KAJADIAN 46
46
I Yakub ka' aha sa'anakan nambamo i Mesir
1I Yakub nompotoukamo iwi-iwi' na halata'nyo lantas nambamo. Tinoka i Bersyeba ia nonsombahkonmo koloban hi Tumpu Allah anu nunu sombah i Ishak tuumanyo. 2Salatan i nalomo ia nontoamo, Tumpu Allah notatae hi ia, “Yakub, Yakub!”
Tinaamannyo, “Apaa, Tumpu”.
3Ia notatae, “Aku Tumpu Allah, Tumpu Allah anu nunu sombah nu tuuma nu beleyum. Boli mabuhuk na mamba mokiijo' i Mesir. Ku potimbalije na lee' nu beleyum bansa anu daka' ikiijo' mae. 4Ku sangaluije na beleyum mokiijo' i Mesir, ka' po'ule' momboa mae lee' nu beleyum minsusule' mae i lipu' aiya. I Yusuf na montoa beleyum de tokamo na ukun nu beleyum.”
5Lantas nambamo na i Yakub nompala'i Bersyeba. To ana-anaknyo nomposake'mo tuuma nu aha tiba anak ka' bengkele' nu aha i kaleta anu pina-pinakatu mae i tomundo Mesir. 6#Kis. 7:15 Aha suele nomboa potuu'on ka' iwi-iwi' na halata' anu i humpak nu aha i Kana'an, lantas nambamo i Mesir. Binoa i Yakub iwi-iwi' na lee'nyo, aijo'mo 7iwi-iwi' na makumpunyo mo'ane ka' boune.
8To mia-mian anu minsoop sa'anakan i Yakub anu namba nombatuki nokiijo' i Mesir atina'mo: 9I Ruben anak tumpe; to ana-anaknyo: I Henokh, i Palu, i Hezron, ka' i Karmi. 10I Simeon; to ana-anaknyo: I Yemuel, i Yamin, i Ohad, i Yakhin, i Zohar ka' i Saul, anak nu bengkele'nyo i samian na boune nu Kana'an. 11I Lewi to ana-anaknyo: I Gerson, i Kehat ka' i Merari. 12I Yehuda to ana-anaknyo: I Syela, i Peres, ka' i Zerah, ka' mule' anak i Yehuda sangga'at, aitumo i Er ka' i Onan sini-sinilakamo i Kana'an. To ana-anak i Peres: I Hezron ka' i Hamul. 13I Isakhar to ana-anaknyo: I Tola, i Pua, i Ayub ka' i Simron. 14I Zebulon to ana-anaknyo: I Sered, i Elon ka' i Yahleel. 15Aha iwi-iwi' aijo'mo to ana-anak anu i hampe'akon i Lea anaknyo hi Yakub kiijo' mae i Mesopotamia, ka' sangga'at mule' anaknyo boune sanggonyo i Dina. Jadi iwi-iwi' na lee' i Yakub lengkat pe'e hi bengkele'nyo i Lea konjoo'nyo tolumpulu' ka' totolu' na mian.
16I Gad to ana-anaknyo: I Zifyon, i Hagi, i Syuni, i Ezbon, i Eri, i Arodi ka' i Areli. 17I Asyer to ana-anaknyo: I Yimna, i Yiswa, i Yiswi ka' i Beria tiba i Serah, utus boune nu aha. To ana-anak i Beria atina'mo i Heber ka' i Malkiel. 18Aha sampulu' ka' anom aijo' atina'mo na lee' i Yakub hi bengkele'nyo i Zilpa, i Zilpa aijo' posaihon boune anu binee'mo i Laban hi Lea, i Lea aijo' anak boune i Laban.
19I Rahel bengkele' i Yakub kino anak ua'aha, aijo'mo i Yusuf ka' i Benyamin. 20#Kej. 41:50-52 Kiijo' i Mesir i Yusuf nohumpak ohua' na anak, aijo'mo i Manasye ka' i Efraim anu i hampe'akon nu bengkele'nyo i Asnat, anak i Potifera anu montoongi imam kiijo' i Heliopolis. 21I Benyamin to ana-anaknyo: I Bela, i Bekher, i Asybel, i Gera, i Naaman, i Ehi, i Ros, i Mupim, i Hupim ka' i Ared. 22Aha sampulu' ka' opat na mian aijo'mo na lee' i Yakub hi bengkele'nyo i Rahel.
23Ka' mule' i Dan anaknyo i Husim. 24I Naftali to ana-anaknyo: I Yahzeel, i Guni, i Yezer, ka' i Syilem. 25Aha popi-popitu' aijo'mo na lee' i Yakub hi Bilha, posaihonnyo boune i Laban anu binee'nyomo hi Rahel anaknyo.
26Lee' mae i Yakub anu namba nokiijo' i Mesir iwi-iwi' konjoo'nyo anompulu ka' anom na mian, madi' minsoop na to moni-moniannyo. 27#Kis. 7:14 To ana-anak i Yusuf anu i hampe i Mesir ua'aha, sahingga sa'anakan i Yakub anu tinoka i Mesir iwi-iwi' konjoo'nyo pitumpulu' na mian.
I Yakub tiba aha sa'anakan kiijo' mae i Mesir
28I Yakub nonsai i Yehuda mamba imoona molaga i Yusuf da monsingkaboti tuumanyo kiijo' mae i Gosyen. Salatan aha tinokamo i Gosyen, 29i Yusuf sinumake'mo i kaletanyo da mompaha pia tiba tuumanyo ikiijo' mae. Salatan aha nompaha piamo, tinanggogolanmo i Yusuf na tuumanyo ka' pinin hondo na i humang. 30Notataemo na i Yakub hi Yusuf, “Uuka aiya aku sanangmo na silaka, kalana tinoangkumo na beleyum, ka' sinumbu'kumo taalu' beleyum daagi' tutuu'.”
31Lantas notataemo na i Yusuf hi to utu-utusnyo ka' hi to julu-julunyo sangga'at, “Aku tionyo ahi' mamba mompoto'i hi tomundo kalana to utu-utusku ka' iwi-iwi' na to julu-julungku anu jojoong i Kana'an tinokamo mae. 32Ku poto'ije saba' belemiu to pola-polaya' nu domba ka' sapi', ka' nomboamo mae to bina-binatang nu belemiu ka' iwi-iwi' apaa na anu nu belemiu. 33De i tomundo molaga belemiu ka' mompokilawa apaa na kalaja nu belemiu 34poto'i hi ia taalu' belemiu daagi' pe'e ise' nompotuu'mo to bina-binatang, susumo mompolee' nu belemiu. Tiba jalan anu sumo aijo' ia monsaimo komiu jojoong i da'erah Gosyen.” I Yusuf nompoto'i sumo aijo' kalana mian nu Mesir mongoa'i madi' pantas na aha mosangalu tiba to pola-polaya' binatang.
Currently Selected:
KAJADIAN 46: LAILOE
Highlight
Copy
Compare
Share
Want to have your highlights saved across all your devices? Sign up or sign in
