YEREMIA 7
7
Ki Yeremia nohutubah kon Baḷoi i Tuhan
1-3Ki Tuhan nopotabá kon inakó minayá in Baḷoi-Nea bo sinimindog kon ngara inta bayáan in intau in Yohuda inta mamangoi moibada. Sia in nopotabá kon inakó mopotaau in koyow-Nea tanaa kon i monia, “Baḷuiaidon in dodia bo kobobiagmu, dá Akuoi, ki Tuhan Inta Totok in mokawasa, Allah in Israel in mobogoidon kon i monimu mogutun motantú kon naa. 4Dikabí mopirisaya kon intau mouboḷ inta moguman, ‘Kita in noaman, sin naa in Baḷoi Tuhan. Totuu kon naa in Baḷoi Tuhan!’
5Baḷuiaidon in kobobiagmu bo dodiamu. Pokoadildon kon tumpaḷa intau. 6Dikadon mondorot kon intau ango-angoi, kon adí uno-unon, kon boba-bobay mita. Dika moḻimod kon intau inta diá kotaḷá kon butá tanaa. Dika mosumba kon ilah ibanea, sin tua in mokoputú kon i monimu. 7Aka moiko momaḷui kon kobobiagmu bo dodiamu poḷat mogogai in mogaid kon bayongan intua, yo moiko in ogoi-Kubí mogutun motantú kon butá tanaa inta ain inogoi-Ku nobaḻí butá in mogoguyangmu.
8Táe, totuu kon diábí in mangaḻenea in moiko in mopirisaya kon singog mita uboḷ. 9Moiko in monakow, moḻimod, monuaḻing, mosakusi kon uboḷ, mobogoi in sosumba kon Baal, bo mosumba kon dewa mita inta diá kinotaauan monimu. 10Naonda intua komintan inaidan monimu, moiko in mamangoi kon tayowon-Ku kon naa kon Baḷoi-Ku tontaní, bo moguman, ‘Moaman in kami!’ Onda intua moiko in mongingguputdon in mogaid kon inta moromú tua. 11#Mat. 21:13; Mrk. 11:17; Luk. 19:46 Degá inanggap monimu kon Baḷoi-Ku naa in pugad in mogogagow? Bayongan in oaidmu ain inontong-Ku. 12#Yos. 18:1; Mzm. 78:60; Yer. 26:6 Bayádon in Silo,#7:12: Silo: Kotá inta pinotagúan kon Poti in Dodandian Tuhan kon tungkuḷ i Eli. (Indoiai Sam.1. 1:3). Kotá tatua in irimumud in intau in Pilistin. Kotá inta dungkuḷmai piniḻí-Ku nobaḻí pososumbaan kon i-Nakó. Indoiaidon onu in pinomia-Ku kon tampat tatua popisí in dosa in umat-Ku Israel. 13Umpaka mopobui-buimai in Akuoi mosingog kon inimu, moiko in doíbí mokidongog. Moiko in mogaidbí kon bayongan in dosa tatua, bo doí tumubag aka oiníon-Ku. 14Baḷoi-Ku inta pongata monimu, bo tampat inta inogoi-Ku kon mogoguyangmu bo kon inimu naa in pomiaan-Ku naonda bo Silo dungkuḷmai. 15Moiko in poguntunon-Ku nongkon tayowon-Ku ná inta pinogoguntun-Ku kon ginaḷum motoḷuadímu, umat in Israel.”
Umat inta pamandot
16Ki Tuhan in noguman, “Yeremia, dika sambayanganmu in intau mita tanaa. Dika mokituḷung andeka sambayanganmu in mosia, dika mondodak kon i-Nakó, sin Akuoi in doíbí mokidongog kon oigum tatua. 17Iko in nokoontongdon tontaní kon onu in inaidan monia kon kotá mita in Yohuda bo kon daḷan mita kon Yerusalem! 18#Yer. 44:17-19 Mongoadí mita mosipun kon kayu pondungú, ḷoḷaki mita momiag kon tuḷú, bo bobay mita in mopoyobauk in topong sin pomiaan kukis sin ogoi kon i dewi inta sinangoian monia Bokí in Soroga. Bo mosia in mopoyaat in gina-Ku pongin moposumba in tubig in anggur kon ilah mita ibanea. 19Táe totuubí, deemanbí Akuoi in pinoyaat monia in gina, táe awakbí monia tontaní nodapot in mosia in nooyá. 20Akuoi, ki Tuhan Inta Totok in moḷantud, in mopoumabí in torú-Ku inta motoyang kon baḷoi pooibadaan tanaa, kon intau bo kon mahaḷuk, bo kon pangkoi mita in kayu bo kon bungai mita in boyó. Torú-Ku in tumaga-tagab naonda bo tuḷú inta diá kopiongan.”
