AYUB 24
24
1Kadaka' Tumpu Allah madi' nompotantu sinaa anu katokaannyo mae momputusi palakala,
da to mia-mian anu monsumbu'mo Ia mohumpak kaputusan anu adin?
2Daagi' ko mian anu nondensu'akomo pinontanda'i potempasan,
da tano'nyo ewamo.
Aha nombulingmo domba manjoo' hondo,
ka' pinosoopnyomo i pangkun nu domba nu aha.
3Keledai anu nu anak anu ingunonmo madi'mo ko tinanyo ka' tuumanyo, pinopalaihakonmo nu aha;
sapi' nu mian anu binalumo, ingalamo nu aha binau ponggadei.
4Madi' opobee' nu aha na mian anu kasiasi mohumpak anu memang ia ahi' na tumpunyo,
sahingga paya' naninsulukmo na miana nu kasiasi hondo.
5Jadi, mian anu kasiasi aijo' sumomo keledai anu ma'ela',
anu molio mongotot i tampat anu ko hemputnyo;
ola i tampat anu susumo aijo'
na daagi' ko anu nu otot nu to ana-anaknyo.
6Ale' nu mian paya' kinalajakonnyomo;
bua' nu anggur nu mian anu ma'idek na kinyonyoanyo tinipunyomo.
7Ia madi' ko sabut ka' baju',
da mamut na butongnyo de hoyotmo malom.
8Ia i humpismo nu ujan anu mabohos hondo kiita' mae ibungkutnyo,
lantas ninsondo'mo i batu anu daka'hondo da mingkong.
9Mian anu ma'idek na kinyonyoanyo nombotuanimo anak anu madi' mo ko tinanyo ka' tuumanyo,
ka' nongalamo bungamea' nu mian anu kasiasi anu ko samaya' hi ia.
10Mian anu kasiasi namba madi' nompusok baju';
ia no'ohopmo hau-haunyo daagi' aijo' i ale' mompadak gandum.
11Bua' nu zaitun binaunyo lanya', ka' bua' nu anggur binaunyo tinimbali'mo anu o'inum,
panyo ia i negotmo hondo.
12I sinin na kota' i hongomo na tano' nu mian anu toto ide-idek na kinyonyoanyo,
to mia-mian anu binelaonmo momoita tulung da opakuli'i,
panyo Tumpu Allah madi' mohongo do'a nu aha;
Ia madi' mompajuli aha.
13Daagi' ko to mia-mian anu madi' mongka'ima'i jingka ka' mule' ahi' nu ka'ideki,
aha madi' monsumbu-sumbu' ka' madi' mombatuki jalannyo.
14Daagi' subu-subu hondo mian anu topo patei nobulamo madi' mo ia i hoyot,
lantas mosabatmo mamba mompatei mian anu kasiasi hondo madi'mo ko apa-apaa,
ka' de ma'isa mopatas dodop subu,
ia daagi' lewa' monggogiap susumo mian anu montomang.
15Mian anu saja' masala' montanda'imo sinaa anu malia'mo malom,
kinukumbungnyomo na ohupnyo da mian madi' monsumbu' ia.
16Mian anu lewa' mombuling mongguili laigan tonga' bongi';
de sinaamo ia madi' manintoa i jingka ka' maninsulukmo.
17Hi ia de subumo nu kabuhuk hondo,
panyo anu talalo hondo pikat aijo' na nu ka'ima'i hondo.”
Zofar
18Lantas notataemo na i Zofar, “Mian anu ma'idek na kinyonyoanyo na'anjumo nu iyaba'.
Tano' halata'nyo kinutukanmo nu Tumpu Allah;
ale' nu anggurnyo i liingmo;
madi'mo daagi' ko anu nokalaja i kiijo'.
19Susumo eis noe'mo kalana tinimpa'anmo nu posinaa
sumo aitumo na mian anu binaladosa'mo minsoopmo mokiijo' i dunia nu mian anu sinilakamo.
20Tinanyo pe'e mongkolilimimo ia,
ka' sinin na ias nongkekedimo butongnyo.
Sanggonyo madi'mo lewa' o'inau';
ia pinateanmo susumo kau' anu notua'mo.
21Iwi-iwi' aijo' jinadimo kalana ia lewa'mo nonsansalai to balu-balu,
ka' talalo ahi' nonsigohi totina anu madi'mo ko anaknyo.
22Panyo kalana kakuasa'an nu Tumpu Allah pinotobala'nyomo na mian anu baani.
Tumpu Allah nohukumo, sahingga sinilakamo na mian anu palaganta.
23Tumpu Allah nombee'imo ia kantumuu'an anu ma'ima',
panyo sabole-bole saja' nu potomatakon.
24Ola sasaingoni' na ia tumuu' bilahi,
panyo lapas mae madi'mo daagi' ko kabilahian sampe toka sidu-sidutu'.
Ia mangkalualemo susumo hemput anu madi' ko kaliangannyo;
susumo tangkenyo nu pae anu pinadakmo i batangnyo.
25ihe na madi' mompototu'u han anu jinadimo aijo',
kabai monggagakon potataengku anu totu'u?”
Currently Selected:
AYUB 24: LAILOE
Highlight
Copy
Compare
Share
Want to have your highlights saved across all your devices? Sign up or sign in
