NYANYIAN ANU TALASANGGO 1
1
1 #
1Raj. 4:32
Nyanyian anu talasanggo tinulis i Salomo.
Nyanyian anu momonanyo
Boune
2Ooki mae na aku nu biwi nu beleyum.
Sindua'an nu beleyum lebe ma'ima' nu lingkudui na anggur!
3Beleyum talalo hondo manohong,
sanggo nu beleyum sumomo minya-minya' anu nobubusmo;
mokonyo aijo' to lalangkoyang monsindua'i beleyum.
4Sampamo lia-lia' na kita, o tomundo'ku,
boamo mae na aku i uno nu salipi' nu beleyum.
5Bakas mau mo'itom panyo aku handa o to lalangkoyang nu Yerusalem;
mo'itom susumo kemah nu aha mian nu Kedar,
panyo ma'ima' hondo susumo lalanse i laigan nu tomundo' Salomo!
6Boli montoa butongku mo'itom,
kalana aku saja' nu timpa'i nu singit.
To utu-utusku tu'a nontambuha'imo aku
ka' nompokaumo aku mokalaja i ale' nu anggur;
aku madi'mo kokasampatan na mongulus butongku.
7O sindua'anku poto'i mae,
iya mae na polaya'an nu beleyum domba haha aijo',
Iya mae na pompolukutan nu beleyum aha de malomo?
Toho' mule' na aku susumo mian anu lewa' mamba momoya
hi aha gombuan nu domba nu to sanga-sangalu nu beleyum?
Mo'ane
8Toho' mule' na beleyum monsumbu' tampatnyo,
o anu handa anu aijo' hi aha to bou-boune?
Batukimo na kalajangan nu gombuan nu domba,
ka' olaya' na to memee' nu beleyum koko pinombauan kemah nu anu molaya'.
9Sindua'anku, beleyum sumomo ajahan behenyo,
anu mohela' kareta i tomundo' Mesir.
10Gagising nu beleyum ma'ima' hondo atina' i olot nu palahiasan,
gogohong nu beleyum pinohandamo nu lante anu ko mainannyo.
11Beleyum binauanmo mami, palahiasan mosoni' ka' komainannyo salaka.
Boune
12Hau-haunyo tomundo'ku kiijo' ikamale'annyo,
nanohongmo na minya-minya' nu narwastuku.
13Sindua'anku sumomo mur na nohongnyo,
salatan ia natikalokosmo isaha'anku.
14Sindua'anku sumomo sampu'un na bunga-bunga pacar isinin na ale' i En-Gedi.
Mo'ane
15Beleyum handa hondo kukalibosi,
beleyum handa totu-totu'u.
Mata nu beleyum mimbalu-balu' malapati'.
Boune
16Beleyum handa hondo, kukanonongi,
totu-totu'u handa na beleyum.
Kahoyotanto i hemput anu molumba'.
17Ohi' nu laiganto kau' aras,
ka' lotengnyo kau' lontio'.
Currently Selected:
NYANYIAN ANU TALASANGGO 1: LAILOE
Highlight
Copy
Compare
Share
Want to have your highlights saved across all your devices? Sign up or sign in
