MAZMUR 115
115
Pompuji' Tumpu Anu Daka' na Kuasanyo
1Misa' kami, o Tumpu,
misa' kami,
panyo olamo ahi' Belento na tionyo o puji',
kalana Belento manonong ka' saja' mongkalibosi.
2Kadaka' iwi-iwi' na bansa motataemo,
“Iya mae na Tumpu nu aha?”
3Tumpu-nto kiita' mae i suluga',
Ia nombaumo apaa na anu tinanga'an-Nyomo.
4 #
Mzm. 135:15-18, Why. 9:20 Bapilogotan nu aha mosoni' ka' salaka na binau,
anu binau nu lima nu manusia.
5Aha ko nganga', panyo madi' moko ala motatae,
ko mata, panyo madi' moko ala montoa.
6Aha ko bihing, panyo madi' moko ala mohongo,
ko sung, panyo madi' moko ala mongook.
7Aha ko lima, panyo madi' moko ala mongkanyang,
ko tengke, panyo madi' moko ala lumajang, ka' madi' ko onyi' nu potatae mosabat lengkat mae i gogohongnyo.
8O' amalakon da sumo aijo'mo na uki' nu to mia-mian anu nombaumo sumo aijo'
ka' iwi-iwi' na mian anu pinalesayamo hi ia.
9O Israel, sabole-boleh Tumpu na otaha'imani,
Iamo na nontulungi ka' nonjagai belemiu.
10O to ima-imam, Tumpu na sabole-boleh otaha'imani
Iamo na nontulungi ka' nonjagai belemiu.
11O to mia-mian anu tulu-tulutan,
sabole-boleh Tumpu na otaha'imani,
Iamo na nontulungi ka' nonjagai belemiu.
12Tumpu monginau' kita ka' nu balakati na kita,
Nu balakati na mian nu Israel ka' iwi-iwi' na imam lee' i Harun.
13 #
Why. 11:18, 19:5 Nu balakati na to mia-mian anu tulu-tulutan,
mau anu daagi' ise' mae anu daka'mo.
14O' amalakon da Tumpu mombalakati mohumpak manjoo' na anak,
hi belemiu ka' hi lee' nu belemiu.
15O' amalakon da belemiu nubalakati nu Tumpu
anu nompotimbali langit ka' tano'!
16Langit samata-mata anu nu Tumpu,
panyo tano' binee'-Nyomo hi manusia.
17Tumpu madi' nu puji' nu mian anu i natemo,
nu mian anu nintatau'mo i tampat anu liing.
18Panyo kita anu daagi' tutuu' montalima kaseh hi Ia,
uuka aiya ka' sampe toka sidu-sidutu'.
O puji' na Tumpu!
Currently Selected:
MAZMUR 115: LAILOE
Highlight
Copy
Compare
Share
Want to have your highlights saved across all your devices? Sign up or sign in
