YEREMIA 51

Hukuman ibanea kon Babel

1Ki Tuhan in noguman, “Popoangoi-Kubí in tompot pomoguyaat#51:1: tompot pomoguyaat andeka: ibog moyopú. inta mogirup mopobayá in Babel bo kon intaunea mita. 2Potabá-Kubí in intau mita ango-angoi inta morimumud kon Babel naonda bo tompot mopoḷayug in kuḻit in gandum. Kon singgai in bodito tatua mosia in monubu kon butá tatua nongkon bayongan in tampat bo moyompat kodariton. 3Dika ogoian in kasampatan in tontaranea in mopopiot in piotnea andeka mopongata in pakeang parangnea. Tayowmobiagnea mita dika bióon mako in mobiag. Rimumudon in bayongan in tontaranea! 4Kekebanbí modaḷom in mosia bo matoi kon daḷan mita in kotá monia. 5Akuoi, ki Tuhan, Allah Inta Totok in mokawasa, Allah inta mokudus in Israel, diábí monaḷámai kon Israel bo Yohuda, umpakabí mosia ain binaradosa kon i-Nakó. 6Posaḷamatdon in awakmu! Poḷaguidon nongkon Babel, dika modapot in moiko moitakin koḻimodan popisí in dosanea! Sin naadon in wakutunea Akuoi motuḻí kon aid moraat in Babel, bo mohukum kon inia podudui in oaidnea. 7#Why. 17:2-4, 18:3 Babel inta koina in naonda bo galas buḷawan inta kinadaian-Ku bo nokopopisí kon bayongan inta kon dunia noḷoḷangu. Bangusa mita in nonginum kon anggur nongkon galas tatua, dá mosia in nobaḻídon nobundai. 8Táe daḻídon noḷabú in Babel bo noḷosi. Ombaḷaidon in sia, bo potayakaidon kon undam pongundam kon kekebnea mita, dika-dika bo mopiapabí in sia. 9#Why. 18:5 Intau ango-angoi inta nogutun kon tua in nosigumanan, ‘Kita in noḷongasidon notuḷung kon Babel, táe nolatdon! Maníka taḷaandon naton in butá tanaa bo mobui kon butá naton tontaní. Ki Tuhan in nohukumdon kon Babel totok in mobogat, bo norimumudon komintan.’ ”

10Umat i Tuhan in noguman, “Pinoontongdon i Tuhan kon kita in kon dotábí in inta nobanar. Igai mayá in kita in Yerusalem bo oumanon kon tua in onu inta ain inaidan i Tuhan Allah naton.”

11Ki Tuhan in nopotabádon kon datu mita in Media, sin moibog in Sia morimumud kon Babel. Natuata in pototuḻínea kon aid in intau mita inta norimumud kon baḷoi-Nea.

Porwira mita in tontara in parang nomarenta, “Iḷanitai in piot! Podia kon kaḻeaw! 12Ogoiai in tomponuot in monubu kon dinding mita in Babel. Iropotai in poḷoḷukadan. Ogoiai in moḷoḷukad. Posadia in modomok!”

Ki Tuhan in nopobayádon kon onu inta sinomayá-Nea kon intau in Babel. 13#Why. 17:1 Butá tatua in nooyúon totok bo nobarong in ongkagnea, táe wakutu in kobiagannea in nodaitdon; imbuit in kobiagannea noidapotdon. 14Ki Tuhan Inta Totok in mokawasa nongibot pinodoyon kon i-Nia tontaní kon Sia in mopotabá mangoi kon intau ná kobayong in pangkoḷá sin monubu kon Babel, bo mosia in mopobaḷú in baḷú kountungan.

Dondong dodayow kon i Allah

15Ki Tuhan in nomaḻí kon butá pinongin kawasa-nea

nomia kon dunia pinongin hikmat-Nea,

bo nobukat kon ḷangit pinongin pandoi-Nea.

16Tongá pinongin parenta,

nogonugurdon in tubig kon toḷungayá.#51:16: tubig kon toḷungayá: Indoiai Kḻn. 1:6-8.

