MATIUS 7
7
Angngadeli ri tau maraenga
(Luk. 6:37-38, 41-42)
1“Teako mangngadeli ri parannu tau, sollanna tena todong Naadeliko Allata'ala. 2#Mrk. 4:24 Nasaba' antekamma batenu mangngadeli ri parannu tau, kamma tomminjo batenu laniadeli ri Allata'ala. Siagang pa'baku' apa nupake ambakuki parannu tau, ia tomminjo sallang pa'bakuka laNapake Allata'ala ambakukko. 3Angngapa nakkulle nucini' limbu'bu' niaka lalang ri matanna parannu tau, mingka batu niaka lalang ri matannu tanucinikai? 4Antekamma lanukana ri parannu tau, ‘Mae kupasulukangko anjo limbu'bu' niaka lalang ri matannu,’ nania' batu lompo lalang ri matannu? 5E, munape'! Pasuluki rolong anjo batu niaka lalang ri matannu, nunampa akkulle accini' baji' ampasuluki anjo limbu'bu' niaka lalang ri matanna parannu tau.
6Teako assarei barang matangkasa' mange ri kongkonga, sollanna tena na'giling ri kau ambakkaiko. Tea tongko assarei mutiara mange ri bawia, sollanna tena naonjo'-onjokangi anjo mutiaraya.”
Appala', a'boya, siagang assuro sungke pakke'bu'
(Luk. 11:9-13)
7“Appalakko, nunisare. A'boyako, nunggappa. De'deki pakke'buka, nunisungkeang. 8Nasaba' inai-nai appala', iami lanisare; inai-nai a'boya, iami langgappa; siagang inai-nai ande'de' pakke'bu', iami lanisungkeang. 9Maka nia' se're tau toa assare batu punna appala' roti ana'na? 10Yareka assare ulara' punna appala' juku' ana'na? 11Manna antekamma ja'dala'nu mingka angngasseng tonjako assare apa-apa baji' mae ri ana'-ana'nu. La'biangampa pole Manggenu ri suruga, ma'nassa laNasarena apa baji' mae ri tau appalaka ri Ia.
12 #
Luk. 6:31
Gaukammi ri parannu tau apa nungaia lanagaukang parannu tau ri kalennu. Iaminjo hukkung napabattua Musa, siagang pangngajaranna na'bi-na'bia.”
Pakke'bu' seppaka
(Luk. 13:24)
13“Pakke'bu' seppaka nuolo antama, lanri luaraki oloang mangea ri kapanrakanga, kammayatompa lompoi pakke'bu'na, najaimo tau angngolo anjoreng. 14Mingka seppaki siagang sukkaraki pakke'bu' angngoloa mange ri katallassanga, nasike'de'ji tau angngolo anjoreng.”
Poko'-pokoka siagang rapponna
(Luk. 6:43-44)
15“Tutuko mae ri na'bi-na'bi palassua. Sanrapangi nicini' gimbala' ke'nanga, mingka sikontutojenna sanrapangi kongkong nye'nyereka lalang nyawana ke'nanga. 16Battu ri panggaukanna ke'nanga akkulle nuasseng nubatei. Takkulleai romang-romang akkatintinga a'rappo anggoro'; siagang takkulleai rompo'-rompo' akkatintinga a'rappo ara. 17Poko' copponga bajiki rapponna, napoko' dattuluka kodi rapponna. 18Takkulleai poko' copponga lakodi rapponna, kammayatompa poko' dattuluka takkulleai labaji' rapponna. 19#Mat. 3:10; Luk. 3:9 Nasikamma poko' tenaya nabaji' rapponna lanita'bangi nampa nitunu. 20#Mat. 12:33 Kammatommi anjo sikamma na'bi-na'bi palassua. Akkullei nuasseng nubatei battu ri panggaukanna.”
Teai poro bicara, mingka panggaukanga tojeng
(Luk. 13:25-27)
21“Tayangasenga tau akkioka ri Nakke angkana, ‘O, Batara, o, Batara,’ la'jari umma'Na Allata'ala; mingka iaji bawang tau anggaukangai ero'Na ManggeKu ri suruga. 22Punna narapi' sallang allonna niadeli taua, jai tau lakkiok-kio' ri Nakke angkana, ‘O, Batara, o, Batara, sai lalang arenTa tonji le'ba' kupabattu pappasanNa Allata'ala? Sai lalang arenTa tommi le'ba' kubongka setanga, anggaukangi gau' appakalannasaka?’ 23#Pam. 6:9 Mingka laKukana sallang appiali, ‘Tena le'bakako Kuasseng! A'lampa ngasengko anrinni ikau le'baka a'gau' ja'dala'!’ ”
Tau cara'deka siagang tau toloa ambangung balla'
(Luk. 6:47-49)
24“Jari, inai-nai ampilangngeri siagang anggaukangi kana-kana Kupangngajarranga, iami sanrapang tau cara'deka, ambangunga balla' irate ri tompo'na batu makassaka. 25Ri wattunna battu bosia siagang a'baya kammayatompa anging barubua antujui anjo ballaka takkulleai anra'ba, lanri kassaki pammentenganna irate ri batua.
26Na tau allangngerekai kana-kana Kupangngajarranga mingka tena nagaukangi, iami sanrapang tau toloa, ambangunga balla' irate ri tompo'na kassika. 27Ri wattunna battu bosia siagang a'baya kammayatompa anging barubua antujui anjo ballaka, anra'bami. Nateaimi sipato' sanna'na panra'na anjo ballaka!”
KakoasanNa Isa
28 #
Mrk. 1:22; Luk. 4:32 Le'ba'na Isa angngajara', teaimi sipato' lannasa'na ngaseng tau jaia allangngereki anjo apa Napangngajarranga. 29Lanri lompo sikali pangaruNa nilangngere' bateNa a'bicara. Tasangkammayai batena guru-guru agamana ke'nanga.
Currently Selected:
MATIUS 7: MAK
Highlight
Copy
Compare
Share
Want to have your highlights saved across all your devices? Sign up or sign in
@LAI, 1999
