PIRAUNG 4
4
Kaballassanna Yerusalem ri le'ba'namo runtung
1Bulaeng accillaka pi'lasa'mi tanja'na
batu-batu Balla'Na Allata'ala tassiara'mi ri aganga.
2Riolo ana'-ana' rungkana Kota Sion rapangi bulaeng tinggia anggaranna,
mingka anne kamma nipare' mami rapang uring butta bawang.
3Anrong kongkong romanga bawang nanapasusu ana'na,
mingka ummakKu tamaka palla'na rapang jangang-jangang unta niaka ri parang.
4Ana' lolona tena napasusui, sa'genna mate turere.
Appalaki kanre ana'-anaka mingka tena tau assarei.
5Ia ke'nanga angkasiaki kanre-kanre nyamanga,
siagang sannanga ri katallassanna,
anne kamma akkadangkang mami a'boya kanre ri pattambunganna loroa,
na mate cipuru' ri agang-aganga.
6 #
Pa'j. 19:24
Nihukkungi ummakKu
la'bi battallangngang na hukkunganna tu Sodom
le'baka sipakkida mataji bawang
naancuru' lalang limanNa Allata'ala na teai tete gau' rupatau.
7Riolo pamimping-pamimpinna ikambe ci'nongi
keboki kontu kapasa' matangkasaka.
Mingka kassaki na gassing,
akkamalei na tena garrinna.
8Mingka kamma-kamma anne tamakami le'lenna ke'nanga
ammonrang ri tangnga-tangngana aganga na taenamo nanirupa ri taua.
Toami bukkulenna anrokoki buku-bukunna,
rapangi kayu kalotoro' dudua.
9Sessai ke'nanga na mate palang-palang,
lanri tena sikalimo lanakanre;
ia matea lalang pa'bundukang,
la'bi upakkangngangi kala mate cipuruka.
10 #
Pao. 28:57; Yeh. 5:10 Tamaka heba'na anjo bala
antujuai ummakKu
sa'genna manna anrong baji' pa'maika
napallumi ana' kalenna untu' ambonei battanna.
11Napa'betteseki larroNa Batara
na Natunu Kota Sion sa'genna sillappara' buttaya.
12Battu ri sikontu karaenga siagang pandudu'na linoa
tena manna sitau tappa'
angkanaya anjo pakke'bu'-pakke'bu' lompona Yerusalem
lakkullei nipantamai ri musu.
13Mingka kajariang tojemmi anjo kammaya,
lanri dosana sikamma imanga siagang na'bia.
Le'baki napasolong cera'na
tau tenaya salana.
14Rapang tau buta antulakkangi aganga a'jappa
kammami anjo pamimping-pamimpinna kota Yerusalem.
Ra'masaki care-carena napakamma cera'
sa'genna tenamo tau ero' anseroi ke'nanga.
15Nakana taua, “Bellako anrinni!
Kau tau ra'masa' ngasengko, teako beroi ikambe!”
Jari a'lampami ke'nanga a'la'bang a'jappa battu ri se'reang bansa mange ri bansa maraenga,
mingka tena sikali tau ampa'biangi untu' ammantang tuli ri se'reang tampa'.
16Tenamo naNaparhatikangi Batara umma'Na;
Ia KalenNa ampasimbungi ke'nanga
ampa'jari tanianggara'mo imang-imanna;
tenamo angkamaseangi sikamma pamimpinga.
17Mangngammi matanna ikambe attayang
pannulung tenaya nabattu-battu.
Manrannuangi ikambe ri pannulunna senreang bansa,
mingka tenaya nakkulle assare apa-apa.
18Takkulleai ikambe assulu' ri aganga,
lanri tuli nijagaita ri musua.
A'reppese'mi a'jala'na ikambe
lanri angganna'mi allonna ikambe.
19Sanna' gassinna lari tau angngondanga ri kambe
la'bi gassing larina na jangang-jangang rajawalia.
Iratei ri moncong ke'nanga angngondangi ikambe,
na naruppai ikambe ri parang lompoa.
20Najakkalaki ke'nanga karaeng Napilea Batara,
tau napattoanga ikambe untu' lassare katallassang,
siagang akkullea anjagaiki' battu ri musua.
21He bansa Edom siagang Us, ammakkala' mako,
rannu mako lalang nukullena!
Balaya labattu tongi mae ri kau
na lanusolarri kalennu lanri nasa'ringko.
22Le'ba'mi najappai Sion hukkunganna
lanri dosa-dosa nagaukanga ke'nanga;
kamma-kamma anne tenamo nalaNibalang parekang ikambe ri Batara na tenamo kilaNierang pole
mange ri pammelakkanga.
Mingka ikau Edom, laNihukkungko ri Batara.
Lanisungkei sikamma dosa-dosanu.
Currently Selected:
PIRAUNG 4: MAK
Highlight
Copy
Compare
Share
Want to have your highlights saved across all your devices? Sign up or sign in
@LAI, 1999
