JABUR 91
91
E dhalem pangaobanna Allah
1Oreng se ngaop ka Se Mahatenggi,
ban anaong ka Se Mahakobasa,
2olle mator kantha reya ka PANGERAN,
“Junandalem se abilla sareng ngaobi abdidalem,
Guste Allah, abdidalem parcaja ka Junandalem.”
3Ba'na bakal epalopoda dhari babaja se ta' etangale'e oreng,
ban dhari panyaket se madhateng pate.
4Ba'na bakal ekepkebbana e baba'anna kalembangnga,
sopaja ba'na aman e dhalem naonganna;
kaestowanna akantha tameng se ngaobi ba'na.
5Ba'na ta' osa tako' ka babaja e bakto malem,
otabana serrangan dadagan e baja seyang;
6ja' tako' ka balai se dhateng e bakto petteng,
otabana pate se dhateng e tera'na are.
7Maske badha saebu se mate e erenganna ba'na,
sapolo ebu mate e sabingkerra ba'na,
tape ba'na ta' kera apa-rapa.
8Mon ba'na ngabas ka sakalenglengnga,
ba'na tanto nangale oreng jahat narema okomanna.
9Sabab ba'na la mele PANGERAN se epentae tolong kaangguy abilla ba'na,
Se Mahatenggi bi' ba'na egabay pangaoban.
10Daddi ba'na ta' kera ekenneng calaka',
bengkona ba'na ta' kera ekenneng pa-apa.
11 #
Mat. 4:6; Luk. 4:10 Allah tanto makon malaekadda ajaga ba'na,
kaangguy ngaobi ba'na mon ba'na entar dha' emma'a bai.
12 #
Mat. 4:6; Luk. 4:11 Bi' para malaekat jareya ba'na tanto ejungjung e pa'-dapa'na astana,
sopaja sokona ba'na ta' tatandhung ka bato.
13 #
Luk. 10:19
Olar ban macan bi' ba'na bakal elengka'ana,
macan galak ban olar se mandi opassa bakal edidda'a ban sokona.
14Dhabuna PANGERAN, “Oreng se taresna ka Sengko' bi' Sengko' epasalamedda,
se ngakone Sengko' eberri'ana pangaoban.
15Mon oreng jareya aserro ka Sengko',
bi' Sengko' esaodana;
e dhalem karekongan bi' Sengko' ebarengngana,
e dhalem babaja epalopoda, ban eberri'ana kahormadan.
16Bi' Sengko' eberri'ana omor lanjang
ban epasalamedda.”
Currently Selected:
JABUR 91: MAD
Highlight
Copy
Compare
Share
Want to have your highlights saved across all your devices? Sign up or sign in
