MATIUS 8
8
Ki Yesus nongundam kon tobatú intau inta pinanyaki kusta
(Mrk. 1:40-45; Luk. 5:12-16)
1Naonda in ki Yesus nosiḻig nongkon buḷud, intau mobarong dinumudui kon i-Nia. 2Kon sigad monia oyúon doman tobatú intau inta pinanyaki kuḻit inta mokorongó.#8:2: pinanyaki kuḻit inta mokorongó: Podudui in atorang in agama in Yahudi, takit tanaa in mokopopisí kon intau inta pinanyaki natua diá patus mosumba kon i Allah kon tampat pooibadaan. (Indoiai in kamus). Sia in namangoi bo sinumungkud poḷat nosumba kon i Yesus, takin noguman, “Tuang, aka ki Tuang moibog mongundam, yo mopiabí in akuoi.”
3Bo kinadaian i Yesus in intau tatua bo noguman: “Moibog in Akuoi. Dá kopiadon in iko!” Bo kon dodaipa doman tuata panyaki kusta in intau tatua nopia. 4#Im. 14:1-32 Bo ki Yesus in noguman kon inia, “Toropdon in singog-Ku naa! Donaai oumanon kon i inekabí in onu inta nobaḻí tanaa. Táe bayádon bo pokiindoi kon imang, bo pobogoidon iko in sosumba ná inta pinarenta i Musa, mobaḻí bukti kon i monia kon nopia in iko!”
Ki Yesus nongundam kon bobantung in tobatú porwira kon Rum
(Luk. 7:1-10)
5Naonda in ki Yesus tumuotdon kon Kapernaum, namangoi in tobatú porwira kon i-Nia poḷat nopoigum, kainia. 6“Tuang, bobantungku noitosiug mako kon baḷoi sin notakit diá mokobayá. Bo sia in moyoyigadon totok.”
7Dá ki Yesus noguman kon inia, “Bain angoion-Ku undaman in sia.”
8Táe porwira tatua in notubag: “Donaaidon Pak Guru, sin diá mokobaḻí in akuoi motarima kon i Pak Guru kon baḷoiku. Ogoiaidon in tosingogon tongákabí totontagá, yo notantú kon mopiabí in bobantungku tatua. 9Sin koḻimonikanku naa oyúon doman in itoiku. Táe koḻimonaganku oyúon doman in prajurit. Aka akuoi moguman kon prajurit tatua, bayá, dá mayábí doman in sia. Bo aka akuoi moguman kon prajurit ibanea, ‘Angoi!’ dá mamangoibí doman in sia, andeka akuoi mopotabá kon bobantungku, kon aidai in naa dá aidanneabí intua.”
10Naonda in dinongog i Yesus tosingogon in porwira tatua, noherang totok in Sia. Dá Sia in noguman kon intau mita inta dinumudui kon i-Nia, “Diápa kon dodai in onda in kinodungkuḷan-Ku in koḷoḷoben pirisaya ná tanaa kon sigad in intau in Israel! 11#Luk. 13:29 Poguman-Ku kon i monimu! Mobayong in intau inta mamangoi nongkon pomukaan bo toyopan bo ḻimitú mongaan moyotakin i Abraham, i Ishak, bo i Yakub kon bonu in Dunia Mobagu i Allah. 12#Mat. 22:13, 25:30; Luk. 13:28 Táe intau mita inta sabanarnea mobaḻí tombonu in soroga toko pogonagdon kon tampat inta mosindip totok. Kon tua kodongogandon in ombaḷ bo roriga.” 13Nopaḷut mako nosingog kon tua, ki Yesus in noguman kon porwira tatua, “Pobuidon, onu inta pinirisayamu tatua in mobaḻí bidon kon inimu.”
Dá kon dodaipa doman tatua bobantungnea nopia.
Ki Yesus nongundam kon nobayong intau
(Mrk. 1:29-34; Luk. 4:38-41)
14Nodapotmai kon baḷoi i Petrus, inontong i Yesus in ki guyá i Petrus noitosiug mako sin pinonikan patú. 15Dá dinimiug in Sia bo nokadai kon ḻima in bobay tatua, bo poḷatdon nopia in patúnea. Dá bango-bangon in sia bo nobantung kon i-Nia.
