MAZMUR 109
109
Do'a i uno nu kasusa'an
1Anu mongkapalai panyanyi, Mazmur i Daud.
O, Tumpu anu saja' ku puji',
boli ola tongo.
2Kalana aku tinumbuhanmo mae nu mian anu toto ide-idek na kinyonyoanyo ka' anu saja' mongakali
anu lewa' mombebakon sisi-sisik anu madi' totu'u mongkona aku.
3Aha lewa'mo montaloakon mae hi belengku potatae anu soa'nyo mongka'ideki mae,
ka' mompahampateakonmo mae aku mau madi' ko sababnyo.
4Aha montuuk mae aku mau mule' aku mongkalibosi aha,
ka' nondo'akonmo aha.
5Kanononganku nubalosakon mae nu aha nu palabuatan anu ma'idek,
ka' kalibosanku nubalosakon mae nu aha nu han mongka'ideki mae aku.
6Hangkatmo na samian anu ma'idek na kinyonyoanyo da momputusi ia,
bakas da ia nu kalaak nu anu monsampobali' ia.
7Bakas da ia oputusi ka' otantukan sinala'mo
ka' bakas da o'anggapmo dosa' na do'anyo.
8 #
Kis. 1:20
Bakas da kantumuu'annyo sampamo mingkot,
ka' pangkatnyo nu alamo nu mian sangga'at.
9Bakas da to ana-anaknyo unonmo madi'mo ko tuumanyo ka' tinanyo,
ka' bengkele'nyo balumo.
10Bakas da to ana-anaknyo lewa' mamba momoita hi mian iyaya mae
ka' olaa'mo da bolimo jojoong i laigannyo anu nohobo'mo aijo'.
11Bakas da iwi-iwi' na halata'nyo nu alamo nu mian anu montage samaya hi ia,
ka' hasin nu ia nalawe na nokalaja nu agoimo nu mian.
12Boli ko anu mongkanonongi ia,
kabai mongkalibosi to ana-anaknyo anu pinala'iannyomo.
13Bakas da iwi-iwi' na lee'nyo opateimo,
ka' sanggonyo nu kolilimimo nu tulunan anu aiya mae i ahop.
14Bakas da palabuatan anu ma'idek nu mompolee'nyo saja' nu inau' nu Tumpu,
ka' dosa' nu tinanyo madi' ohapusi.
15Bakas da dosa' nu aha saja' nu inau' nu Tumpu,
ka' madi'mo ko anu lewa' montutugi' aha i dunia.
16Kalana mian aijo' madi' toho' monginau'
mompotoa kalibosan.
Ia monsakisa mian kasiasi ka' anu sansala,
ka' nompateimo mian anu madi' mahoson.
17Ia sanang hondo na mongkutuki;
bakas da ia nukona nu kutuk!
Ia madi' sanang na mombalakati,
Bakas da ia madi' mohumpak balakat!
18De hi ia mongkutuki aijo' sa'angu' na palabuatan anu madi'mo okatalanggangakon,
pokakanamo sumo ia mompusok baju'nyo.
Bakas da kutuk aijo' na molabe-labesmo susumo uee aijo' i butongnyo,
ka' susumo lanya' minsoop i uno nu buku nu butongnyo iwi-iwi'.
19Bakas da kutuk aijo' na molupi' ia susumo baju',
ka' saja' mongkalekodi ia susumo pombutu'.
20O, Tumpu nabu'akonmo na hukuman aijo' hi mian anu montutuk mae aku,
hi aha anu motatae mae ma'idek hi belengku.
21Panyo tulungiakon mae na aku susumo anu jinanji'mo nu-Belento,
o, Tumpungku,
posalamatakon mae na aku kalana kanonongan ka' kalibosan nu Belento.
22Kalana aku kasiasi ka' sinansalamo,
ka' kinyonyoangku binelaonmo naleengmo hondo.
23Aku kinoboli' nolapusmo susumo, lolung de malomo,
aku kinokabahakonmo susumo kihi-kihi'.
24Ike-ike'ku i langkakatanmo kalana binapuasa'mo,
butongku talalomo hondo nagesuk.
25 #
Mat. 27:39, Mrk. 15:29 To mia-mian anu montoa mae aku, mongalu mae aku
ka' molilo-lilokakon ubak.
26Tulungiakon mae na aku, O Tumpungku,
posalamatakon mae na aku susumo kalibosan nu Belento.
27Sahingga nusumbu' nu sampobali'ku saba' aijo' palabuatan nu Belento,
saba' Belento, Tumpu na nombau han aijo'.
28Mau mule' aha mongkutuki mae aku,
o' amalakon da Belento mombalakati mae aku.
Mau mule' aha mongewa mae aku, aha saidi' mae opopo ambangje;
panyo o' amalakon, aku posaihon nu Belento, mohumpak kalame'an.
29Bakas da to mia-mian anu montutuk mae aku mohumpak anu moko ambang,
ka' han anu moko ambang aijo' monsaingkukubi aha susumo juba'.
30Aku mompuji'mo Tumpu nu potatae anu ku popodaka' hondo,
mombebakon Ia, hau-haunyo aku kiijo' hi aha mian anu binalagombumo.
31Kalana Ia montinjohi ka' momposalamat mian anu kasiasi
da boli mohumpak hukuman mate anu nu nabu'akon mae nu aha hi ia.
Currently Selected:
MAZMUR 109: LAILOE
Highlight
Copy
Compare
Share
Want to have your highlights saved across all your devices? Sign up or sign in
