YESAYA 9
9
1 #
Mat. 4:15
Bansa anu jojoong i uno nu kapintungan
montoamo jingka lonsi-lonsinoan.
Anu jojoong nu lolungi nu kapatean
jiningkanmo nu sahaya anu majingka.
2 #
Mat. 4:16, Luk. 1:79 O, Tumpu binee'anmo nu Belento kabilahian na aha anu taha-tahahumo
Pinojadimo nu Belento na aha da lewa' nontaligalai.
Aha ilame'mo kalana kanonongan nu Belento.
Susumo mian anu binilahimo
tempo'nyo nomposihukmo anu pinadakmo
kabai nombagimo anu pinahuhuakon mae.
3Belento nongalinimo tanggungannyo anu maboat
ka' kau' anu simbu-simbu ibikoangnyo.
Belento nompatundu'mo bansa anu saja' monsakisa
anu lewa' mombee'i tanggungan toto boa-boat hi mian anu palesayamo hi Belento.
Pokakana susumo naipuan mae tempo'nyo Belento
nompatundu'mo suludadu nu aha Midian.
4Sapatu nu suludadu anu ginalupakanmo
ka' mule' baju' nu aha anu kahomo baso'
saidi' mae mingkotmo mo'angot nu apu.
5Samian na anak hampemo aiya hi kita;
kita binee'anmo samian na anak mo'ane.
Ia na saidi' mae timbali polaya'to.
Ia osanggohi:
“Anu pande na mombee'i Pokinde'i”, “Tumpu anu Baani”.
“Tuuma au tumuu' Sampe toka sidu-sidutu'”, “Tomundo' anu Mompodame”.
6Ia mompalentah salaku tomundo'
lee' mae i Daud,
kakuasa'annyo daka' hondo.
Lipu'nyo saja'mo dame ka' mohumpakmo kantumuu'an ma'ima';
pamalentahannyo montoongi atulan tiba ka'adilan mulai uuka aiya sampe toka sidu-sidutu'.
Tumpu Anu Daka' na Kuasanyo na tionyo mombau aijo'.
Tumpu nohukumo Israel
7 #
Luk. 1:32-33
Tumpu nonabu'akonmo hukuman hi aha kalaja'an Israel. 8Iwi-iwi' na bansa Israel tiba anu jojoong i Samaria saidi' mae monsumbu'je taalu' Tumpu ahi' na mombau aijo'. Uuka aiya aha binulonmo ka' kinobubuunmo. Aha notatae, 9“Laigan to daka-daka' anu batu na binau nohobo'mo, panyo kami po ule'mo mombau laigan toto daka-daka' anu bu'ou anu batu na obau. Kau' ara singkapmo tina'an, panyo obolosimo mami nu kau' cemara i Libanon anu ma'ima' hondo”.
10Tumpu noposinsumbu'mo sampobali' nu aha da mongewamo mae aha. 11Bansa Siria anu isasu kabete'an tiba bansa Filistin isasu kinsoban nongkuasaimo Israel. Panyo Tumpu daagi' tataap motambuha' ka' sabole-boleh ahi' mohukum.
12Bansa Israel ma'isa ahi' nompele-pele' mau aha ihukumo nu Tumpu Anu Daka' na Kuasanyo: aha ma'isa ahi' binalatobat hi Ia. 13Kalana aijo' i uno nu sansinaa Tumpu nohukumo to pola-polaya' nu aha Israel tiba aha mian da'isan. Kinolong-Nyomo ka' ingalin-Nyomo na ubaknyo tiba ikunyo. 14Ubaknyo aijo'mo to tu'a-tu'anyo ka' anu oholomati, ikuno aijo'mo to nabi-nabi anu nombee'i pangajalan anu madi' totu'u. 15To pola-polaya' nu bansa haha aijo' nombee'imo pangajalan anu madi' totu'u ka' nompokalangkabutmo mian da'isan. 16Bansa aijo' madi'mo pinalesaya hi Tumpu ka' mule' palalente, ka' iwi-iwi' na potatae nu aha madi'mo na'ima'. Kalana aijo' aha to oli-olitau mau pe'e samian madi' ko anu pinoluput nu Tumpu. Ia madi'mo nongkalibosi to balu-balu tiba anu madi'mo ko tuumanyo ka' tinanyo. Panyo Tumpu daagi' ahi' sabole-boleh motambuha' ka' sabole-boleh mohukum.
17Palabuatan ma'idek nu bansa aijo' nompapu'i susumo apu nompapui kuhat anu kohii'nyo. Moaknyo sumomo alas na notoyo' anu lewa'mo nonsipunakon tibuknyo. 18Tumpu Anu Daka' na Kuasanyo talalomo hondo notambuha' ka' hukuman anu Nu nabu'akon sumomo apu anu kino ilos-ilosmo ka' bansa aijo', aijo'mo na anu nu nu toyo'imo. Madi'mo daagi' kosamian na anu mongkalibosi utusnyo. 19Isongko-songko na lipu' aijo' mian mo agomo maumo pa' apaa na anu timbali okaan panyo madi' mongoa'i mobosu. Aitu pe'e to sanga-sangalu nu aha na kaanmo nu aha! 20Aha mian nu Manasye tiba aha mian nu Efraim mompaha tumbu-tumbuhimo lantas mosangalumo mongewa Yehuda. Panyo Tumpu daagi' ahi' tataap motambuha' ka' tataap mule' ahi monabu'akon hukuman.
Currently Selected:
YESAYA 9: LAILOE
Highlight
Copy
Compare
Share
Want to have your highlights saved across all your devices? Sign up or sign in
