YESAYA 25

Dondong dodayow

1 Tuhan, Ikobí in ki Allahku,

poḷantudonku in Iko bo dayowonku in tangoi-Mu.

Sin oaidan-Mu mita totok in mokoherang;

Nongkon dungkuḷmai Iko in nonomayá,

bo umuran mosatia in Iko in nogaid kon tua.

2Kotá tatua ain irimumud-Mu;

kotá inta dininding tua dongkadon rumbunnea.

Komaḻig inta pinosindog in intau ango-angoi ain noyompat,

bo diá bidon pinosindog bui dapot in mononoi.

3Iko in dayowonbí in bangusa mita inta moropot,

bo koondok kon kotá mita in bangusa mita inta moromú.

4Sin iko in mobaḻí poḷoḷaguian in intau mita inta moyangkó,

nobaḻí tampat inta moaman kon intau inta bogá kon dodai in mororiga.

Ikobí in pogogadopan aka oyúon in deḷang,

pononiungan aka mopatú totok.

Sin intau moromú monubu naonda bo deḷang kon sempo in uagat,#25:4: Kamungkinan moḷoben mangaḻenea deḷang kon sempo in uagat; podudui in naska in Ibrani: deḷang nondangat kon dinding.

5naonda bo tompot mopatú kon butá inta noḷogat.

Táe binaḻí-Mu in musung nami diá nokobuká kon bibig,

Pinogogai-Mu in baḷú in intau mita inta moromú,

naonda bo oḻiung in goḷom nonginggamá kon patú in singgai.

Ki Allah nosadia kon pongaanan kon bobutungan

6Kon Buḷud in Sion, ki Tuhan Inta Totok in mokawasa in mosadia kon pongaanan in bayongan in intau kon dunia. Inoḷudan-Nea in kaanon inta totok in mopia in nanamnea bo anggur inta piniḻí. 7Kon tudu in buḷud tatua inggamáan-Neadon in goḷom in robonoḷ in dodob inta nogoḻiung kon bangusa mita. 8#Kor.1. 15:54; Why. 7:17, 21:4 Ki Tuhan Inta Totok in mokawasa in monginggamábí kon popatoi modapot in mononoi! Sia in momopatbí kon ḷuá nongkon bayongan in pogot, bo mopoyayú in kohohina inta binaba in umat-Nea kon sinangkub in butá. Ki Tuhan ain nosingog, bo tua in notantúbí kon mobaḻí.

9Kon dodai intua intau in mogumanbí,

“Totuubí, Siabí in ki Allah naton;

Siabí inta inoḷat mako naton,

sinbá kita in posaḷamaton.

Totuu, naabí in ki Tuhan;

Siabí inta inoḷat mako naton.

Tanaaya kita in morogiow mopia in gina,

sin Sia in noposaḷamatdon kon inaton.”

Ki Allah in mohukumbí kon Moab

10 # Yes. 15:1–16:14; Yer. 48:1-47; Yeh. 25:8-11; Am. 2:1-3; Zep. 2:8-11 Ki Tuhan in moḷukadbí kon Buḷud in Sion, táe Moab in ritakanbí naonda bo wawa kon yoyatan. 11Intaunea mita in motonggóbí kon ḻimanea naonda bo intau inta ḷumanguy. Táe ki Tuhan in mopoompábímai kon koḷoḷatú monia modapot in mosia diádon kodaya. 12Benteng mita in Moab takin dindingnea mita inta moḷantud in umpagon-Neabí bo pogambat-Nea kon butá modapot in morimumud ná ḷobud.

Currently Selected:

YESAYA 25: INOMOG

Highlight

Copy

Compare