YESAYA 14
14
Nobui nongkon pinoḷumbúan
1Ki Tuhan in monotabibí kon Israel umat-Nea, bo momiḻí bui mobaḻí kapunyaan-Nea. Diaan-Nea bui in mosia pobayá kon butá monia tontaní. Intau ango-angoi in mamangoibí bo dumugang kon i monia. 2Mobayong in bangusa in motuḷung kon bangusa in Israel sin mobui kon butá inta inogoi i Tuhan kon i monia, bo kon tua bangusa mita tatua in mobantung kon Israel. Israel in modakopbí kon intau mita inta nokoimontandon nodakop kon inia bo momarenta kon intau mita inta nokoimontandon nondorot kon inia.
Datu in Babel kon dunia in intau minatoi
3Ki Tuhan in mopoḷuatbí kon intau in Israel nongkon takit bo roriganea, bo nongkon oaidan mobogat inta pinakisa pinoki aid kon inia. 4Aka ki Tuhan mopoaidon in tua yo mosia in mopoḷoḻekebí kon datu in Babel nanaa,
“Datu inta moromú ain noḷabú! Sia in diá bidon motaau mondorot. 5Ki Tuhan ain nonimpod kon pinomarentaan in pongawasa mita inta moraat 6inta pinongin torú nondorot kon bangusa mita bo umuran momongkug kon i monia. 7Imbuitnea sinangkub in dunia in moonow bo mobiag motompia, bo bayongan in intau modondong takin ḷunganga in gina. 8Pangkoi in eru bo pangkoi in ḷokuyú in Libanon mosanang in gina sin datu inta moromú tua ain noḷabú, bo naonda in sia mayá, diá in mokipupuḷ kon i monia!
9Dunia in intau minatoi moyotakin motomu kon i datu in Babel tatua. Dá noibangondon in dimukud in intau mita inta koḻipod nongawasa kon dunia, bo dimukud in datu mita simindog nongkon tampat pomomarentaan monia. 10Mosia komintan momaḷú kon inia, ‘Ei! Tanaa iko notongkaidon nami, noḷungkoyó bo kinodaitandon in daya! 11Dungkuḷmai iko in ihoromat in musik bo kecapi, táe tanaa in kon bonudon in tampat moingongow kon dunia in intau minatoi. Uḷod mita in nobaḻí tosiuganmu bo oḷuasi in nobaḻí daingmu.’
12 #
Why. 8:10, 9:1 Ei datu in Babel, koḻipod iko in tundi modiug mobayag inta modoriang, táe tanaa in noḷabúdon nongkon ḷangit! Koḻipod iko in nonaḷow kon bangusa mita, táe tanaa in pinorobu kon butá. 13#Mat. 11:23; Luk. 10:15 Iko in moniat moponik kon ḷangit bo momia kon tampat pomomarentaanmu kon ḻimonik in tundi inta totok in moonik! Kainimukamai iko in motaaubí ḻimitú mobaḻí datu kon tudu in buḷud kon dotá in utuan, tampat pinoyosipunan in dewa mita. 14Iko in moguman, kon iko in mamonik in goḷom mita inta moḷantud bo mobaḻí ná ki Inta Totok in moḷantud. 15Bokaka iko in pinorobu kon tampat inta totok in moonag kon dunia in intau minatoi.
16Mosia inta kon tua in mobobui bo moindoi kon inimu. Mosia in moḻibóbí, ‘Naa degá in intau inta nokoondok kon dunia bo nokodoḻiok kon dodatuan mita? 17Sia naa degá inta norimumud kon kotá mita bo nomaḷui kon dunia naa nobaḻí rawang in bungaion? Sia naa degá inta diá kon dodai in onda in nomuḻi kon intau mita inta dinakopnea andeka inta nopomayá mako kon i monia nobui?’