16Naonda in noungkoḷomdon, mobarong in intau inta kinotoḷangan dimukud moraat in dinia mangoi kon i Yesus. Bo tongá takin tosingogon totontagá ki Yesus noguntun kon dimukud mita moraat tatua bo nongundam kon intau mita inta nongotakit. 17#Yes. 53:4 Tua mita in mobaḻí sinbá motompodon Pirman inta pinoyaput i Nabi Yesaya, nanaa, “Sia tua in nomotaan kon yoyiga bo mongundam kon panyaki naton.”
Intau mita inta moibog mobaḻí dumodudui i Yesus
(Luk. 9:57-62)
18Naonda in ki Yesus nokoontong kon intau moantó noḻipung kon i-Nia, Sia nonongganut minayá in ḷoḷan. 19Bo namangoidon in tobatú mototundú kon agama Yahudi noguman kon i-Nia: “Guru, akuoi in dumudui kon inimu, kon onda kabí in bayáan-Mu!”
20Ki Yesus in noguman kon inia: “Serigala oyúon in bubúnea, bo ḷagapan oyúon in pugadnea, táe ki Adí Intau diá in tampat posiugan-Nea.”
21Bo dumodudui-Nea doman tobatú in noguman kon i-Nia: “Tuhan ogoiaipa in akuoi in wakutu mayá moḷobong kon i amáku.”
22Táe ki Yesus in notubag: “Duduidon kon i-Nakó, bo pomayádon mako intau minatoi moḷobong kon intau minatoi monia.”
Ki Yesus nopogogai in tompot moropot
(Mrk. 4:35-41; Luk. 8:22-25)
23Ki Yesus sinumakoi kon uangga bo dumodudui-Nea mita in sinumakin doman kon i-Nia. 24Bo dinaḻímai in tompot inirup noropot totok in danow tatua, dá nobokoḷ, bo bokoḷ kopiadon mondangat kon uangga inta sinakoian monia, táe wakutu intua ki Yesus nosiug noḷoḷot. 25Bo namangoidon in murí-Nea mita noguḷung kon i-Nia, kai monia, “Tuhan Tuḷungaipa! Sin mobodito in kita.”
26Sia in noguman kon i monia, “Nongonu sin moondokbí in moiko intau inta diá totok mopirisaya?” Onda intua nobangon in ki Yesus bo sinumorú kon tompot bo danow tatua, indoianmai yo diádon nogirup in tompot tatua bo danow in noḷonong totok.
27Mosia in nongoherang bo noguman, “Ki inebí degá in Sia naa, sin tompot bo danow in dumuduibí kon tosingogon-Nea!”
Ki Yesus nongundam kon intau kinotoḷangan in dimukud moraat
(Mrk. 5:1-20; Luk. 8:26-39)
28Noiyaputmai in ḷoḷan kon ḻipú intau in Gadara, namangoidon kon i Yesus in intau taya dua inta kinotoḷangan in dimukud moraat, taya dua naa nongkon tampat poḷoḷobongan. Taya dua tua in totokdon in mokoondok sahingga intau mita diá mokobaḻí in mongin daḷan tatua. 29Taya dua nomaḷú noropot, kai monia “Onuon-Mu in kami naa, ei Adí i Allah? Iko mamangoi degá mopoyoyiga kon inami umpaka deemanpa wakutunea?”
30Diá noyayú kon i monia tua, oyúon in paanan boké inta koyogot motayakmai kon kaanonnea. 31Dá dimukud mita moraat tatua in nopoigum kon i Yesus, “Aka untunon-Mu in kami, yo potabádon kami tumuot kon boké mita tatua.”
32Dá ki Yesus noguman kon i monia, “Bayádon!” Bo iḷumuaidon in mosia kon intau doyowa tatua bo sinumoḷang kon boké mita tatua. Bo paanan in boké tatua iḷumanduk kon pompang kon bonu in danow, bo noḷomot.
33Bo moḷoḷukad mita kon boké tatua in noḷagui. Naonda in nodapotmai kon kotá nodait inouman monia in onu inta aindon nobaḻí. Inouman doman monia in intau mita inta kinotoḷangan in dimukud mita moraat tua. 34Nokodongogmai kon tua, iḷumuaidon komintan in intau kon kotá tatua bo minayá kon i Yesus. Naonda in noyodungkuḷ i Yesus, mosia nopoigum totok kon i-Nia sinbá monaḷámaidon kon ḻipú tatua.
Currently Selected:
MATIUS 8: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.