YEREMIA 50
50
Koḷabúan in Babel
1 #
Yes. 13:1–14:23, 47:1-5 Naa in koyow i Tuhan kon inakó soaḷ kotá in Babel bo intau inta nogutun kon bonunea. 2“Posindogdon in tomponuot bo potaaudon kon bangusa mita kon Babel in ain noḷabú! Dika bunion in tua! Ki Merodakh dewanea in ain irimumud, bo patongnea mita inta mokotor in nobotak noirarit, takin doman berhalanea mita in totokbí in siningkuḻe.
3Bangusa tobatú nongkon utuan in mamangoibí monubu kon Babel bo mopobaḻí kon butá tatua moḷogat moingkag. Intau bo mahaḷuk in moroḷagui, bo diá bidon in moibog mogutun kon tua.”
Israel in mobui mangoi
4Ki Tuhan in noguman, “Kon tungkuḷ intua intau in Israel bo Yohuda in mamangoi bo moyotakin mongombaḷ, motayak kon i-Nakó, ki Allah monia. 5Mosia in moḻibóbí kon daḷan mopobayá in Sion, bodongka mayá ná tua. Mosia in mogaidbí kon dodandian mononoi takin-Ku, bo umuranbí kumadai.
6Umat-Ku in nádon domba inta pinomayá mako in gombalanea mita noiḷaḻe kon buḷud. Mosia in nodondaḷoi nongkon buḷud tobatú mopobayá in buḷud ibanea bo diádon kinotaauannea monia in baḷoi monia. 7Mosia in sinubu bo sinikisa in bayongan in intau inta moyodungkuḷ monia. Musung mita in umat-Ku in noguman, ‘Onu in inaidan naton, diábí noitaḷá, sin intau mita tatua in binaradosadon kon i Tuhan. Mogoguyang monia in mopirisaya kon i Tuhan, dá mosia in mustibí doman umuran motoindudui kon i-Nia.’
8 #
Why. 18:4
Ei umat in Israel, poḷaguidon nongkon Babel! Moikobí inta muna-munamai mayá, sinbá ibanea in dumudui. 9Potabá-Kubí in tongonumai in bangusa inta mongoropot nongkon utuan sinbá monubu kon Babel. Tompiaanbí monia in pipidan sin moparang monayow kon Babel bo monaḷow kon i monia. Mosia in momomiot mita inta mongotoyang inta diábí nokoimontanmai in moitabat. 10Babel in pogagowanbí, bo intau inta mogagow in mogamábí kon bayongan yagi-yagi kinooibogbí in ginanea. Akuoi, ki Tuhan, ain nosingog.”
Babel noḷabú
11Ki Tuhan in noguman, “Ei intau in Babel, moiko in nogagow kon umat-Ku. Moiko in ḷumansi-ḷansik sin mopia in gina naonda bo kabaḷo inta kumurik, bo naonda bo sapi inta koyogot in mokaan kon bonok. 12Táe moiko in mobaḻíbí bangusa inta totok in diá in mangaḻenea kon sigad in bangusa mita. Kotámu tontaní inta moḷoben tua in singkuḻeonbí bo pokopooyáanmai. Butámu in mobaḻí padang gurun inta moḷogat bo moingkag. 13Popisí sinumorú in Akuoi, dá Babel in mobaḻídon apugnea bo diádon in mogogutun. Bayongan inta moitaḻib kon tua in moitaḻikokogbí bo mokoningkim.
14Ei moiko momomiot mita! Tompiadon in pipidanmu sin mongopung bo monubu kon Babel. Popotanádon in bayongan piotmu kon Babel, sin sia in binaradosadon kon i-Nakó. 15Pokokowdon kokow in parang kon ḻibumai in kotá tatua! Tanaa Babel in ain sinumungkud. Pandongnea mita in dinangatandon bo inumpag. Akuoi in koyogotdon motuḻí kon Babel. Tuamai in popoaidon kon i monia in onu inta pinopoaid monia kon intau mita ibanea. 16Dika pomayá mako intau in monompinomuḷa andeka mosipú kon bungai in boyónea kon butá tatua. Bayongan in intau ango-angoi inta nogutun kon tua in mobuibí kon butánea tontaní, popisí in moondok in mosia kon tontara inta monubu.”