18Bayongan inta nokoimontandon nobaḻí datu in bangusa mita iḷobong takin pinoramean kon poḷoḷobongan kon i monia tontaní, 19Táe iko in diá kotampat poḷoḷobongan; mayatmu in iḷumbú naonda bo tokat inta kinodoí kinobumbunan in mayat mita in intau inta noroḷongasi noparang inta minatoi kon parang, bo pinogambat noyotakin monia kon bonu in bubú in batu, naonda bo awak bongkogdon inta kinoritakan. 20Iko in ain noyopú kon butámu bo noḻimod kon bangusamu tontaní. Tuamai iko in diábí ḷobongon ná datu mita ibanea. Diábí in tobatúmai nongkon motoḷuadímu inta moraat tua in posaḷamaton. 21Poḻimodan in ḷagidon pangkoion! Ki adímu mita ḷoḷaki in matoibí popisí in dosa in mogoguyang monia. Diábí tobatúmai in kon sigad monia in momarenta kon dunia andeka moposindog in kotá mita.”
Ki Allah in morimumud kon Babel
22Ki Tuhan inta Totok in mokawasa noguman, “Akuoi in monububí kon Babel bo monginggamá kon inia. Diábí tobatúmai in posaḷamaton-Ku, nodapot in mongoadí mita diábí pomayá-Ku mako in mobiag. Akuoi, ki Tuhan ain nosingog. 23Babel in baḻíon-Ku rawa mita inta pogutunan in monikuḷu. Babel in kaitan-Kubí kodariton. Akuoi, ki Tuhan Inta Totok in mokawasa ain nosingog.”
Ki Allah in moyopú kon Asyur
24 #
Yes. 10:5-34; Nah. 1:1–3:19; Zep. 2:13-15 Ki Tuhan Inta Totok in mokawasa in nongibot: “Inta ain sinomayá-Ku tua in notantú bidon kon aidanbí. 25Intau in Asyur kon Israel butá-Ku, in yopúon-Kubí, bo inta kon buḷud-Ku mita in tokoritakan-Kubí. Poḷuaton-Kubí in bangusa-Ku nongkon pinororigaan bo nongkon bobabaan inta pinakisa kon i monia in intau in Asyur. 26Naa in tomayá-Ku kon dunia; kokaḷ-Ku in noiyopadon sin mohukum kon bangusa mita.” 27Ki Tuhan Inta Totok in mokawasa ain nonantú kon mogaid kon natua. Sia in nopoyopadon in ḻima-Nea sin mohukum, bo diábí tobatúmai in intau mokoḷamboi kon i-Nia.
Ki Allah in moyopúbí kon intau in Pilistin
28 #
Dat.2. 16:20; Taw.2. 28:27 Naa in koyow inta pinotaau kon taong kon dodai in kinopatoian i Datu Ahas.
29 #
Yer. 47:1-7; Yeh. 25:15-17; Yl. 3:4-8; Am. 1:6-8; Zep. 2:4-7; Za. 9:5-7 Ei bangusa in Pilistin, popangkuḷ inta pinaké momongkug kon inimu ain noputoḷ. Táe dikabí mopia-pia in ginamu, sin aka uḷag tobatú matoi, yo uḷag inta moraat totok in mamangoibí momaḷui kon inia, bo natu in uḷag momotow kon naga inta kokoḻikip. 30Moiko in koantuganbí in malarat in gogoy inta motoyang, bo bayongan in intau inta kinotaḷáan in ḻimodonbí. Noyotoḻikud kon tua, intau inta totok in nobogá nongkon umat i Tuhan in mokouḻíbí kon kaanon, bo intau mita inta diá kodaya in mobiagbí moaman bo mobiag motompia.
31Pogamuidon bo pomaḷúdon mopoigum in totuḷung, ei kotá mita in Pilistin! Kodoḻiokdon in moiko komintan popisí in moondok! Goḷom in ḷobud mokompoḷ nongkon utuan nobaḻí tomponuot kon kinoangoian in tontara in musung; diábí in moondok in kon sigad monia.
32Onu in potubag naton kon totabá mita inta namangoi nongkon bangusa in Pilistin? Kita in mopotaau kon i monia kon ki Tuhan ain noposindog in Sion, bo umat-Nea inta nororiga in ḷukadanbí kon tua.
Currently Selected:
YESAYA 14: INOMOG
Highlight
Copy
Compare
Share
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
