YAKOBUS 3
3
Jila' nu mian
1To Utu-utus! Boli manjoo' na anu mongka'oho' timbali gulu' atina' hi komiu. Osumbu' miu saba' kita anu timbalimo gulu' de oputusimo lebe o pekangi molingkudui mian sangga'at. 2Kita iwi-iwi' toto minsan mombau kasala'an. Panyo mian anu madi' toho' mombau kasala'an de ia motatae, ia mian anu ma'ima', anu moko ala mongkuasai iwi-iwi na butongnyo. 3De kita mompokona tambang i nganga' nu ajahan da ia montuluti pongka'oho'to, saba' kita timbali mongkamudi songko-songko na butong nu ajahan aijo'. 4Ka' mule' kapan na bau sonto'. Mau mule' kapan atina' sala' sa'angu' na han anu daka' ka' nuboa nu baleba' anu makansang, panyo ia o atun nu kamudi anu ise' hondo mombatuki pongka'oho' nu topo kamudi. 5Sumo aitu mule' na jila'to; mau mule' jila' aijo' ise', panyo ia timbali mombau butong buulon mongkona hahan anu toto daka-daka'.
Sobatutugi na alas palias na kodaka'nyo timbali mopapu nu apu anu ise' hondo! 6Jila' pokakanamo sumo apu. I butongto, ia timbali polengkatan nu ka'idekan anu mompolele ka'idekan i songko-songko na butongto. Sumo aitumo na apu anu molengkat mae i nalaka, ia montoyo'i songko-songko na kantumuu'anto. 7Iwi-iwi' na ngahan nu binatang pangahas, tomonsi', binatang jumolo, tiba ikan timbali oponyaam, ka' pinonyamo ahi' nu mian. 8Panyo jila' nu mian samian pe'e madi' moko ala momponyam. Jila' aijo' ma'idek ka' madi' opoko kuasaimo; buke' nu tua' anu mompatei. 9#Kej. 1:26 Kita mompake ia da bau pontaloakon talima kase hi Tumpu ka' Tuumanto, panyo mule' bau pongkutuki sangko mian, anu pinotimbalimo sumo butong nu Tumpu. 10Lengkat i nganga' anu sa'a-sa'angu'nyomo aijo' mosabat mae na potatae talima kase ka' mule' potatae mongkutuki. Sabenannyo madi' sumo aitu! 11Te daagi' ko mata nu uee anu molubatakon mae uee matawas ka' uee anu mapakat lengkat mae i matanyo anu sa'a-sa'angu'nyomo? 12Kau' ara, to Utu-utusku, madi' toho' mimbua' bua' nu zaitun, ka' kau' anggur madi' toho' mimbua' bua' nu ara. Mata nu uee mintimuson madi' toho' ahi' monsabatakon uee matawas.
Kapandean anu molengkat mae i kiita'
13De itina' hi komiu daagi' ko mian anu pande ka' manonong, tionyo ahi' anu ma'ima' aijo' nu potoa i uno nu kantumuu'annyo, ka' mombau ahi' hahan anu ma'ima', anu ososapi'i nu kinyonyoa madi' ko bubuun ka' pande. 14Panyo de komiu minsihip, mongka'ideki sangga'at, ka' mompentingkan posi butong, boli mombuulakon kapandean aijo', kalana tiba jalan anu sumo aijo' komiu monggeo-geo'akonmo lele anu nolengkat mae hi Tumpu. 15Kapandean anu sumo aijo' madi' nolengkat mae i suluga'. Ia nolengkat mae i dunia, nolengkat mae i napisu nu mian, ka' lengkat mae i setan! 16Iya na daagi' ko anu minsihip ka' tabiat mompentingkan posi butong, i kiijo' suele daagi' ko kahengge'an, ka' iwi-iwi na ngahan nu palabuatan anu ma'idek. 17Panyo mian anu daagi' ko kapandean anu nolengkat mae kiita' i bawo, ia na anu momona hondo lomas, lapas mule' mongka'ima'i dame, ma'ima' na kinyonyoa hi sangko mian, mohongo-hongo. Ia saja' mongkalibosi ka' kalakuannyo saja' ma'ima'. Ia madi' montinjohi sangga'at ka' madi' mimpula-pula. 18Memang ka'ima'an atina' bua' nu bine' nu dame anu sinau nu mian anu mongka'ima'i dame!
Currently Selected:
YAKOBUS 3: LAILOE
Highlight
Copy
Compare
Share
Want to have your highlights saved across all your devices? Sign up or sign in