Israel nobuidon mangoi
17Ki Tuhan in noguman, “Intau in Israel in naonda bo paanan in domba inta inaḷowan bo pinorarit in singa. Dungkuḷ totok mosia in sinubu i datu in Asyur, bodongka ki Nebukadnezar datu in Babel nonotop kon tuḷan mita monia. 18Tuamai, Akuoi, ki Tuhan Inta Totok in mokawasa, Allah in Israel, in mohukumbí kon i Datu Nebukadnezar bo butánea naonda bo pinohohukum-Ku kon i datu in Asyur. 19Popobui-Kubí in intau in Israel mayá in butá monia. Mosia in mokaanbí kon bungai in pinomuḷa kon Buḷud in Karmel bo butá in Basan. Mosia in botuganbí in bungai in pinomuḷa kon butá in Epraim bo Gilead. 20Kon tungkuḷ intua Israel bo Yohuda in modarit bidon nongkon dosa, sin ampungan-Kubí in intau mita inta ain pinosaḷamat-Ku. Akuoi, ki Tuhan, ain nosingog.”
Hukuman kon Babel
21Ki Tuhan in noguman kon bangusa tobatú nongkon utuan,#50:21 bangusa nongkon utuan: Indoiai 50:3. “Tubudon in intau kon Merataim bo Pekod. Ḻimod bo yopú in mosia. Aidai onu inta pinarenta-Ku. Akuoi, ki Tuhan, ain nosingog.”
22Singog poparangan gonugur mako kon bonu in ḻipú, bo nobaḻídon in kinorimumudan noḷoben. 23Sinangkub in dunia binibil in Babel nodapot in norimumud, táe tanaa bobibil tatua in noputoḷdon! Bayongan in bangusa noitaḻikokog in nokodongog kon onu inta nobaḻí kon butá tatua.
24Ki Tuhan in noguman, “Babel, sinayowanmu in Akuoi, tuamai iko in noibaaḷ kon potait inta sinaan-Ku kon inimu, táe diábí kinomangaḻeanmu intua. 25Baḷoi pototagúan-Ku kon pakakat in parang-Ku ain binukatan-Ku, bo takin torú pinoḷuai-Kudon in pakakat mita in parang tatua, sin Akuoi in Tuhan Inta Totok in moḷantud musti mopobayá in oaidan-Ku kon Babel. 26Tubudon in Babel nongkon bayongan in tampat, bo dangataidon in baḷoi mita pototagúan mita kon gandumnea! Sipundon in pakakat mita inta sinokoagow ná moiko mosipun kon gandum! Yompat in butá tatua! Dikabí in taḷaan! 27Ḻimodon komintan in tontaranea! Patoi in mosia! Moboditodon in bangusa in Babel! Notompodon in wakutunea mosia in hukumon!”
( 28Intau mita inta noḷagui minayá in Yerusalem nongkon Babel nongonguman kon naonda in ki Tuhan Allah naton notuḻí kon pinogogaid in intau in Babel kon Baḷoi Tuhan.)
29 #
Why. 18:6
Ki Tuhan in noguman, “Potabádon in momomiot monubu kon Babel. Pokipiotaidon in intau mita inta mongotaná momiot. Kopungdon in kotá tatua bo dikadon pomayá mako in intau tobatúmai in mokoḷagui. Tuḻíaidon in bayongan oaidnea bo popoaidon kon inia podudui in aidnea, sin sia in nopoaidon in inta mokotor kon i-Nakó, Inta Totok in motusi, Allah in Israel. 30Kon singgai tua intaunea mita tayowmobiag in matoibí mita kon daḷan mita in kotánea, bo bayongan in tontaranea rimumudon. Akuoi, ki Tuhan, ain nosingog.