Nongkon popod mita in butá pinoangoi-Nea in goḷom,

bo binaḻí-Nea in kilat nonindar kon bonu in uyan,

bo pinopoangoi-Nea in tompot nongkon pinotagúan-Nea.

17Nokoontongmai kon tua komintan nosadardon in intau

kon sia in bodok bo diá in pomomangaḻe.

Mononontaḷ mita kon buḷawan kinobuḻian in pogot,

sin patong berhala inta pinomianea tua in diá totuu bo diá in nyawa.

18Berhala mita tatua diá in boḻinea,

patusbí rebegon bo singkuḻeon.

Aka moiangoidon in wakutunea,

moyopúbí in mosia.

19Ki Allah i Yakub in diábí notongkai in berhala mita tatua;

Sia in nomaḻí kon bayongan in yagi-yagi.

Tangoi-Nea in ki Tuhan Inta totok in mokawasa;

Sia in nomiḻídon kon Israel nobaḻí umat-Nea.

Babel nádon onda bo bobibil

20Ki Tuhan in noguman, “Babel, iko in nádon onda bo bobibil, pakakat-Ku pakéon moparang. Iko in pakéon-Ku sin pobibil kon bangusa mita bo dodatuan mita. 21Iko in pakéon-Ku morimumud kon kabaḷo bo tumotakoinea, takin kereta bo mododianea. 22Iko in pinaké-Ku moḻimod kon ḷoḷaki bo bobay, nogurang andeka noguodpa, mongodeaga andeka tayowmobiagpa. 23Iko in pakéon-Ku moyopú kon gombala bo bobiagonnea, monononggobá bo sapi inta pomajekonea, mongongawasa bo porwira mita moḷantud.”

Hukuman kon Babel

24Ki Tuhan in noguman, “Indoiaidon tontaní naonda in Akuoi in tanaa motuḻí kon Babel bo intaunea bayongan in aid moraat inta inaidan monia kon Yerusalem.

25Ei Babel, iko in naonda bo buḷud inta nokorimumud kon sinangkub in dunia. Táe Akuoi, ki Tuhan, in moḷawangbí kon inimu. Iko in uguton-Kubí bo ḻitoion-Ku bo pomayá-Kudon mako mopokak mobaḻí ḷobud. 26Diábí tobatúmai in batu nongkon kinorumbunanmu in pakéonpa bui mobaḷoi. Iko in mobaḻídon naonda bo padang gurun modapot in mononoi. Akuoi, ki Tuhan, ain nosingog.”

27“Ei datu nongkon utuan!#51:27: nongkon utuan: Indoiai 50:3. Ogoiaidon in tomponuot monubu! Irup in torompet sinbá bangusa mita in mokodongog! Potabá in bangusa mita moparang monayow kon Babel! Potabá in dodatuan Ararat, Mini bo Askenas monubu. Duí in panglima tobatú sin mobaḻí itoi kon ponubuan tatua. Oinídon in kabaḷo ná kobayong in paanan in pangkoḷá. 28Sadia in bangusa mita moparang monayow kon Babel. Oiní in datu mita in Media takin mongongawasa mita bo guhanga mita in ḻipúnea takin tontara mita nongkon bayongan butá inta kinawasa monia. 29Butá in moḷundan bo modandú popisí in Akuoi koyogot mopobayá in tomayá-Ku sin mopobaḻí kon Babel tampat moḷogat inta diádon inutunan in intau. 30Tontara in Babel in nogogaidon in noparang bo nogutun kon benteng mita. Mosia in noinggamádon in barani bo diádon kodaya. Bonawang mita in kotá dinangatandon, bo baḷoi mita in sinurub. 31Totabá mita in noḷagui moyo-moyodudui sin mopotaau kon i datu in Babel kon kotánea in sinubudon nongkon bayongan in tampat. 32Tampat ḷoḷoḷanan iḻitúandon in musung, bo benteng mita poḷoḷukadan in sinurub. Tontara in Babel diádon kotaauan monia onu in aidan. 33Diádon moonggot taḷowon in mosia bo ritakan in musung naonda bo gandum kon tampat poḷoḻidokan. Akuoi, ki Tuhan Inta Totok in mokawasa, Allah in Israel, ain nosingog.”

