YESAYA 21
21
Babel tinoa ihansunmo
1Sumo uuka na potuunon mongkona Babel:
Sumo tombusisi' na pinolintup nontulu mae tampat padang anu mateges, sumo aijo'mo na balaa' toka mae lengkat ilipu' anu okabuhuk. 2Aku nontoamo han anu jinadimo ka' talalo ahi' okabuhuk; mongkona palabuatan anu talalo ahi' ma'idek ka' mule' lewa'mo nompatei.
Sampa lambanimo, belemiu suludadu nu Elam, tumbuhimo! O, belemiu suludadu nu Madai, sampamo tiku! Tumpu mompobelentimo iwi-iwi' na kasansala'an anu sinaduakon nu Babel.
3Anu tinoangku aijo' nompobingungmo hondo aku sampe aku madi'mo noko ala nontoa kabai nohongo. Aku nabuhukmo ka' mule' nasakitmo sumomo ahi' samian na boune anu kahanda'mo monganak. 4Kinyonyoangku madi'mo sinanang; ku oa'i na buhukmo ka' mule' aku ilakatnyomo. Pihi anu saja ku ina-inau' ola mule' ahi' nompopangada' mae kinyonyoangku.
5Aku nontoa mule' bau-bauon mongkakaan anu pinosadiamo; tampat kasuhangan nu anu tinaang pinosadiamo. Aha nongkaanmo ka' mule' nonginumo. Monti-montiik nohongomo palentah: “O, tosulu-suludadu anu toto tangka-tangkas na pangkatnyo! Posadiamo na kanta nu belemiu!”
6Lantas Tumpu notataemo hi belengku, “Lako pojoong samian na anu monjaga ka' palentah na ia da nu poto'i hi beleyum apaa na anu saidi' mae nutoa. 7De ia montoa gombuan nu suludadu anu monsake'i ajahan toka mae toto ua'aha, gombuan nu suludadu anu monsake'i keledai tiba unta, tionyo ahi' mian anu monjaga aijo' mompalahatikan totu-totu'u.”
8Lapas aijo' mian anu monjaga notatae, “O, Tuan, aku nonjagamo sansina-sinaa mau pihi mau sinaa.”
9 #
Why. 14:8, 18:2 Soba toa, aijo'mo na aha! Gombuan nu suludadu anu tinokamo mae toto ua-ua'aha mae. Lapas aijo' mian anu monjaga aijo' nompolelemo, “Babel pinatundu'mo! Iwi-iwi na patong nu nu sombah nu aha nohintutumo ka' notanatamo itano!”
10Bansaku Israel! Beleyum pinahampeja'akomo ka' lewa'mo ilanda'an sumomo batu nu gandum. Uuka aiya ku poto'imo hi beleyum lele ma'ima' anu ihongongkumo hi Tumpu Anu Daka' na Kuasanyo, Tumpu nu aha Israel.
Palakila'an apaa na anu jadi i Edom
11Sumo uuka na potuunon mongkona Edom.
Daagi' ko mian anu lewa' mae motatae daka-daka' hi belengku lengkat mae i Edom, “O, mian anu monjaga, daagi' pin na pihi uuka aiya? Daagi' sangkuka na jam mopatasje?”
12Tinaamanku, “Daagi' subu tokamo mae, panyo po ule' ahi' malom. De daagi' mompokilawa, yo po ule'je toka mae mompokilawa.”
Palakila'an apaa na anu jadi i Arab
13Sumo uuka na potuunon mongkona Arab;
O, belemiu mian nu Dedan, mian nu belemiu anu singkap mae nonsake'i unta binakemahmo itano' nu aha Arab anu kahomo kuhat. 14O, belemiu anu jojoong itano' nu aha Tema, po inumi uee na mian haha aijo' anu negotmo titinokamo mae hi belemiu, ka' mule' bee'i mongkaan na aha to mia-mian anu nalaimo mae. 15Kalana aha nopalaimo mae da madi' silaka nu bajak anu kineatmo, da madi' nukona nu pana' anu opeletakonmo, ka' mule' da madi' mahampate anu hau-haunyomo sinidamo na pahampatean.
16Lantas Tumpu notataemo hi belengku, “Pas daagi' sataun kakaya'an nu to tulu-tulunan nu bansa Kedar mingkotmo. 17Anu toto pande-pande na mompana' hi aha mian nu Kedar aijo'mo na mian anu toto babaani hondo. Panyo anu salamat na mian aijo' hi aha ola sangkiding. Aku, Tumpu Allah nu aha Israel notataemo.”
Currently Selected:
YESAYA 21: LAILOE
Highlight
Copy
Compare
Share
Want to have your highlights saved across all your devices? Sign up or sign in
