MATIUS 7
7
Pohohakim kon intau
(Luk. 6:37-38, 41-42)
1“Donaai moiko mohakim, sinbá moiko in diá doman hakimon. 2#Mrk. 4:24 Sin naonda in pohohakimmu kon intau ibanea, tua doman in pohakim kon inimu. 3Nongonu sin puḻing i utatmu in ontongon monimu, táe kayu kon bonu in matamu in diábí kinotaauanmu? 4Naondabí iko motaau moguman kon i utatmu, ‘Igai bá inggamáanku in puḻingmu,’ bokaka kon matamu oyúon in kayu? 5Ei intau momunapik! Poḷuaipa muna in kayu kon bonu in matamu, sinbá motarang in matamu, bo motaaudon mopoḷuai in puḻing kon mata i utatmu.
6Donaaidon moiko mobogoi in barang inta mokudus kon ungkú. Bo donaai moiko mopogarab in mutiaramu kon boké, sinbá diá tongá rita-ritakannea mako intua bodongka mobuimai moyingki-yingkit kon i monimu.”
Poigum, potayak bo ponangkokó
(Luk. 11:9-13)
7“Poigumdon, dá ogoianbí in moiko. Potayakdon, dá mokouḻí bí in moiko. Ponangkokódon, dá pobukatanbí in moiko kon ḷoḻingkop. 8Sin pomuḷoi in intau inta moigum motarima; bo intau inta motayak in mokouḻí; bo intau inta monangkokó, pobukatan kon ḷoḻingkop. 9Oyúon degá in kon sigad monimu in mobogoi in batu kon i adínea, aka ki adínea moigum kon roti? 10Andeka mobogoi in uḷag kon i adínea, aka poiguman kon toyá? 11Dá aka moiko inta moraat bo motaau mobogoi, kon inta mopia kon i adímu mita. Yo bambíkabí ki Amámu kon soroga! Sia in moiḻiubí kon tua, ogoian-Neabí inta mopia totok in ki ine inta moigum kon i-Nia.”
12 #
Luk. 6:31
Onu inta koibog monimu popoaid in intau kon i monimu yo popoaid domandon kon i monia intua. Tuadon bonu in bayongan atorang i Musa bo inta pinais kon buk in nabi mita.
Ngara inta mosisí
(Luk. 13:24)
13“Tuotdon pongin daḷan inta mointok, sin daḷan inta mopobayá in naraka moḷoben bo mobanat, bo mobarong in intau mongin tua. 14Táe daḷan inta mopobayá in tampat inta mokobiag in nointok bo tongá topiḻik in intau inta mokodapot kon tua.”
Pangkoi bo bungainea
(Luk. 6:43-44)
15“Mokopoingatdon kon nabi mita inta diá totuu. Nabi inta mamangoi kon inimu naonda bo intau inta mongopia, táe sabanarnea mosia tua intau bí moromú. 16Bagubí nongkon oaid monia tua ain kotaauan mongo ki ine i mosia. Degá oyúon in intau mosipú kon bungai in anggur kon pangkoi in díat, andeka ḷantat kon pangkoi in bo bonganga. 17Kotaauanbí aka pangkoinea, bo nopira yo mopira doman in bungainea táe aka pangkoinea diá nopira, yo tantú bungainea in diábí doman mopira. 18Sin diábí in aka pangkoinea mopira bo mopomungai in inta moraat, andeka pangkoinea inta diá mopira bo mopomungai inta mopira. 19#Mat. 3:10; Luk. 3:9 Sin pomuḷoi in pangkoi inta mopomungai in diá mopira yo musti pupuḷon bo tubáan. 20#Mat. 12:33 Nongkon oaidnea kotaauandon monimu in mosia.”
Oaidbí, deemanbí tosingogon
(Luk. 13:25-27)
21“Diábí komintan intau inta mogoiní kon i-Nakó, ‘Tuhan, Tuhan,’ in mobaḻí umat-Ku, táe tongábí mosia inta dinumudui kon koibog i Amá-Ku inta kon soroga. 22Kon Singgai Ponantúan moantó in intau inta mogoiní kon i-Nakó: ‘Tuhan, Tuhan, takin moguman; kami naa inta nopoyaput in habar nongkon ini-Mu? Bo inta nomaké in tangoi-Mu in noguntun kon dimukud mita moraat bo nomaké doman in tangoi-Mu nogaid kon inta mokoherang kon intau?’ 23#Mzm. 6:9 Kon dodai intua, Akuoi in moguman taran-tarangan kon i monia, ‘Diábí kinotaauan-Ku in moiko! Bayádon pokoyayú kon i-Nakó, sin moiko komintan in intau inta nogaid kon inta moraat!’ ”
Noposindog in baḷoi kon tudu in batu bo kon tudu in bungaion
(Luk. 6:47-49)
24“Pomuḷoi in intau inta nokidongog kon singog-Ku bo aidannea intua komintan, yo sia tua in ibarat intau inta mopandoi, inta noposindog in baḷoinea kon tudu in batu. 25Naonda in nonguyan, inuntag in ḷunud bo tompot in baḷoi tatua, táe baḷoi tatua diábí nongonumai sin ain pinoposindog kon tudu in batu.
26Táe pomuḷoi intau inta nokidongog kon singog-Ku tongá doí dinumudui, yo sia tua in notongkai in intau bodok, inta noposindog in baḷoinea kon tudu in bungaion. 27Onda in nonguyan, inuntag in ḷunud bo tompot in baḷoi tatua, dá noumpag bo nogoguyaat totok.”
Kawasa i Yesus
28 #
Mrk. 1:22; Luk. 4:32 Bo naonda in ki Yesus nonimpod kon singog-Nea tatua, nongoherang in intau nobarong kon tua in nokodongog kon pototundú-Nea. 29Sin Sia in motundú takin kawasa, diá ná mototundú kon agama monia.
Currently Selected:
MATIUS 7: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.