31Babel, iko in moiḻiudon ḷantud in gina! Tuamai in Akuoi, ki Tuhan, Inta Totok in moḷantud, Allah Inta totok in mokawasa, moḷawang kon inimu. Wakutuneadon iko hukumon-Ku. 32Bangusamu inta motosiḷantud in gina tua in moipintudbí bo moidompaḷak. Diábí tobatúmai in motuḷung kon inimu moposindog. Kotámu mita in turubon-Ku, bo bayongan inta kon diugneamai in payongon.”
33Ki Tuhan Inta Totok in mokawasa in noguman, “Intau in Israel bo intau in Yohuda dinorot. Bayongan inta nodakop kon i monia noḷukad totok bo doíbí mopoḷuai kon i monia. 34Táe Akuoi in mopoposaḷamat monia inta moropot, inta moduḷu kon pelekara monia bo modia kon dodamean kon dunia. Táe kon intau in Babel popoangoi-Kubí in ropatoi bo ondok.”
35Ki Tuhan in noguman, “Moyopúdon in Babel takin rayat bo pojabat in pomarenta takin intau mita mongopandoi monia! 36Moyopúdon in nabi mita in Babel! Mosia in mouboḷ bo dondunguḷ. Moyopúdon in tontara in Babel inta mongotorindog! Totokdon in moondok in mosia! 37Rimumud in kabaḷo takin kereta in parangnea! Moyopúdon in tontara mita inta sinondanannea! Totok bidon in moyangkó in mosia! Payong komintan in bayongan in kaoyúonan in Babel! Agow in kapunyaannea! 38Ingkagai in bayongan in ongkag bo gobánea! Sin, Babel in nopuḻingdon in berhala mita inta mokorongó, inta nokopopisí kon intau mita mososumbanea nobaḻí nobundai.
39 #
Why. 18:2
Tuamai in Babel mobaḻí tampat in ging mita bo dimukud mita moraat#50:39: ging mita bo dimukud mita moraat andeka: mahaḷuk mita in kayuon bo serigala. bo ḷagapan mita unta. Modapot in mononoi diá bidon in intau in moibog mogutun kon tua. 40#Kḻn. 19:24-25 Naonda in pinoyoyompat-Ku kon Sodom bo Gomora takin ḻipú mita inta kon diugneamai, yo natua doman in poyoyompat-Ku kon Babel. Diá bidon tobatúmai in mogutun kon tua. Akuoi, ki Tuhan, ain nosingog.
41Bangusa tobatú inta moropot koyogotdon in mamangoi nongkon butá inta moyayú nongkon utuan. Mosia in namangoi takin nobayong in datu sin moparang.
42Mosia in nodia kon piot bo pandong;
mosia in morongut bo diábí kotaauan monia in ampung.
Nádon gonugur in bokoḷ kon dagat
natuata in singog in sioḷ in kabaḷo monia inta moribatuk sin mamangoi monubu kon Babel.
43Mokodongogmai kon habar tatua,
datu in Babel kinodaitan in daya.
Ginanea inagían in ondok,
bo mokorasa kon mororiga naonda bo bobay inta mononggadí.
44Naonda bo singa inta noitukat nongkon kayuon noromon kon diug in Ongkag in Yordan bo namangoi in rawang popokaanan in domba, natuata in Akuoi, ki Tuhan, in mamangoi bo mopobaḻí kon intau in Babel daḻí moḷagui nongkon kotá monia. Bo Akuoi in momiḻí kon itoi tobatú sin momarenta kon bangusa tatua.
Ki ine in motaau popotongkaian kon i-Nakó? Ki ine in mokobaḻí mopelekara takin-Ku? Oyúon degá in itoi in mokoḷawang kon i-Nakó? 45Tuamai, indongogaidon onu inta sinomayá-ku kon kotá in Babel, bo onu in aidan-Ku kon intaunea mita. Ki adí doman mita monia in uguton pobayá, bo bayongan in intau angoiandon in ondok. 46Aka Babel moḷabú, yo kodongogandon in dowawá inta motoyang totok dá sinangkub in dunia modandú; karak mita in intaunea in kodongogan in bangusa mita ibanea.”
Currently Selected:
YEREMIA 50: INOMOG
Highlight
Copy
Compare
Share
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
