YESAYA 13

Ki Allah in mohukum kon Babel

1 # Yes. 47:1-15; Yer. 50:1–51:64 Naa in koyow i Allah, inta sinarima i Yesaya adí i Amos soaḷ Babel:

2Pokerabdon in bandera mita in parang kon tudu in buḷud inta noḷogat! Pokuanidon kon tontara mita, bo tonggódon in kokaḷmu sinbá mosia in monubu kon bonawang mita in kotá inta moḷoḷatú tua. 3Ki Tuhan ain nogoiní kon intau mita inta ain sinokopiḻí-Nea. Mosia in motorindog, mopirisaya kon ropot monia bo motaau pongata. Ki Tuhan in nopotabá kon i monia mohukum kon intau mita inta kinotugatan in torú-Nea.

4Indongogaika in dowawá kon buḷud, ná singog in pinosipunan in intau inta totok in mobarong. Indongogaika in dowawá in dodatuan mita bo bangusa mita inta noyosipun. Ki Tuhan Inta Totok in mokawasa in nonaridi kon tontara mita in parang. 5Mosia in namangoi nongkon ḻipú mita inta noyayú kon popod mita in dunia. Kon bonu in torú-Nea ki Tuhan in nomaké kon i monia sin moyopú kon sinangkub in dunia.

6 # Yl. 1:15 Pogamuidon, sin singgai i Tuhan in nodiugdon, tuata in singgai koyopúan inta pinoangoi i Tuhan Inta Totok in mokawasa. 7Pomuḷoi in intau naonda bo moḻemé in ḻimanea bo moinggamá in baraninea. 8Mosia komintan koaputan in ondok inta motoyang, bo momaḻikotad sin monakit naonda bo bobay inta koyogot in mononggadí. Mosia in mosiindoian takin ḻia-ḻiaw in gina, pogotnea in mosimpuya popisí in mooyá. 9Singgai i Tuhan in moiangoibí, bo kon singgai tatua ki Tuhan in mopoaid in torú-Nea bo rogi-Nea inta motoyang. Butá in mobaḻí butá inta moḷogat, bo bayongan in intau baradosa in moyopú. 10#Yeh. 32:7; Mat. 24:29; Mrk. 13:24-25; Luk. 21:25; Why. 6:12-13, 8:12 Batúan in tundi bo pinosipunan in tundi mogogai in monindar; mata in singgai in simindip kon dodai in sia momuká, bo buḷan in diá bidon monindar bui.

11Ki Tuhan in noguman, “Akuoi in mohukumbí kon dunia popisí in aidnea moraat, bo intau mita inta moraat popisí in dosa mita monia. Bayongan in inta moḷoḷatú in poompáan-Kubí, intau mododia bo moromú in hukumon-Ku. 12Intau inta posaḷamaton tongá topiḻik, mosia in moyaka-yakagbí nongkon buḷawan taakan. 13Baḻíon-Ku in ḷangit gumugur bo butá in moḷundan nongkon kinoḻitúannea kon singgai in Akuoi, ki Tuhan Inta Totok in mokawasa, mopoontong in torú-Ku.

14Intau ango-angoi inta nogutun kon Babel in moirangkapbí bo moḷagui mayá in ḻipúnea-ḻipúnea. Mosia in naonda bo rusa inta noḷagui nongkon moḷoḷutam, andeka paanan in domba inta diá in gombala. 15Ki inekabí in kodomokan tumbukonbí modapot in matoi. 16Mosia in mokoontongbí tontaní kon adí mita mointok monia romputon, baḷoi mita monia pogagowan bo ki buḷoi mita bobay monia domokon.”

17Ki Tuhan in noguman, “Akuoi in nopotabá kon bangusa in Madai#13:17: bangusa in Madai: intau inta nogutun kon daerah in timur laut in Babel, inta noituot kon dodatuan in Persia. sin monubu kon Babel. Mosia in diábí motaau sogóon in saḷaka andeka buḷawan. 18Takin puḷu bo piotnea mosia in moḻimod kon intau mita inta nongoguodpa. Mosia in diábí motabi kon adí mita mointok bo diábí motabi kon mongoadí. 19#Kḻn. 19:24 Nongkon bayongan in dodatuan, Babel tua in inta totok in mogaga bo mokoyunggagá kon intaunea mita. Táe Akuoi, ki Tuhan, in morimumudbí kon inia, ná inta inaidan-Ku kon Sodom bo Gomora. 20Diá bidon tobatúmai intau in mogutun kon tua. Diá bidon in intau in Arab mododondaḷoi inta moposindog in ḷoḷaigannea kon tampat tatua, bo diá bidon in gombala inta modia kon bembé dombanea sin moranut kon bonok kon tua. 21#Yes. 34:14; Zep. 2:14; Why. 18:2 Tampat tatua in pogutunan bidon in biag mita ḻindong. Monikuḷu in monompugadon kon baḷoi mita monia, bo ḷagapan unta in mogutun kon tua. Bembé mita ḷoḷog mosimbanan bidon kon yuak in kinorumbunan tatua. 22Ganggor in ungkú in kayuon bo serigala in kodongogan nongkon puri mita bo komaḻig mita in Babel. Wakutu korimumudannea motoyongdon bo wakutunea in diá bidon baḷuian bui.”

Currently Selected:

YESAYA 13: INOMOG

Highlight

Copy

Compare