MAZMUR 111
111
Pompuji' Tumpu
1O puji' na Tumpu!
Totu-totu'u na kinyonyoangku montalima kaseh hi Tumpu
hau-haunyo kiijo' hi aha mian anu palesayamo hi Ia anu binalagombumo.
2Totu-totu'u okabangangi hondo na apa-apaa anu binaumo nu Tumpu,
pantasmo na oselidiki nu to mia-mian anu mongka'ima'i.
3Pakalaja'an nu Tumpu talasanggo hondo ka' talalo o puji',
ka'adilan-Nyo sampe toka sidu-sidutu'.
4Tumpu aijo' pangkalibosi ka' manonong hondo,
Ia nombaumo hahan anu okabangangi da kita sabole-boleh ahi' monginau'.
5Ia mombee'i anu okaan hi mian anu tulu-tulutan,
ka' saja' monginau' palajanjian-Nyo.
6Ia nompotoamo kuasa-Nyo hi mian anu palesayamo hi Ia,
ka' nombee'imo aha tano' pusaka nu to bansa-bansa.
7Tumpu adin ka' manonong i han apa-apaa nu anu Nubau,
iwi-iwi' na palentah-Nyo timbali otaha'imani.
8Atulan-Nyo opake sampe toka sidu-sidutu'
totu'u ka' adin na mompojalan.
9Ia nompobebasmo mian anu palesayamo hi Ia,
ka' nombaumo palajanjian anu sampe toka sidu-sidutu' tiba aha.
Iamo na Tumpu anu susi' ka' baani!
10 #
Ayb. 28:28, Ams. 1:7, 9:10 Ihe na mongkahanda'i da pande tionyo ahi' moholomati Tumpu.
Ia mompopangalati' mian iwi-iwi' anu tulu-tulutan.
O, puji' na Tumpu sansina-sinaa!
Currently Selected:
MAZMUR 111: LAILOE
Highlight
Copy
Compare
Share
Want to have your highlights saved across all your devices? Sign up or sign in
