ginamu! Tanaa moiko in nokodongogdon kon tosingogon mita inta ain doman siningog in nabi kon dodai in dodatoḷan inukat, sin moposindog bui in Baḷoi-Ku. 10Kon dodai in deemanpa oras tatua diábí mokotondan kon tonaga in intau andeka mahaḷuk, bo diábí in mokorasa kon moaman nongkon indoyó in musung. Pinoropatoi-Kudon in intau tobatú takin intau ibanea. 11Táe tanaa intau mita inta nobiagpa nongkon bangusa tanaa moyoposidon in koḻipod in poaid-Ku kon i monia. 12Mosia in moponimboibí in bibit takin dame. Pangkoi mita in anggur monia in momungaibí, butá in mopoḷuaibí in bungainea, bo uyan in umuranbí morogot. Bayongan in barakat tatua in ogoi-Kubí kon bangusa mita inta nobiagpa nongkon bangusa tanaa. 13Ei intau in Yohuda bo Israel! Kon tungkuḷ intua, aka intau ango-angoi mosikutukandon, yo mosia in moguman, ‘Igumon mako bodito inta noiuma kon Yohuda bo israel in moiuma doman kon inimu!’ Táe Akuoi in moposaḷamatbí kon i monimu, dá intau mita ango-angoi tatua in mosigumanan, ‘Igumon mako barakat inta moiponag kon Yohuda bo Israel, moiponag doman kon inimu!’ Tuamai in koropotdon in ginamu bo dika moondok!”
14Ki Tuhan Inta Totok in mokawasa in noguman, “Kon dodai in mogoguyangmu nokopopisí kon i-Nakó sinumorú, sinantú-Kudon kon hukumon in mosia kobogaton. Diábí binaḷuian-Ku in tosingogon-Ku tatua, táe pinobayá-Kubí. 15Táe tanaa barakatan-kudon in intau in Yohuda. Dá dikadon moondok. 16#Ep. 4:25 Naa in parenta mita inta musti aidan monimu: Aka mosingog, singogdon inta totuu kon tumpaḷa intau. Ogoi in bontow in tosingogon inta moadil bo inta modia kon modame. 17Dika monomayá kon inta moraat kon tumpaḷa intau. Dika mongibot kon uboḷ. Kodoí-Ku in inta uboḷ bo inta diá moadil bo aid moromú.”
18Ki Tuhan Inta Totok in mokawasa nobogoi in koyow tanaa kon inakó ogoi kon umat-Nea, 19“Puasa inta pinobayá kon buḷan noginggopat, noginḻima, noginpitu, bo nogimpuḷú in mobaḻíbí poramean mita inta mokoḷunganga bo mokosanang kon intau in Yohuda. Kotá bidon in inta moitutui bo inta modame!”
20Ki Tuhan Inta Totok in mokawasa in noguman, “Orasnea in moiangoibí intau nongkon nobayong in kotá #8:20: nobayong in kotá andeka: kotá mita moḷoben. in mamangoibí in Yerusalem. 21Intau mita nongkon kotá tobatú in moguman kon intau kon kotá ibanea, ‘Igai mayá in kita mosumba kon i Tuhan Inta Totok in mokawasa bo mopoigum in barakat-Nea. Duduidon takin inami!’ 22Bo mobayong in intau bo bangusa inta moropot in mamangoi in Yerusalem sin mosumba kon i-Nakó ki Tuhan Inta Totok in mokawasa bo mopoigum in barakat-Ku. 23Kon singgai mita tatua mopuḷú in intau ango-angoi in mamangoi kon intau in Yahudi tobatú bo moguman, ‘Kami in moibogbí doman in mopia ná moiko; sin dinongogdon nami kon ki Allah in nomarakat kon i monimu.’ ” Ki Tuhan Inta Totok in mokawasa ain nosingog.
Currently Selected:
ZAKHARIA 8: INOMOG
Highlight
Copy
Compare
Share
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
