AMSAL 1
1
Angga'nyo nu pokinde' iwi-iwi' i Salomo
1 #
1Raj. 4:32
Aiyamo na pokinde' iwi-iwi' i Salomo anak moo'ane i Daud, tomundo nu Israel. 2Anu nu kahanda'i aijo'mo montulungi mian da monsubu' mosia da timbali pande, ka' monsumbu' atulan nu kantumuu'an ka' mule' mompangalati'i apa-apaa na anu otaloakon anu ko alati'nyo maleeng. 3Pokinde' haha aijo' mompogulu' mosia na mian tumuu' ka' pande, hodi' na kinyonyoanyo, adin ka' totu'u. 4Mian anu madi' ko anu nu pisumbu-sumbu' nu ajan sahingga ko pikilan anu mangalati', ka' to oli-olitau tiba to lalangkoyang nu ajan da timbali mian anu pande ka' moko ala bapikin susumo anu motu'amo. 5Tiba pokinde' haha aijo' miana nu pande mompaka panjoo'mo na ilimu'nyo ka' mian anu nosikolahmo mohumpakmo to poki-pokinde' anu ma'ima'. 6Tiba jalan anu sumo aijo' aha moko alamo mompangalati'i apaa na anu ma'isa sinumbu' i uno nu pokinde' ka' mule' mompangalati'imo hahan anu tinaloakonmo nu mian anu pande ka' mule' palakala anu nu posampe mae nu aha.
Pokinde' hi to oli-olitau ka' hi to lalangkoyang
7 #
Ayb. 28:28, Mzm. 111:10, Ams. 9:10 Da mohumpak ilimu' anu sahondo-hondonyo momonanyo mian tionyo ahi' mongadati ka' mabuhuk hi Tumpu. Mian anu ponga' madi' mongangga'i kapandean bapikin ka' madi' mongka'oho' opogulu'.
8O intomakon apaa na anu pinoto'i nu tuuma ka' tina nu beleyum hi beleyum, anakku, 9kalana pangajalan nu aha haha aijo' montuangimo kalakuan nu beleyum sumomo pombunga-bungai ubak ka' olo' anu lebe mompohandamo ohup nu beleyum.
10De nupagala nusale'i nu mian baladosa' na beleyum o anakku, boli otuluti na aha anu pagalamo monsale'i. 11De bisuannyo aha motatae, “Imbo', da kita molio mian ka' obandahi na ia. Imbo' da osoba-sobanto o tumbuhintomo na mian anu madi' ko sala'nyo. 12Uuka ai ya aha tumuu' sanang ka' madi' masakit, panyo aha saidi' mae timbalimo susumo mian anu mompai silakamo. 13O alantomo na to bala-balang nu aha anu mahan na olinyo, da laiganto mobuke'mo nu to bala-balang anu opahuhuakon mae. 14Imbo', batuki mae! Saidi' mae anu otomangto obagintoje pokakana!”
15Boli mombatuki to mia-mian anu susumo aijo' o anakku! Boli osasuhi na aha. 16Aha madi' moko ala momohokot de ma'isa mombau anu ma'idek. Aha ko tanga'an da sampamo mompatei. 17Sadang pe'e tomonsi' madi' ahi' minsoop i uno nu bihan anu pinobi mo i ahop nu matanyo, 18panyo to mia-mian anu ma'idek na kinyo nyoanyo aijo' ola ahi' mompokona bihan da posi butong nu aha na nukona – bihan anu monsilakai aha. 19Memang mian anu molio anu okaan panyo olio nu kalakuan lewa' pagala mompakisa, posi nyawanyo je na bau pombayannyo.
Potatae nu kapandean bapikin
20 #
Ams. 8:1-3
Potombihing! Kapandean bapikin nolagamo i songko-songko na jalan ka' notataemo daka-daka' i lapangan! 21Ia noloboo'mo i sabatan daka' iwi-iwi' ka' i tampat-tampat anu lame':
22“O to mia-mian anu panggaga! Sampe toka hipian na kopinnyo na belemiu me saja' sumo aijo'. Hipianje na tempo'nyo belemiu madi'mo montee ilimu' ka' montulutimo pangajalan? 23Potombihing mae na aku de aku mompisala'imo beleyum sahingga ku poto'imo hi beleyum na isi nu kinyonyoangku ka' ku pogulu'mo na ilimu'ku. 24Belemiu i lagangkumo, panyo belemiu madi'mo montuluti ka' madi'mo mompajuli. 25Iwi-iwi' na pokinde'ku madi'mo opajuli nu belemiu ka' aku mompisala'i madi'mo otuluti nu belemiu. 26Kalana aijo', de belemiu silakamo ku koko joimo na belemiu. De belemiu mabuhukmo, ku alumo na belemiu. 27Ya, ku alumo na belemiu de belemiu bata-batamo ka' mongoa'imo kasansala'an kalana nutokaimo mae nu balaa' anu tokamae susumo tombusisi. 28Tokaje na tempo'nyo susumo aijo', belemiu molagaje aku panyo aku madi'mo mongkabot taami. Belemiu molioje aku iyaya mon panyo madi' okabot na aku. 29Belemiu sumomo mian anu madi' toho' nongka' ima'i da mohumpak ilimu' ka' madi' montuluti Tumpu. 30Belemiu madi' toho' nongka'oho' nontalima sinin na pokinde'ku kabai mompalahatikan apa-apaa na pinisala'anku. 31Kalana aijo', belemiu montalimaje balosnyo apa-apaa na anu binaumo nu belemiu ka' sinin na tanga'an nu belemiu anu ma'idek. 32Mian anu madi' ko anu nu pisumbu-sumbu' saidi' mae silakamo kalana madi' mompajuli aku, ka' mian ponga' saidi' mae mohopu'mo kalana madi' mompajuli aku. 33Panyo mian anu mompotombihing mae aku tumuu' ma'ima'. Ia tumuu' madi' ko anu mompoposia ka' madi' palalu mabuhuk.”
Currently Selected:
AMSAL 1: LAILOE
Highlight
Copy
Compare
Share
Want to have your highlights saved across all your devices? Sign up or sign in
