ESTER 1
1
I Tomundo' boune Wasti nolawanmo palentah i Tomundo' Ahasyweros
1-2 #
Ezr. 4:6
Kiijo' i Susan puso nu kota' Persia, i Ahasyweros na nompalentah salaku tomundo'. Kalaja'annyo 127 na propinsi, lengkat mae i India toka-toka i Sudan.
3I taun kototolu'nyomo na ia nompalentah, i Tomundo' Ahasyweros nombaumo bau-bauon anu daka' hondo, da molaga iwi-iwi' na anu ko pangkatnyo matangkas tiba to pega-pegawenyo. To tale-talenga' nu Persia tiba Media suele tinoka i bau-bauon aijo', sumo aijo' mule' to gubernur-gubernur tiba to mia-mian anu talasanggo na pangkatnyo kiijo' i propinsi. 4Inganom na bitu'on na kinopinnyo na i tomundo' lewa' nompotoa kakaya'annyo anu kiijo' ilaigan nu tomundo' ka' mule' ko ima'nyo ka' mule' katalasanggoan nu kalaja'annyo.
5Lapas aijo' i tomundo' nombaumo bau-bauon mule' ka nolaga na mian da'isan nu Susan mau anu kaya mau anu kasiasi. Bau-bauon aijo' sina'angu' na duminggu na kinopinnyo ka' binau isa'angu' na taman kiijo'koko laigan nu tomundo'. 6Popasan nu laigan nu tomundo' pinaha bunga-bunganmo nu gorden te hude katun anu buhitnyo mobilu' tiba mopute', pinutan nu kahohon lenan anu ma'ima' hondo ka' buhitnyo mingkamumu' ka' pinaha pokaitanmo to gala-galangnyo anu salaka na tinutuk anu pinaha posoopmo i ohi'batu anu mahan na olinyo. I patuunyo aijo' na pinaha pompo una'an iwi-iwi' na koi mosoni' tiba koi salaka ka' ilatasan na salo nu anu binunga-bungan nu pualam mopute', hablur momea', kilit nu mutiara anu jongkilaban tiba batu pirus anu mobilu'. 7I tomundo' nomposadiamo anggur manjoo' hondo anu tinatuakon i galas mosoni' anu monga-ngahan na buhitnyo. 8To mia-mian anu tinaang aijo' madi'mo ola inganggalan na nontawa'i anggur panyo memang pinagalamo lewa' tinawa'an da o inum. Pinalentahmo i tomundo' na to posa-posaihon anu aijo' ilaigan nu tomundo' da toto samian na anu ka nolaga aijo' osilolongani yayamo pa'apaa na anu nu ka'ima'i nu aha toto samian.
9Tempo'nyo aitu i Wasti, Bengkele' i tomundo, suele nombaumo bau-bauon ola ilaganyo to bou-boune anu kiijo' i laigan nu tomundo.
10I sinaa kino ipitunnyomo, i tomundo lewa'mo binatawa' sahingga ingoa'annyo i lame'mo hondo. Kalana aitu ilaganyomo na aha popitu' anu ko pangkatnyo da samata-mata momposadia ka' mongulus ia; aha aijo'mo i Mehunam, i Bizta, i Harbono, i Bigta, i Abagta, i Zetar, ka' i Karkas. 11Pinalentahnyo na aha aitu da mamba mompoboa mae i Wasti Bengkele'nyo ka' momposongko' mae songko' nu kalaja'an. Bengkele' nu tomundo aijo' handa hondo, i tomundo kahanda' mompotoa kahandanyo aijo' hi to mia-mian anu kopangkat matangkas ka' hi to mia-mian anu i laganyomo i bau-bauon aijo'. 12Panyo salatan posaihonnyo haha aijo' nompoto'imo palentah i tomundo hi Wasti Bengkele'nyo, bengkele'nyo aijo' madi' mongka'oho' toka mae sahingga i tomundo notambuha'mo hondo.
13I tomundo ko kabiasa'an momoita pikilan hi to mia-mian anu pande i Atulan ka' adat. Kalana aijo' ilaganyomo na to mia-mian anu lewa' mombee'i pokinde' ia anu monsumbu' hondo apaa na anu tionyo obau i palakala anu susumo aitu. 14To mia-mian anu lewa' mombee'i pokinde' sasaja' nulaga i tomundo aijo'mo: i Karsena, i Setar, i Admata, i Tarsis, i Meres, i Marsena ka' i Memukan. Aha mian anu singkap ko pangkatnyo kiijo' i Persia ka' i media anu ko pangkatnyo matangkas hondo i uno nu kalaja'an. 15Koonyo i tomundo hi aha popitu' haha aijo', “Aku nonsaimo to posa-posaihonku namba hi Wasti Bengkele'ku da mompoboa mae id toka mae hi belengku. Panyo ia madi' nongka'oho' mae. De koonyo nu atulan hukuman, apaa na anu tionyo pookonanto hi ia?”
16Jadi notataemo na i Memukam hi tomundo ka' hi to mia-mian anu toto tangka-tangkas na pangkatnyo, “Kalana han anu binaunyomo aijo', misa' ola i Tomundo na ingambanganmo i Wasti Bengkele' nu Belento. Panyo iwi-iwi' na anu kopangkat hi belento Tomundo ka' mule' batu-batu to momo'ane i kalaja'an aiya! 17Kalana anu binaumo nu Bengkele' nu Belento tomundo atina' tantu nusumbu'mo nu to bou-boune, jadi aha madi'mo mompajuli langkai' nu aha toto samian. Tantu koonyo nu aha i Tomundo toho'mo nompalentah i Wasti Bengkele'nyo da toka hi ia, panyo bengkele'nyo madi' nongka'oho' tinoka hi ia. 18Jadi de bisuannyo to bengke-bengkele' nu to mia-mian anu toto tangka-tangkas na pangkatnyo kiijo' i Persia ka' Media nohongo mae lele aitu, tantu sampamo nupoto'i nu aha hi langkai' nu aha toto samian. Ahennyo mae to bengke-bengkele' madi'mo mohongo-hongo langkai' nu aha sahingga to langka-langkai' nu aha montambuha'imo bengkele' nu aha. 19Kalana aitu, opoita mami da belento Tomundo sampa mongala kaputusan mongkona i Wasti Bengkele' nu Belento Tomundo. Kaputusan aijo' opotimbalimo atulan nu Persia ka' Media da madi'mo timbali obali'i. Lapas aijo' bee'mo na pangkat hi Wasti salaku bengkele' nu Belento hi boune sangga'at anu lebe ma'ima' nakinyonyoanyo molingkudui ia. 20De bisuannyo kaputusan nu belento Tomundo aijo' obebakonmo i songko-songko na kalaja'an anu daka' aiya, batu-batu bengkele' nu mian mongadatimo langkai'nyo, mau anu kaya kabai anu kasiasi.”
21Apaa na anu pinoitamo i Memukam aijo' sinitujuanmo i tomundo tiba to mia-mian anu toto tangka-tangkas na pangkatnyo, sahingga sampamo binau i tomundo' na kaputusan aijo'. 22Pinakatunyomo na sulat palentah hi iwi-iwi' na propinsi, kalaja'an ibasa' ka' tulisan nu propinsi haha aijo' toto sa'angu.
Currently Selected:
ESTER 1: LAILOE
Highlight
Copy
Compare
Share
Want to have your highlights saved across all your devices? Sign up or sign in
