JABUR 22
22
Du'a e bakto sossa ban nyanyeyan pojiyan
1Kaangguy pamimpinna koor. Menorot nyanyeyan: Manjangan se eserser pajjar. Jaburra Daud.
2 #
Mat. 27:46; Mrk. 15:34 Guste Allah, Guste Allah,
aponapa abdidalem me' edinggallagi?
Abdidalem aserro, namong Junandalem paggun jau,
Junandalem ta' kasokan nolong.
3Abdidalem aserro e bakto seyang,
namong Junandalem ta' kasokan adhabu pa-ponapa.
Abdidalem adu'a e baja malem,
namong ate paggun ngalengsang.
4Namong Junandalem Rato Se Mahasocce,
se eji-poji oreng Isra'il.
5Bangatowa abdidalem ngarep partolongannepon Junandalem,
sareng Junandalem laju epasalamet.
6Bangatowa abdidalem aserro ka Junandalem, sareng Junandalem epalopot;
parcaja ka Junandalem, sareng Junandalem ta' epakoceba.
7Namong abdidalem ka'dhinto caceng, banne manossa,
eca'-koca'e, eya-seya oreng sabannya'na.
8 #
Mat. 27:39; Mrk. 15:29; Luk. 23:35 Sadaja se nengale abdidalem padha bi-nyebbi,
pek-kepeggan sambi nyambibi'.
9 #
Mat. 27:43
Reng-oreng gapaneka ngoca', “Dina me' olle ngandellagi PANGERAN,
me' olle epasalamet bi' PANGERAN,
mon PANGERAN kasokan ka aba'na!”
10Junandalem se makalowar abdidalem dhari tabu'epon ebu,
se maaman abdidalem e reba'annepon ebu.
11Ngabidi lahir ka dunnya abdidalem targantong ka Junandalem,
ngabidi egandhu' sareng ebu, Junandalem Allah abdidalem.
12Ja' majau dhari abdidalem, Guste, sabab babaja ampon semma',
sareng tadha' oreng se nolong.
13Abdidalem ekeppong moso, se akadi banteng saambalan,
akadi banteng alas dhari Basan.
14Colo'epon padha anganga,
akadi macan se agaung sareng nyeppa'a.
15Kakowadan abdidalem ampon tadha' akadi aeng se nompa ka tana;
lang-tolang locot dhari cacopona,
ate lejjar akadi lilin se ngalelle.
16Gerrungan abdidalem kerreng akadi belling,
jila nalket ka lak-ellagan.
Sareng Junandalem abdidalem edinggallagi e attassa abu,
akadi oreng se ampon mate.
17Abdidalem ekeppong reng-oreng jahat;
se ngaromo' akadi pate' sabannya'na,
nyangkarem nyebbit soko sareng tanang.
18Tolang abdidalem ekenneng bitong,
eabas eanggep gun-tenggun sareng moso.
19 #
Mat. 27:35; Mrk. 15:24; Luk. 23:34; Yah. 19:24 Kalambi abdidalem egi-bagi,
juba abdidalem elottre.
20Namong Junandalem, GUSTE, ngereng ja' majau,
ngereng duliyan tolong abdidalem,
sabab Junandalem kakowadan abdidalem.
21Palopottagi nyaba abdidalem dhari peddhang,
pasalamettagi abdidalem dhari cakarrepon pate'.
22Abdidalem ta' kengeng apa-ponapa,
pasalamettagi abdidalem dhari tandhu'epon banteng sareng dhari colo'epon macan.
23 #
Ibr. 2:12
Sadaja se elampa'agi Junandalem, sareng abdidalem ecareta'agiya ka tan-taretan abdidalem;
e dhalem papanggiyan sareng ommattepon Junandalem, abdidalem ji-mojiya asmaepon Junandalem.
24Tan-taretan se padha abakte ka ALLAH, mara poji Pangeran!
Para toronanna Yakub, mara agungngagi Salerana!
Para toronanna Isra'il, mara asojud ka Salerana!
25Sabab Pangeran ta' ya-nyeya oreng se tatendhes odhi'na,
ban ta' ngenthengngagi kasangsara'anna.
Salerana ta' mongkore oreng jareya,
tape meyarsa'agi serrona mon oreng jareya nyo'on tolong ka Salerana.
26E adha'epon kompolanna ommat abdidalem moji Junandalem,
lantaran sadaja se elampa'agi Junandalem.
E adha'epon ommat se abakte ka Junandalem,
abdidalem ngatorragi kurban se ampon ejanjiyagi sareng abdidalem.
27Oreng mesken bakal ngakana sampe' kennyang;
se ngadhep ka PANGERAN bakal mojiya Salerana.
Moga ba'na padha'a nyaman odhi'na salanjangnga!
28Sa-bangsa bakal padha'a enga' ka PANGERAN ban abali ka Salerana,
ku-suku bangsa bakal asojuda kabbi nyemba ka Salerana.
29Sabab PANGERAN reya se kobasa,
se marenta sa-bangsa.
30Oreng raja bakal asojuda kabbi e ajunanna,
manossa se ta' langgeng bakal asojuda kabbi nyemba ka Salerana.
31Angkadan-angkadan se bakal dhateng bakal abakteya ka PANGERAN,
Salerana bakal eberta'agiya ron-temoron.
32Ka bangsa se lahir jang budhiyan bakal ekabarragiya
ja' PANGERAN la masalamet ommadda.
Currently Selected:
JABUR 22: MAD
Highlight
Copy
Compare
Share
Want to have your highlights saved across all your devices? Sign up or sign in