34Yerusalem in irimumud bo kinaan komintan i datu in Babel; inaotannea in kotá tatua naonda bo inta nongaot kon botoḷ. Naonda bo mahaḷuk inta moḷoben totok, iḻiomnea in Yerusalem bo nomonu kon siannea takin bayongan inta mopia nongkon kotá tatua, bodongka noḷumbú kon ki agatnea.

35Intau inta nogutun kon Sion, pogumandon, “Igumon mako Babel in kotugatan in ḻingá inta pinopoaidnea kon i naton!” Intau in Yerusalem, pogumandon, “Igumon mako Babel in koantugan in roriga inta pinoantugnea kon i naton!”

Ki Tuhan in notuḷung kon Israel

36Tuamai in ki Tuhan in noguman kon intau in Yerusalem, “Akuoi in motuḷungbí kon pelekaramu bo motuḻí kon aid mita in musungmu mita kon inimu. Bokaká mita bo ongkag mita in Babel ingkagan-Kubí. 37Butá tatua in mobaḻíbí bonturungan in goguyaatnea, pogogadopan in ungkú in kayuon. Mokoningkimbí in intau in moindoi kon inia, bo diábí tobatúmai in intau in moibog mogutun kon tua. 38Intau in Babel in moganggorbí naonda bo singa, bo monginggoi naonda bo ki adí in singa. 39Bo ibog monia mokaan in moḷobendon totok, Akuoi in mosadiabí kon pongaanan monia, bo poḷoḷanguon-Ku in mosia bo mopusing moidapot in moḷoḷot bo diádon mopobango-bangon bui. 40Mosia in diaan-Kubí sin ratáan naonda bo ki adí in domba, bembé, bo domba koḷakian. Akuoi ki Tuhan, ain noguman.”

Ukur in Babel

41Ki Tuhan in noguman, “Babel inta dinayow in sinangkub in dunia ain inagow bo iḻitúan! Totok in mokokoningkim in butá tatua kon bangusa mita. 42Tubig kon dagat moiḻebet modapot in Babel; bokoḷnea mita mondoḷudut moyompat kon butá tatua. 43Kotánea mita mobaḻí tampat inta mokokoningkim, naonda bo padang gurun inta noḷogat. Diábí in intau in moibog mogutun andeka tumaḻib kon tua. 44Bel, dewa in butá in Babel, in hukumon-Kubí. Baḻíon-Ku in sia mopobui kon onu inta ain inagownea. Bangusa mita in diá bidon mosumba kon inia.

Dinding mita in Babel in norumbundon. 45Tuamai in poḷaguidon nongkon tua, ei umat in Israel! Posaḷamatdon in awakmu nongkon torú-Ku inta tumaga-tagab. 46Dikadon moondok andeka moḻia-ḻiaw in gina popisí in habar mita inta dinongog monimu. Pomuḷoi in taong moiwaya in habar inta tongoposi--habar soaḷ aid mokotor kon bonu in butá bo soaḷ datu mita inta mosiparangan.

47Popirisayadon, moiangoibí in wakutunea Akuoi in mohukum kon berhala mita in Babel. Sinangkub in butá tatua in singkuḻeonbí, bo bayongan in intau kon bonunea in ḻimodon. 48#Why. 18:20 Bayongan inta kon ḷangit bo kon butá in morogiowbí pia in gina aka Babel moiḷabú kon bonu in kawasa in bangusa nongkon utuan inta mamangoi sin morimumud kon inia. 49#Why. 18:24 Nobarong in intau kon sinangkub in dunia ain minatoi popisí in Babel, táe tanaa in Babel in moḷabúbí popisí in intau in Israel inta minatoi kinoḻimodan. Akuoi, ki Tuhan, ain nosingog.”