21Ki Tuhan in noguman, “Ei umat-Ku, kinotaauan monimu kon sosumba inta sinubá monimu kon tudu in mezbah in mustibí tubáan modapot in modait, bo sosumba ibanea in motaaubí kaanon monimu. Táe Akuoi, ki Tuhan in moguman, kaandon mako komintan! 22Kon tungkuḷ in Akuoi nodia kon mogoguyangmu iḻumuai nongkon Mesir, Akuoi in diábí nobogoi in atorang kon i monia soaḷ kuruban payongon andeka kuruban mita ibanea. 23Akuoi in tongábí nomarenta kon i monia dumudui kon i-Nakó sinbá Akuoi in mobaḻí Allah monia, bo mosia in mobaḻí umat-Ku. Akuoi in nopotabá kon i monia mobiag podudui in parenta-Ku mita sinbá mosia in mobiag motompia. 24Táe mosia in doíbí mokidongog bo doí monondudut. Mosia in tongábí dinumudui kon ibog in gina monia tontaní inta motogat bo moraat tua. Mosia in deemanbí nobaḻí mopia táe nodugangbí moraat. 25Pinangkoi kon mogoguyangmu iḻumuai nongkon Mesir nodapot in singgai naa Akuoi in umuranbí nopotabá mangoi kon mogogundoi-Ku mita, nabi mita, namangoi kon inimu. 26Táe diá in nokidongog andeka nonondudut. Tongábí nodugang in pamandot monimu bo moraa-raatdon nongkon mogoguyangmu.”
27Onda intua ki Tuhan in noguman, “Tuamai, ei Yeremia, umpakabí iko mopotaau kon tua mita kon umat-Ku, yo mosia in diábí mokidongogmai kon singogmu mita. Umpaka iko mogoiní kon i monia, mosia in doíbí tumubag. 28Dá, pogumandon kon i monia kon mosia in bangusa tobatú inta doí motoindudui kon i-Nakó, Tuhan, Allah monia. Mosia in doí mobalajar nongkon hukuman inta ain kinorasaannea. Kotoindudui kon i-Nakó in noinggamádon, nodapot in diá bidon inouman bui.”
Oaid moraat kon Ḷopá in Hinom
29Ki Tuhan in noguman,
“Uḻe intau in Yerusalem, pononogumatoidon!
Pongkódon in buokmu bo ḷumbúdon!
Podondongdon in dondong oamui
kon tudu mita in buḷud,
sin Akuoi, ki Tuhan, koyogot in sinumorú
bo ain nondoí kon i monimu komintan.
30Intau in Yohuda ain nogaid kon inta moraat. Berhala mita monia inta kinorongó-Ku tua ain inukat monia kon bonu in Baḷoi-Ku, nodapot in nokonajisdon kon tua. 31#Im. 18:21; Dat.2. 23:10; Yer. 32:35 Mezbah tobatú inta sinangoian Topet ain pinosindog monia kon Ḷopá in Hinom sin moposumba kon i adí mita monia nobaḻí kuruban payongon. Bokaka Akuoi in diábí kon dodai in onda in nopotabá kon i monia nogaid kon tua, nodapot in diábí kon dodai in onda in ná tatua in nomuká kon bonu in raian-Ku. 32Tuamai, moiangoibí in wakutunea tampat tatua in diá bidon tangoion Topet andeka Ḷopá in Hinom, táe Ḷopá Bidon Pororataan. Butá tatua in mobaḻí bidon butá poḷoḷobongan sin diádon in tampat ibanea. 33Mayat mita monia in mobaḻídon kokaanon in ḷagapan bo mahaḷuk inta mokokaan kon tapú, takin diábí in motayakmai. 34#Yer. 16:9, 25:10; Why. 18:23 Butá tanaa in mobaḻídon rawang inta noḷogat. Tosingogon pia in gina bo tosingogon in rame ponikaan in pogogaion-Kudon kon kotá mita in Yohuda bo kon daḷan mita in Yerusalem.
Currently Selected:
YEREMIA 7: INOMOG
Highlight
Copy
Compare
Share
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
