EFESUS 6
6
To ana-anak tiba tuuma ka' tina
1 #
Kol. 3:20
To ana-anak! Salaku anu nombatukmo i Kristus, otuluti na tu'anyo miu kalana aijo'mo na anu patut obau. 2#Kel. 20:12, Ul. 5:16 “O'adati na tuuma miu ka' tina miu”, aijo'mo na palentah anu momona lengkat mae hi Tumpu ka' jinanji'mo, 3aijo'mo: “Da belemiu monta'up ka'ima'an ka' mantan na umun miu i dunia”.
4 #
Kol. 3:21
To Utu-utus anu timbalimo tuuma! Boli mompoposia to ana-anak miu, sahingga ma'idekanmo na kinyonyoa nu aha. Ola ahi' opidaka'i na aha nu atulan ka' pangajalan nu Tumpu.
Botuan tiba tuan
5 #
Kol. 3:22-25
To Utu-utus anu tinimbalimo posaihon! O hongo-hongo na palentah nu tuan miu anu i dunia aiya. Obau na aijo' nu kinyonyoa mongadati ka' mongadati totu-totu'u susumo anu obau miu hi Kristus. 6Boli mombau sumo aijo', ola de tempo'nyo komiu ojagai, ola da mohumpak pompuji' nu mian. Panyo tionyo ahi' obau miu na aijo' susumo posaihon i Kristus anu nontulutimo nu kinyonyoa totu-totu'u mosia na pongka'oho' nu Tumpu. 7Pakalaja'an anu obau miu salaku posaihon aijo' tionyo ahi' obau miu nu kinyonyoa lame' pokakanamo sumo Tumpu na o tuluti miu, misa' ola mian. 8Jaga saba' batu-batu mian, mau mule' botuan kabai mian bebas saidi' mae montalima pombalosi lengkat mae hi Tumpu mongkona hahan anu ma'ima' apaa na anu binaunyomo.
9 #
Ul. 10:17, Kol. 3:25, 4:1 To Utu-utus anu tinimbalimo tuan! Tionyo ahi' komiu montiho sumo aijo' suele kona hi to posa-posaihon. Boli talalo masigo. Jaga saba' komiu ka' to posa-posaihon miu haha aijo' hingga-hinggat daagi' ko sa'angu' na bagi tumpuan, aijo'mo Tumpu anu i suluga'. Ia madi' montoa ohup nu mian.
Pimuhuk nu Tumpu sukup hondo
10Ahennyo, pahoson ahi' na komiu nu kahosonan anu i humpak miu lengkat hi kuasa nu Tumpu, kalana komiu nosa'angu'mo tiba Ia. 11Pake iwi-iwi' na poguhaton nu mahampate anu sukup anu binee'mo nu Tumpu hi komiu, da komiu timbali moko ala totinjo mongewa kapandean nu to roh-roh anu mongakali lengkat i Ibilis. 12Kalana kita mahampate misa' mongewa mian, panyo mongewa kahosonan nu to setan-setan iwi-iwi' anu mongkuasaimo tempo' anu ma'idek aiya. Kita mongewa kahosonan nu to roh-roh ma'idek anu mongkuasai langa. 13Mokonyo aijo' tempo' uuka, pakemo iwi-iwi' na poguhaton mahampate anu sukup nu Tumpu, da sinaa anu ma'idek komiu moko ewa pontumbuhi mae nu sampo bali'. Ka' de lapasmo na komiu mahampate toka i mihinyo, komiu daagi' sabole-bole mahoson ka' baani.
14 #
Yes. 11:5, 59:17 Tionyo ahi' komiu saja' balajaga-jaga. Tulu-tulutan hi Tumpu opake salaku bau pombutu' nu kompong, ka' kahondoan nu kinyonyoa salaku bau baju' besak nu belemiu. 15#Yes. 52:7 Tionyo ahi' halala' na mompolele Lele Ma'ima' anu momboa ka'ima'an timbali bau sapatu miu. 16Saja' opake na kapalesaya'an miu hi Tumpu salaku toongon bau pompedas; tiba kapalesaya'an anu totu-totu'u sumo aijo' komiu timbali mompoho' mata nu pana' iwi-iwi' anu ko apunyo lengkat mae hi anu ma'idek. 17#Yes. 59:17 Ala na kasalamatan salaku songko' anu ko aja'nyo, ka' potatae nu Tumpu salaku bajak lengkat hi Roh nu Tumpu Allah. 18Bau na iwi-iwi' aijo' ka' balado'a salaku pompoita tulung hi Tumpu. Iwi-iwi' na kasampatan tionyo balado'a susumo anu pinotiju'mo nu Roh nu Tumpu hi komiu. Tionyo ahi' komiu saja' mogogau' ka' boli mangaku matundu'mo. Saja' odo'akon na mian iwi-iwi' anu palesayamo hi Tumpu. 19Ka' aku suele odo'akon mae da toka i tempo'nyo aku motatae, Tumpu mombee'i mae aku potatae anu sahondo-hondonyo. Ka' da aku baani moko ala mompoto'i lahasia nu Lele Ma'ima' aijo'. 20Kalana Lele Ma'ima' aijo', sahingga aku tinimbalimo mian anu sinai, ka' uuka aiya i unomo nu talungku'. Balado'a da aku baani na basisik montaeyakon Lele Ma'ima' aijo' anu sahondo-hondonyo ku taeyakon.
Puusnyomo nu salan do'a
21 #
Kis. 20:4, 2Tim. 4:12 #Kol. 4:7-8 I Tikhikus, utusto posaihon anu tulu-tulutan hondo mombau kalaja nu Tumpu, momposumbu'je hi belemiu iwi-iwi na apaa mongkona aku, da osumbu' miu na kantumuu'anku tiba kalajangku. 22Mokonyo aijo' aku nonsaimo ia namba hi belemiu da momposumbu' kantumuu'an mami hi belemiu iwi-iwi', da binan na kinyonyoa miu.
23O amalakon da Tumpu Tuumanto, tiba i Tumpu Yesus Kristus mombee'i jalan da jama'at iwi-iwi' mosa'angu' ka' mompaha kali-kalibosi ka' saja' palesaya hi Kristus. 24O amalakon da Tumpu mombalakati kita Utus iwi-iwi' anu mongkalibosi Tumpunto i Yesus Kristus, nu kalibosan anu madi' ko kapopoho'annyo.
Tabea' mami, I Paulus
Currently Selected:
EFESUS 6: LAILOE
Highlight
Copy
Compare
Share
Want to have your highlights saved across all your devices? Sign up or sign in