Koyow i Tuhan kon intau in Israel kon Babel

50Ki Tuhan in noguman kon intau in Israel kon Babel, “Moiko in noiḷaguidon kon poḻimodan! Dá bayádon in tanaa! Dika mogoḷat! Umpakabí noyayú in moiko nongkon baḷoi, toropdon in Akuoi, Tuhanmu, bo kon Yerusalem. 51Moiko in moguman, ‘Kami in siningkuḻe bo pinokopo oyámai; kami in kinobuḻiandon in pogot popisí in intau mita ango-angoi iḻimitú kon yuang mita motusi kon bonu in Baḷoi i Tuhan.’ 52Yo, taridiai in tosingogon-Ku tanaa. Moiangoibí in wakutunea Akuoi mohukum kon berhala mita in Babel. Kon sinangkub in butá tatua in kodongoganbí in amui in intau popisí in kinekeban modaḷom. 53Umpakabí Babel mokotakod kon ḷangit bo moposindog in tampat poḷoḷukadan inta diá kodapotan, Akuoi in tantúbí mopotabá kon intau sin momoguyaat kon tua. Akuoi, ki Tuhan, in nosingog.”

Ingguput in pomoguyaatan kon Babel

54Ki Tuhan in noguman, “Indongogai! Kon Babel intau in kumarak bo mongombaḷ morobonoḷ in gina popisí in korimumudan inta mobaḻí kon butá tatua. 55Akuoi in koyogotdon morimumud kon Babel bo mopogogai in singog mita in rame monia. Musung in mamangoi naonda bo bokoḷ inta modoḷudut, bo tontaranea in monubu takin kokow mita in parang. 56Mosia in mamangoi sin momoguyaat kon Babel, modomok kon tontaranea mita bo momutoḷ kon pakakat mita in parang monia. Akuoibí in Tuhan inta mohukum kon aid moraat, bo Babel in tuḻían-Kubí podudui in aidnea. 57Akuoi in mopoḷoḷangubí kon pojabat in pomarenta in Babel--intau mita mongopandoi, itoi bo tontara. Mosia in diá bidon mopobango-bangon bui, moḷoḷot modapot in mononoi. Akuoi in nosingogdon; Akuoibí in datu, Akuoi in Tuhan Inta Totok in mokawasa. 58Dinding in Babel inta mongoropot mita in rimumudon-Kubí modapot in motondodaidon in butá. Bonawangnea inta mongoḷantud in turubon-Kubí komintan. Diábí in mangaḻenea in inta ḷongasi in bangusa mita, sin komintan bungai in aid monia in kaanonbí in tuḷú. Akuoi, ki Tuhan Inta Totok in mokawasa, ain nosingog.”

Koyow i Yeremia pinotaau kon Babel

59Moḷoḷukad i Datu Zedekia in ki Zeraya ki adí i Neria ki ompu i Mahseya. Kon taong inggopatnea kon pinomarentaan i Zedekia datu in Yohuda, ki Seraya dinumudui kon i Zedekia minayá in Babel. Dá inogoianku in sia in oaidan tobatú. 60Bayongan in bodito inta moiantug kon Babel bo soaḷ mita ibanea kon butá tatua ain pinaisku kon ḻitodan in buk. 61Bo akuoi in noguman kon i Seraya, “Naonda in iko moiyaput in Babel, ḷongasi sinbá bayongan inta pinais kon bonu in buk tanaa in kobacaanmu kon intau mita inta kon tua. 62Mopaḷut mako kon tua posambayang nanaa, ‘Tuhan, Iko in nogumandon kon kotá tanaa in rimumudon-Mu dá pinomayá intau andeka mahaḷuk in moyopúdon komintan, bo tampat tanaa in mobaḻídon naonda bo padang gurun modapot in mononoi.’ 63#Why. 18:21 Yo, naonda in mopaḷut mako bacaan in tombonu in buk tanaa kon intau mita tatua, popotogot in batu kon buk tanaa, bodongka pogambat kon yua-yuak in Ongkag in Eprat, 64poḷat moguman, ‘Nanaa in mobaḻí kon Babel. Butá tanaa in moitaḷomdon bo diá bidon momuká bui popisí in bodito inta pinopoantug i Tuhan kon inia.’ ”

Tosingogon mita i Yeremia nopaḷut kon naa.

Currently Selected:

YEREMIA 51: INOMOG

Highlight

Copy

Compare