YESAYA 48
48
Tumpu na balakuasa aiya mae i ahop
1Potombihing mae o, belemiu lee' i Yakub,
lee' mae i Yehuda anu nompakemo sanggo Israel,
beleyum notatae, tukooyum beleyum nongakuimo Tumpu nu Israel,
ka binasumpa'mo i uno nu sanggo nu Tumpu.
Panyo potatae nu beleyum aijo' madi' sahondo-hondonyo.
2Maumo sumo aijo' na beleyum mongakui totu-totu'u,
tukooyum, beleyum mian anu jojoong ikota' anu susi';
ka' memang ahi' beleyum montaha'imanimo Tumpu Israel
anu osa-osanggohi Tumpu Anu Daka na Kuasanyo.
3Tumpu notatae, “Potombihing mae o, Israel!
Apaa na anu jinadimo naipuan mae, pininmo na sola' pinoto'ing-Ku;
apa na anu pinoto'ing-Kumo monti-montiik ahi' Ku baumo
ka' Ku baumo ahi' salaku han anu timbali otoa.
4Ku sumbu' na beleyum panggaga ahi' hondo
madi' hondo mohongo-hongo.
5Sahingga naipuan pe'e mae polo'mo kinila-kilang-Ku;
ma'isa pe'e jinadi polo'mo kinila-kilang-Ku,
da beleyum bolimo motatae,
tukooyum aijo' palabuatan nu to pato-patong nu bapilogotan nu beleyum.
6Iwi-iwi' apa na anu pinoto'ing-Kumo anu jadi aiya mae i ahop, anu iho-ihongomo nu beleyum jinadimo;
beleyum tionyo ahi' mongakuimo taalu' potataeng-Ku aijo' memang ahi' totu'u.
Uuka aiya Ku poto'i mule' na hahan anu ma'isa toho' jinadi,
iwi-iwi na lahasia anu ma'isa sinumbu' nu beleyum.
7Uukaje aiya na Ku potimbali ka' misa' anu u'utu mae;
ma'isa toho' ihongo nu beleyum na han aijo',
da beleyum madi'mo daagi' moko ala motatae,
tukooyum polo'mo sinumbu' nu beleyum na aijo' iwi-iwi'.
8Ku sumbu' na beleyum madi' timbali opalesaya,
naipuan pe'e mae na beleyum tinalasanggomo mian anu palaganta.
Mokonyo aijo' madi' nu sumbu' nu beleyum,
mau santaa' pe'e na potatae, madi' ko anu tinoka ibihing nu beleyum.
9Aku nongintimo tambuha'-Ku
da sanggong-Ku talasanggo iyaya mae,
Aku nongintimo tambuha' aijo' hi beleyum
da beleyum boli osilakai.
10Aku nonguji'mo beleyum i uno nu apu kasansala'an
susumo salaka sinuangmo i uno nu apu.
11Aijo' binaung-Kumo kalana kapentingan-Ku,
kalana madi' Ku pojohok na sanggong-Ku ohumimi'i;
kaholomatan-Ku madi' Ku bagi maumo pa' hihe.”
I Kores aijo'mo na polaya' anu pinile'anmo nu Tumpu
12 #
Yes. 44:6, Why. 1:17, 22:13 Tumpu notatae, “Potombihing mae Israel, mian anu ilagang-Kumo,
Aku na tataap ahi' Tumpu nu beleyum
Akumo na anu momonanyo mae,
ka' Aku mule' na anu imihinyo mae.
13Limang-Kumo aiya na nompokoko lananyo nu tano'
ka' mule' nomboka aita' langa.
De bisuanyo Ku lagamo na sanggo nu aha
tokamo mae na aha malia-lia'.
14Sihukmo mae na belemiu iwi-iwi' ka' potombihingmo mae!
Aha aijo' to pilo-pilogot madi' ko anu nongkila-kila ahi'
mian anu pinile'an-Kumo montumbuhimo Babel;
ia mombaumo apaa na anu kinahanda'an-Kumo.
15Akumo na anu nompoto'imo ka' mule' anu nolagamo ia,
anu lewa'mo nompotiju' ia, sahingga ia ningkalianganmo.
16Tokamo mae oha-ohani hi beleng-Ku, ka' potombihing mae,
naipuan pe'e mae madi' pinohowining-Ku na nompoto'i;
ka' potataeng-Ku saja' ko bukutinyo na anu Ku bau.”
Tanga'an nu Tumpu hi mian anu palesayamo hi Ia
Uuka aiya Tumpu nonsaimo mae aku
ka' kuasanya-Nyo binee'-Nyomo mae hi belengku.
17Koonyo nu Tumpu nu Israel anu susi' anu Momposalamatmo beleyum,
“Akumo na Tumpu nu beleyum
anu nompogulu'mo hi beleyum apaa na anu mingguna hi beleyum,
ka' nompotiju'mo beeyum jalan anu tionyo ahi' otului.
18De bisuanyo beleyum mongintomakon ahi' palentang-Ku,
saba' kantumuu'an nu balayum ma'ima'mo susumo kaunyo anu madi'mo toho' mo'oti,
ka' mule' kadale'an nu beleyum sumomo bokon akaong i ambai,
anu madi' toho' belenti.
19Lee' nu beleyum timbalimo manjoo' susumo bone';
Aku na mompalakai aha sahingga madi' osilakai.”
20 #
Why. 18:4
Lako'mo popalai ka' bolimo jojoong i Babel,
ka' bebakonmo na lele aiya toka-toka iyaya mae.
Poto'imo ka' pontaligalaimo lame-lame':
“Tumpu nomposalamatmo posaihon-Nyo aha Israel!
21Maumo ahi' Ia nompotiju'mo aha nontulu mae padang tampat anu kinunmo,
aha madi' ahi' sinansala nu megot.
Tumpu nombiha'mo bungkutnyo nu batu ka' nompolubatmo mae uee,
lengkat mae aijo' ibatu pinolubat-Nyomo mae na uee bau kapalaluan nu aha.
22 #
Yes. 57:21
Madi' ko kasalamatan hi aha mian anu ma'idek na palabuatannyo,”
sumo aijo' na koo-Nyo nu Tumpu.
Currently Selected:
YESAYA 48: LAILOE
Highlight
Copy
Compare
Share
Want to have your highlights saved across all your devices? Sign up or sign in
