AMSAL 26
26
1Susumo ujan i tempo' nu posinaa, ka' eis i tempo' nu masingit,
sumo aitu mule' mompuji' mian anu ponga' madi' pantas.
2Susumo tomonsi' lumahap, ka' ko laha-lahap aita ilanga
sumo aitu mule' pongkutuki madi' nu kona na mian anu madi' ko sala'nyo.
3Keledai tionyo ahi' opokonai tambangnyo, ajahan tionyo ahi' opohos,
sumo aitu mule' na mian anu ponga' tionyo ahi' odoke.
4Mian anu montaami pompokilawa nu mian anu ponga',
koponga'annyo pokakana mo sumo mian aijo'.
5Anu opokilawa nu ponga' tionyo ahi otaami nu pontaami anu ponga',
da nusumbu' nu anu nompokilawa taalu' ia madi' ahi' pande susumo anu nu sangka.
6Monsai samian na anu ponga' da pompakatuan lele,
pokakanamo sumo mosi pato'i tengke ka' molio silaka.
7Sumomo mian anu kapi' molajangakon tengkenyo,
sumo aijo'mo na mian anu ponga' montaeakon pokinde'.
8Mompuji' mian anu madi' ko anu nu pisumbu-sumbu',
sumomo monsegot batu dodo-dodo i sambatu katapel.
9Susumo anu lewa' malangu mongalinakon hii' i limanyo,
sumo aijomo na mian anu ponga' montaeakon pokinde'.
10Ihe na mompokalaja mian anu ponga' kabai tulu-tulumo mian
ola mompolugi' mian da'isan.
11 #
2Ptr. 2:22
Susumo dedeng po' ule' mompinsusule'i anu i lua'nyomo
sumo aitu mule' na mian anu ponga' po'ule' mule' mongulit kaponga'annyo.
12Mian anu ponga' hondo daagi' lebe ma'ima' nulingkudui
na mian anu monsangka butongnyo pande.
13Anu moluluk mongka'ima'i ola jojoong i laigan;
ia notatae “Daagi' ko singa i sambiha', dumo saidi' mae aku nu sa'u i tonga' nu jalan.”
14Susumo tumban lewa' tontoyong i hensennyo,
sumo aijo'mo na anu moluluk mombali-balikakon butongnyo i kamale'annyo.
15Daagi ko mian anu talalo hondo moluluk;
mompopakan kaanon inganga'nyo madi' mongka'oho'.
16Anu moluluk monsangka butongnyo lebe ko kapandean bapikin;
nu lingkudui na aha popitu' na mian anu montaami sahondo-hondonyo.
17Mian anu maninggalo' ipainggagan anu misa' ulusannyo;
sumomo mian anu mohakop dedeng maela ibihingnyo.
18-19Mian anu mongakali lantas motatae; “Aku ola ahi' basedu'” pokakanamo sumo mian anu ulawon mahaik nu toongon anu monsilakai.
20De kau' mingkotmo, matemo na apu;
de madi'mo ko anu lewa-lewa' monsisik lahasia, madi'mo suele daagi ko painggagan.
21Sumomo buhing tiba kau' mombau apu tataap moak;
sumo aitumo na mian anu mongka'ima'i painggagan momposida ka'ada'an.
22Pitana' aijo' o'oa'i matami' hondo;
mian mongka'oho' mongegat ia.
23Sumomo kuhon tano' osopu' nu salaka;
sumo atina'mo na mian anu ola matami' ipotatae, panyo kinyonyoa ma'idek.
24Anu saja' mongka'ima'i mongka'ideki mian potataenyo matami'
panyo kinyonyoanyo saja' mongakali.
25Mau mule' ia motatae ma'ima' boli mompalesaya;
kalana han mongka'ideki nongkuasaimo kinyonyoanyo.
26Mau mule' nu posuluk na han ia mongka'ideki;
iwi-iwi' na mian saidi' mae montoamo kalakuannyo anu ma'i-ma'idek.
27Ihe na mongkeke bolo' da bau panabu'an nu mian sangga'at
aijo' baumo panabu'annyo.
Ihe na molingginakon batu da nu kona na mian sangga'at,
posi ia na nu tuda' nu batu aijo'.
28Mombaleko'i mian sumomo mongka'ideki ia.
Potatae anu matami' monsaduakon kasilaka'an.
Currently Selected:
AMSAL 26: LAILOE
Highlight
Copy
Compare
Share
Want to have your highlights saved across all your devices? Sign up or sign in
