Popular Bible Verses from YEREMIA 7

Share

Kon tungkuḷ in Akuoi nodia kon mogoguyangmu iḻumuai nongkon Mesir, Akuoi in diábí nobogoi in atorang kon i monia soaḷ kuruban payongon andeka kuruban mita ibanea. Akuoi in tongábí nomarenta kon i monia dumudui kon i-Nakó sinbá Akuoi in mobaḻí Allah monia, bo mosia in mobaḻí umat-Ku. Akuoi in nopotabá kon i monia mobiag podudui in parenta-Ku mita sinbá mosia in mobiag motompia.

Táe mosia in doíbí mokidongog bo doí monondudut. Mosia in tongábí dinumudui kon ibog in gina monia tontaní inta motogat bo moraat tua. Mosia in deemanbí nobaḻí mopia táe nodugangbí moraat.

Baḷuiaidon in kobobiagmu bo dodiamu. Pokoadildon kon tumpaḷa intau. Dikadon mondorot kon intau ango-angoi, kon adí uno-unon, kon boba-bobay mita. Dika moḻimod kon intau inta diá kotaḷá kon butá tanaa. Dika mosumba kon ilah ibanea, sin tua in mokoputú kon i monimu. Aka moiko momaḷui kon kobobiagmu bo dodiamu poḷat mogogai in mogaid kon bayongan intua, yo moiko in ogoi-Kubí mogutun motantú kon butá tanaa inta ain inogoi-Ku nobaḻí butá in mogoguyangmu.

Ki TUHAN nopotabá kon inakó minayá in Baḷoi-Nea bo sinimindog kon ngara inta bayáan in intau in Yohuda inta mamangoi moibada. Sia in nopotabá kon inakó mopotaau in koyow-Nea tanaa kon i monia, “Baḷuiaidon in dodia bo kobobiagmu, dá Akuoi, ki TUHAN Inta Totok in mokawasa, Allah in Israel in mobogoidon kon i monimu mogutun motantú kon naa.