ESTER 2
2
I Ester tinimbalimo bengkele' nu tomundo
1Madi' pinin ilapas na aijo', maumo i tomundo madi'mo notambuha', panyo ia daagi' saja' nompotutugakon kalakuan i Wasti bengkele' nu tomundo aijo' ka' kaputusan anu pinokonamo hi ia. 2Kalana aijo' to mia-mian anu lewa' mompokinde'i ka' mompaha kona hondo tiba i tomundo nompoto'imo sumo uuka, “Lebe ma'ima' olioi to lalangkoyang anu handa na i Tomundo. 3Soba belento Tomundo mohangkat mian anu obee'i kalaja i songko-songko na propinsi nu kalaja'an aiya da molioi to lalangkoyang anu handa hondo lantas nuboa mae nu aha mo'uuka i laigan nu tomundo kajojoongan nu to bou-boune aiya i kota' Susan. I Hagai, anu binee'anmo kalaja samata-mata mongkapalai aha salaigan i tomundo anu kajo-kajojoongan nu to bou-boune; ia mongulus aha ka' lewa' mompalakai da handa. 4Lapas aijo' nu pile'ije nu Tomundo pa' iya na langkoyang anu talalo hondo oka'ima'i nu Tomundo, ka' iamo na bau bengkele' nu Tomundo' bau pombolosi i Wasti.”
I Tomundo nonsitujuimo anu sinale'nu aha aijo' ka' binaunyomo.
5I kota' Susan aijo' daagi' ko mian nu Yahudi sanggonyo i Mordekhai anak i Yair. Ia lee' mae nu aha Kis ka' Simei tulunan mae i Benyamin. 6#2Raj. 24:10-16, 2Taw. 36:10 I Mordekhai toho' i hakop ka binoamo i Babel tempo'nyo Yerusalem pinatundu'mo i Nebukadnezar, tomundo nu Babel. I Mordekhai mambamo pinojoong i Babel hingga-hinggat tiba i Yoyakin, tomundo nu Yehuda, ka' mule' nanjoo' na anu i hakop sangga'at ka' binoa. 7Ia daagi' ko tominsan, samian na langkoyang anu handa hondo ka' matimpo hondo na butongnyo, sanggonyo i Ester, panyo ponsangohi nu aha Ibrani i Hadasa. Tuuma ka' tinanyo i lantengmo lantas ia i hangkatmo binau anak i Mordekhai ka' pinotuu'nyomo susumo anaknyomo ahi'.
8Salatan palentah i tomundo binebakonmo, manjoo' na to lalangkoyang pinosihukmo kiijo' i Susan, ka' i Ester na suele sala'samian anu kiijo' hi aha aitu. Ia suele binoamo i laigan nu tomundo ka' pino'ongkomo hi Hagai kapala nu laigan nu tomundo anu bau-bau pompojoongan to bou-boune. 9I Hagai kinobanga-bangangmo na nontoa i Ester ka' sanang na montoa ia. Lia-lia' na ia sampa nompalakai langkoyang aijo' da timbali handa ka' kaanonnyo anu pinile'anmo aijo' na nu kaan. I Ester ilalinmo i tampat anu talalo hondo ma'ima'an anu aijo' i laigan nu tomundo bau-bau pompojoongan to bou-boune, ka' aha popitu' na langkoyang anu sipat hondo aijo' i laigan nu tomundo na binee'anmo kalaja montoa ka' mompalakai ia.
10Kalana pokinde' i Mordekhai, madi' nusisik i Ester na ia aijo' mian nu Yahudi. 11Sansina-sinaa na i Mordekhai lewa' Kolalajang i popasan nu laigan nu tomundo' anu bau-bau pompojoongan to bou-boune ka' lewa' mompokilawa pa' mosia na i Ester, boli-boli pa' ko apa-apaanyo.
