YESAYA 51
51
Potatae anu bau pohase' Yerusalem
1Tumpu notatae; “Potombihing mae na Aku, o, belemiu anu mongka'ima'i de oposalamat,
ka' tokamo mae hi beleng-Ku momoita da otulungi.
Inau' na bungkutnyo nu batu anu pinanimpa'atanmo nu belemiu,
ka' pinongkekeanmo batu anu pipinongkekeanmo belemiu.
2Inau' na mompolee' nu belemiu
i Abraham, tiba i Sara anu nonompohampemo belemiu;
tempo'nyo Aku nolagamo i Abraham,
ia madi' kino anak;
lantas binalakatan-Kumo na ia ka' binee'an-Kumo manjoo' hondo na lee'nyo.
3O, Yerusalem, Aku mohase'mo beleyum,
ka' iwi-iwi' na anu jojoong itampat nu belemiu anu ihansunmo.
Sinin na padang tampat anu kinunmo,
Kupotimbalimo taman,
pokakana sumo Eden, taman-Ku anu molumba'
Ikiijo' mian lame'mo ka' mule' bilahimo
ka' lewa'mo manyanyi salaku bau pontalima kaseh.
4O, intomakon na potataeng-Ku, o, belemiu bansang-Ku,
potombihing mae na potataeng-Ku, o, mian anu palesayamo hi beleng-Ku.
Ku bee'imo pangajalan-Ku hi aha to bansa-bansa,
sinin na atulan-Ku monjingkaimo aha.
5Kasalamatan anu Ku bee'mo ingohanimo,
tempo'nyo nu kamanangan-Ku malia'mo mae toka.
Akumo ahi' na mompalentah to bansa-bansa.
Lipu' anu toto jo'o-jo'on saja'mo montanda'i Aku
ka' montaha'imanimo palabuatan-Ku anu daka' hondo.
6Tonto'i mokiita' na langit ka' toa na tano';
langit madi'mo otoa-toa susumo tibuk
ka' tano' luso'mo susumo baju' anu pininmo na saja' pinusok,
iwi-iwi' na anu monjojoongi silakamo susumo momot.
Panyo kasalamatan anu Ku bee'mo na tataap ahi' sampe toka sidu-sidutu',
ka' kamanangan-Ku na madi' ahi' kokamingkotannyo.
7Potombihing mae na Aku, o, bansang-Ku,
sinumbu'mo nu belemiu apaa na anu memang ahi' totu'u;
pangajalan-Ku tinonguna'mo i uno nu kinyonyoa nu beleyum.
Boli mabuhuk de belemiu nu kokojoi nu manusia
boli bata-bata de belemiu nu alu nu aha.
8Aha silakamo ka' mule' madi'mo otoa-toa,
pokakanamo susumo baju' anu nu kekedimo nu ane'
ka' hude bulu nu domba anu nu kekedimo nu atak.
Panyo kasalamatan anu Ku bee' nu tataap ahi' sampe toka sidu-sidutu',
ka' kamanangan-Ku na satataapnyo ahi' sampe molundu-lundu na tulunan.”
Bansa Israel nomoitamo da nu tulungi nu Tumpu
9Tinjomo mae o, Tumpu, ka' tulungi mae na kami,
posalamatakon mae na kami nu kuasa nu Belento,
Tinjomo mae susumo naipuan mae
tempo'nyo Belento nompohintutumo i Rahab
ka' nonjalo'mo ulo daka-daka' nu ambai aijo' sampe inate.
10Belento mule' ahi' na nompo'otimo ambai,
uee nu ndalangon anu maleeng hondo.
Belento nombaumo jalan montulu uee aijo
da to mia-miana nu oposalamatmo timbali motaap ikiijo'.
11Sahingga aha to mia-mian anu pinobebasmo nu Tumpu minsusule'mo mae
aha minsoopmo i Yerusalem ka' lewa'mo montaligalai
ohup nu aha balasahayamo kalana kalame'an anu madi'mo kokamingkotannyo.
Aha bilahimo ka' mule' lame'mo,
kaduka'an tiba pengeluhan imadi'anmo.
12Tumpu notatae,
“Akumo na mohase' belemiu.
Kadaka' beleyum mabuhukmo hi manusia anu madi' tumuu' batu,
hi manusia anu ingalinmo susumo hemput?
13Tetoho' mule' beleyum mongkolilimi Tumpu anu Nompotimbalimo beleyum
anu nombokamo langit ka' nompokokomo lananyo nu tano'?
Kadaka' beleyum sansina-sinaamo na mabuhuk hi kabaanian nu anu saja' monsansala
ka'kokahanda'mo mompatei?
Memang kabaanian nu aha aijo'
madi' mompoposia beleyum.
14Aha to mia-mian anu ihakopmo sampamo lia-lia' opobebas;
aha madi'mo daagi' kakulangan i anu okaan,
ka' madi'mo silaka ka' olamun.
15Kalana Akumo na Tumpu nu beleyum,
anu nongkembongmo ambai
sahingga bokonnyo nombuhokmo.
Anu Daka' na Kuasanyo aijo'mo sanggong-Ku.
16Akumo na nomboka langit
ka' nompokokomo lananyo nu tano'.
Aku notataemo hi Sion:
Beleyumo na mian anu palesayamo hi beleng-Ku;
Aku mombee'mo pangajalan-Ku hi beleyum
ka' monjagaimo beleyum nu kuasang-Ku.”
Kasansala'an nu Yerusalem mingkotmo
17 #
Why. 14:10, 16:19 Pobulamo, o, Yerusalem, pobulamo!
Hukuman anu inabu'akonmo nu Tumpu kalana tambuha'-Nyo
ingoa'anmo nu beleyum sampe iningkot.
18Anu atina' jojoong hi beleyum madi' ko anu nontaka aha,
anu atina' jojoong hi beleyum madi' ko anu nontuntuni aha.
19Beleyum nu tokaimo mae nu balaa' ohua' na ngahannyo;
kalana mahampate lipu' nu beleyum hansunmo
ka' layat nu beleyum silakamo nu ohop.
Madi'mo daagi' koanu mongkalibosi ka' mohase' beleyum.
20Isinin na puusnyo nu jalan
aha to mia-mian nu beleyum tombahangkangmo kalana madi'mo ko kahosonan
pokakanamo susumo jonga anu nu konamo nu so'o.
Aha kinonamo nu tambuha' nu Tumpu,
ka' sineganmo nu Tumpu nu beleyum.
21Potombihing mae o, belemiu to mia-mian anu sinansalamo
anu nahasasungonanmo susumo mian anu nalangumo!
22Sumo uuka na potatae nu Tumpu nu beleyum
Tumpu nu beleyum anu nontinjohimo belemiu,
“Kasansala'an anu binee'-Kumo kalana Aku notambuha'mo,
po ule'mo Ku ala da madi'mo nu kona na belemiu.
Aku madi'mo motambuha'
ka' belemiu madi'mo daagi' montanggung.
23Kasansala'an aijo' Ku bee'mo hi miana nu nonsansalamo beleyum,
anu toho'mo nompalentah belemiu nale' itano',
ka' nompahampeja'akonmo belemiu,
sumomo lapangnyo belemiu jalan anu saja' kajalanan.”
Currently Selected:
YESAYA 51: LAILOE
Highlight
Copy
Compare
Share
Want to have your highlights saved across all your devices? Sign up or sign in