AMSAL 2
2
Gunanyo de ko kapandean bapikin
1Otalima na pangajalanku iwi-iwi', o anakku, ka' sabole-bole otutugi' na pokinde'ku iwi-iwi' hi beleyum. 2O intomakon apaa na kapandean bapikin ka' o usahakon da osumbu'. 3O anakku, o usahakon da ko pikilan anu matajom ka' opoita da timbali moko ala mangalati'. 4Olio na aijo' susumo molio mosoni', ka'ololoi' na aijo' susumo mololoi' halata' anu sulu-suluk. 5Tiba jalan anu sumo aijo' nusumbu'je nu beleyum apaa na alati'nyo mabuhuk hi Tumpu ka' beleyum mohumpakje ilimu' ihe na Tumpu Allah aijo'. 6Tumpu Allah na mombee'i kapandean bapikin; lengkat mae hi Ia na pohumpakan nu manusia ilimu' ka' timbali moko ala mangalati'. 7Kona hi mian anu hodi' na kinyonyoa-Nyo ka' anu madi' ko kasala'annyo, Nu tulungiakon ka' Nu jagai. 8Tumpu monjagai to mia-mian anu saja' adin, ka' monjagai aha anu mongka'ima'i Ia.
9De beleyum montuluti aku, o anakku, nusumbu'je nu beleyum apaa na aijo' adin, hodi' na kinyonyoa, ka' ma'ima'. Beleyum suele monsumbu'je mosia na beleyum mongatun kantumuu'an. 10Beleyum timbalimo pande ka' ilimu' nu beleyum momposanangmo kinyonyoa nu beleyum. 11Mangalati' ka' kapandean nu beleyum na monjagai beleyum, 12ka' montewa' beleyum da boli montiho kantumuu'an anu madi' ma'ima' ka' mule' mompojo'on butong nu beleyum da madi' nulelei nu to mia-mian anu saja' monsisik anu ma'idek. 13Aha madi'mo mongka' oho' montiho kantumuu'an anu ma'ima'; aha nongalamo jalan anu pintung ka' kahomo dosa'. 14Palabuatan anu ma'idek aijo'mo na pohumpakan nu aha kasanangan. 15Kinyonyoa nu aha tageo' ka' kantumuu'an nu aha madi' adin.
16Beleyum, o anakku, timbalimo monggagakon de pagalamo nu sale'i nu to bou-boune anu saja'mo masala', anu mongusahakonmo da monggoda beleyum nu potatae anu toto ima-ima'. 17Boune aijo' madi' tulu-tulutan hi langkai'nyo ka' nongkolilimimo anu jinanji'nyomo hi Tumpu Allah. 18De beleyum mamba i laigannyo aijo' alati'nyo beleyum mongahopimo kasilaka'an. Mamba mokiijo pokakanamo mamba i dunia nu mian anu sinilakamo. 19Mian anu nambamo hi ia, madi'mo toho' ko anu ninsusule' mae i jalan anu mompanjolongi kantumuu'an. 20Kalana aijo', o anakku, batukimo na sonto' nu mian anu talakana', ka' tumuu'mo mombatuki pongka'oho' nu Tumpu Allah. 21Kalana, mian anu tumuu' mombatuki pongka'oho' nu Tumpu Allah, aijo'mo na mian anu hodi' na kinyonyoanyo, ahamo na anu jojoong i lipu' anu jinanji'mo nu Tumpu. 22Panyo mian anu ma'idek na kinyonyoanyo ka' anu baladosa' nu alinmo nu Tumpu Allah i sambiha'nyo nu lipu' aijo', susumo hemput anu ogautmo i tano'.
Currently Selected:
AMSAL 2: LAILOE
Highlight
Copy
Compare
Share
Want to have your highlights saved across all your devices? Sign up or sign in
