NYANYIAN ANU TALASANGGO 5
5
Mo'ane
1Aku tinokamo i ale'ku, sindua'anku pangantinku.
Ilimu'kumo na mur tiba lampa-lampangku
potik tiba juu' nu uani'ku kinaankumo
inginumkumo na susu tiba uee nu anggurku.
To bou-boune
Pongkaanmo ka ponginumo to sanga-sangalungku.
Inummo sampe nu osaimo na sindua'anku.
Nyanyian ko opatnyo
Boune
2Aku i hoyotmo panyo kinyonyoangku madi' hoyot.
Hongo pe'e, sindua'anku nongkutetekmo tumban.
Mo'ane
Tuhea'akonmo mae na tumban langkoyang sindua'anku,
malapati'ku anu saja' o inau' nu kinyonyoangku;
Ubaku nohomemo nu dondu'ok,
bulu nu ubaku kahomo jinujuhan nu dondu'ok pihi-pihi.
Boune
3Baju'ku ingukatakonkumo;
pa' daagi' ahi' po ule' ku pusok?
Tengkengku binaso'ankumo
pa' daagi ahi' po ule' ku pohumimi'?
4I lantutukanmo na kinyonyoangku,
kalana sindua'anku nontoongimo pontoongian kunsi nu tumban.
5Sahingga no bulamo na aku,
kahanda' po ule' montuhea'akon tumban da minsoop mae na sindua'anku.
Mur jinumujumo lengkat aiya ilimangku tiba i kangkam nu limangku,
nohumpisimo pontoongian supat nu tumban.
6Tinuhea'akon-kumo na tumban da minsoop mae sindua'anku,
panyo ia nobalikmo ka'nambamo.
Talalo hondo ku indi na potataenyo;
iliongku na ia panyo madi' kino hasinnyo.
I lagangku na sanggonyo;
panyo ia madi' mae nontaami.
7Aku siningkabotanmo nu anu monjagai kota';
binobotanmo mae nu aha ka' nombelaimo mae aku, salendang
ku pinakisamo ingala nu aha.
8Balajanji'mo na belemiu to lalangkoyang nu Yerusalem,
poto'i hi ia saba' aku talalomo nongka'ima'i ia.
To bou-boune
9Pa' sindua'an nu beleyum na molingkudui sindua'an nu sangga'at,
o langkoyang anu talalo ahi' tingkai'on?
Pa' sindua'an nu beleyum na molingkudui sindua nu sangga'at,
sahingga beleyum nonsaimo kami balajanji'?
Boune
10Sindua'anku handa ka' tingkaion,
lebe molingkudui aha anu sampulu' na madala na mian.
11Ubaknyo mimbalu-balu' susumo mosoni', mosoni' anu madai' kogalo'nyo,
bulu nu ubaknyo kudengkeng ka' mule' mo itom, ko itomnyo mimbalu-balu' susumo papaa'.
12Matanyo mimbalu-balu' malapati' aita' mae i mata nu uee,
malapati' nindi'mo nu susu suha-suhang i biwi nu kolam.
13Gagisingnyo sumomo ale' nu lampa anu to noho-nohong,
biwinyo sumomo bunga bakung anu monjujuhakon mur anu madi' ko galo'nyo.
14Limanyo ma'ima' hondo ko sinsingnyo mosoni' ka' ko matanyo,
butongnyo mimbalu-balu' bese' nu gaja binunga-bungaan nu batu nilam.
15Tengkenyo sumomo ohi' mar-mar anu mopute',
anu ilatasan nu mosoni' anu madi' ko galo'nyo.
Tambong nu butongnyo sumomo ko ima'nyo nu bungkutnyo nu Libanon,
ka ko hosonnyo sumomo kau' aras.
16De ia motatae sanang hondo na mohongo,
iwi-iwi' na anu aijo' i butongnyo oka'ima'i.
Somo aijo'mo na sindua'anku ka' mule' anu mompahakona tiba aku,
o to lalangkoyang nu Yerusalem!
Currently Selected:
NYANYIAN ANU TALASANGGO 5: LAILOE
Highlight
Copy
Compare
Share
Want to have your highlights saved across all your devices? Sign up or sign in