12Kino atulanmo, to bou-boune opalakai da handa sataun na kopinnyo; anom na bitu'on lewa' osapui nu lanya' ogalo'i kamangian, ka' anom na bitu'on mule' lewa' osapui nu lanya' ogalo'i nu anu toto noho-nohong sangga'at. Lapas aijo' toto samian na langkoyang nohumpakmo gililan mangadap hi Tomundo Ahasyweros. 13De ihemo na langkoyang mangadap hi tomundo, ia nompusokmo baju' yayamo baju' anu nu ka'ima'i. 14Ia oboa hi i laigan kajo-kajojoongan i tomundo' de pihimo, ka' dodop ia oboamo i laigan sangga'at nu tomundo ka' nu palakaimo i Saasgas, mian anu binee'anmo kalaja samata-mata mompalakai to amba-ambahue' nu tomundo. Langkoyang aijo' madi'mo po'ule' mangadap hi tomundo, ia po'ule'je mangadap de kahanda'mo nulaga i tomundo ka' nusanggomo na sanggonyo.
15Jadi tinokamo na gililan i Ester mangadap hi tomundo. – i Ester anak i Abihael ka' mototominsan tiba i Mordekhai anu nohangkatmo salaku posi anaknyomo; i Ester nukabangangi hondo nu mian anu montoa ia. Tempo'nyo ia nambamo nangadap hi tomundo, i Ester nompusok baju' susumo anu pinoto'imo i Hagai anu mongkapalai laigan nu tomundo anu kajojoongan nu to bou-boune. 16Sumo aitu mule' i taun ko popitu'nyomo na i Ahasyweros nompalentah kakonamo i bitu'on kino sampulu'nyomo, aijo'mo i bitu'on Tebet. I Ester binoamo nangadap hi Tomundo Ahasyweros kiijo' i laigan nu tomundo kajo-kajojoongannyo. 17I Ester nomposanangmo hondo kinyonyoa ka' nompolame'mo hondo i tomundo, ilingkuduannyomo na to lalangkoyang sangga'at. Mokonyo aijo' talalo hondo nuka'ima'i i tomundo na ia. Sahingga pinosongko'mo i tomundo na songko' nu kalaja'an hi Ester ka' pinotimbalinyomo na ia Bengkele' nu tomundo nombolosakon i Wasti. 18Ilapas na aijo' i tomundo nombau mo bau-bauon anu daka' hondo salaku bau pompopodaka'nyo i Ester ka' nolaga tinaangnyomo na to mia-mian anu pangkat mokalaja ko hi ia ka' to pega-pegawenyo. Binebakonnyomo na sinaa anu madi'mo timbali mokalaja hi songko-songko na kalaja'an ka' nombagi-bagiakonmo palasen manjoo' hondo.
I Mordekhai nomposalamatmo nyawa i tomundo
19Tempo'nyo aitu i Mordekhai i hangkatmo i tomundo binau pegawe nupamalentah. 20I Ester ma'isa toho' nonsisik hi mian na ia aijo' mian nu Yahudi, kalana i Mordekhai na montewa'. I Ester mohongo-hongo hondo i Mordekhai susumo tempo'nyo ia daagi ise' ka' tempo'nyo ia pinotuu' nu tominsannyo aijo'.
21Daagi kinosansinaan tempo'nyo i Mordekhai hau-haunyo mokalaja ilaigan nu tomundo' ua aha na anu ko pangkatnyo anu ola samata-mata mokalaja monjaga sabatan nu salipi'ilaigan nu tomundo' ka' mohongo pa' apaa na anu pokauhakon nu tomundo' aijo'mo i Bigtan, tiba i Teres, nosangaja'mo kahanda' mompateimo i Tomundo' Ahasyweros kalana kinaidekanmo nu aha. 22Tanga'an nu aha aijo' sinumbu'mo i Mordekhai sahingga sampamo pinoto'inyo hi Ester. Sangkinihap na i Ester nonsisik hi tomundo apaa na anu sinumbu'mo i Mordekhai aijo'. 23Palakala aijo' pinalesamo, ka' inyata'mo taalu' memang totu'umo ahi' apaa na anu pinoto'imo aijo'. Ua-ua'aha na mian aijo' binee'anmo hukuman pinokalaya'. Apaa na anu jinadimo aijo' tinulismo i kitab sisikon nu kalaja'an, susumo apaa na anu pinalentahkonmo i tomundo.
Currently Selected:
ESTER 2: LAILOE
Highlight
Copy
Compare
Share
Want to have your highlights saved across all your devices? Sign up or sign in
