YouVersion Logo
Search Icon

KADADDIYAN 39

39
Yusup ban binena Potifar
1Bi' reng-oreng Isma'il Yusup egiba ka Messer, laju ejuwal ka Potifar, parwirana rato se daddi kapalana pangawalla karaton. 2#Car. 7:9 Yusup etolong bi' PANGERAN, daddi apa'a bai se elakone masthe ahasel. Yusup jareya apolong e compo'na lorana, oreng Messer gella'. 3Lorana nengale ja' Yusup jareya etolong bi' PANGERAN sampe' apa'a bai se elakone masthe ahasel. 4Daddi Yusup ekaleburi bi' Potifar, laju epadaddi pangladin pribadhina; Yusup edika'agi ngoros compo'na ban sakabbinna dhi'-andhi'na. 5Polana Yusup, molae dhari jareya PANGERAN aberkadi oreng Messer jareya ban sakabbinna dhi'-andhi'na se badha e dhalem bengkona tor e gal-teggalla. 6Bi' Potifar dhi'-andhi'na esoro oros ka Yusup kabbi, daddi Potifar ta' noro' mekkere pa-apa kajabana parkara dha'arra dibi'.
Yusup reya bagus robana ban manes cacana. 7Ta' saapa abidda se badha e jadhiya, laju ekaterrowe rajina Potifar; Yusup eajak tedhung apolong. 8Tape Yusup ta' endha', laju mator, “Nyo'ona sapora, Dinnaju, sadajana se badha e compo' ka'dhinto sareng guste Potifar eparcaja'agi ka abdina, kantos Potifar dibi' ta' noro' ngoros pa-ponapa. 9E ka'dhinto kakobasa'an abdina padha sareng kakobasa'anna guste Potifar. Tadha' barang se ta' eparcaja'agiya ka abdina kajabana panjennengngan. Kadi ponapa abdina se alakowa barang juba' kadi gapaneka sareng abadhi dusa ka Guste Allah?” 10Maske sabban are rajina Potifar terros nyacae, Yusup teptep ta' endha' eajak tedhung ban rajina lorana.
11Tape, e settong are, e bakto Yusup maso' ka dhalem roma alalakona, kabendherran la-kabula laenna tadha' e jadhiya kabbi. 12Rajina Potifar nyandhak jubana Yusup sambi adhabu, “Mara ja' tedhunga ban sengko'.” Tape Yusup ajeng-gujeng sampe' jubana locot, cekka' ka astana rajina Potifar, laju buru ka lowar, kalambina paggun badha e astana babine' jareya. 13E bakto rajina Potifar ngoladi ja' Yusup buru kalowar ban jubana cekka' e astana, 14laju ra'-era'an ka la-kabulana, “Abas reya'! Oreng Ibrani se egiba tang lake ka bengko reya ya-nyeya sengko' ban tang lake. Oreng Ibrani jareya maso' ka tang kamar, sengko' epaksa ekapolonga tedhung, tape sengko' atharat sakellarra. 15E bakto ngedhing sengko' atharat, oreng jareya laju buru ka lowar, jubana ceccer e tang seddi'an.”
16Jubana Yusup jareya bi' rajina Potifar gi' esaba' sampe' rakana rabu. 17Sagubarra Potifar, rajina duli notorragi careta jareya ka rakana, atorra, “Oreng Ibrani se egiba ba'na dha' enna' rowa maso' ka tang kamar sarta korang ajar ka sengko'. 18Tape e bakto sengko' atharat laju buru ka lowar, jubana ceccer e dhinna'.”
19Lorana Yusup talebat dukana. 20Yusup epakon tangkep laju epamaso' ka penjara, epapolong ban reng-oreng okoman laenna. 21#Car. 7:9 Tape Yusup ros-terrosan etolong tor eberkadi bi' PANGERAN, sampe' Yusup ekaleburi bi' kapalana penjara. 22Yusup epassrae ngoros reng-oreng okoman laenna, tor epassrae tanggung jawab parkara sakabbinna lalakon e penjara jareya. 23Daddi kapalana penjara jareya ta' osa ro'-noro' ngoros pa-apa se la epassra'agi ka Yusup, sabab Yusup etolonge PANGERAN sampe' apa'a bai se elakone ahasel kabbi.

Currently Selected:

KADADDIYAN 39: MAD

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy