ANU MOMPOLELE POTATAE NU TUMPU 5
5
1Bapikin pe'e atina'je ka' otaeakon ka' boli sampa malia-lia' balajanji' hi Tumpu. Ia kiita i suluga ka' mule' beleyum aiya i dunia jadi o unggali ahi' na potatae nu beleyum. 2Lebe ko pikilan bata-bata lebe mule' mongipi anu ma'idek. Lebe manjoo' na potatae lebe mule' montaeakon potatae anu madi' ko kaliangannyo. 3Jadi de beleyum balajanji' hi Tumpu tionyo ahi' sampa obau na anu jinanji'mo. Ia madi' mongka'ima'i mian anu sumo mian anu ponga'. Jadi otepati ahi' apaa na anu jinanji'mo nu beleyum. 4#Mzm. 66:13-14 Sahanyo boli balajanji' de madi' otepati na palajanjian aijo'. 5Boli potatae nu beleyum monsaduakonmo beleyum baladosa' sahingga beleyum talapakisa mompoto'i hi imam anu molayani Tumpu tukooyum beleyum sinangkalingamo na binalajanji'. Apaa na gunanyo nonsaduakonmo Tumpu nontambuha'imo beleyum sahingga ihansunan-Nyomo na hasin nu pakalajaan nu beleyum? 6Susumo mongipi manjoo' panyo aijo' madi' ko alati'nyo, sumo aijo' mule, manjoo' na potatae madi' ko gunanyo. Panyo okabuhuk ahi' na Tumpu.
Kantumuu'an aijo' madi' ko gunanyo
7De montoa polaya' mongkabisa'i mian anu kasiasi boli bangang, mongagoi hak nu aha ka' madi' mombee'i aha ka adilan. Toto samian na pegawenyo nu lindungi nu atasannyo ka' ua-ua aha aijo' na aha nu lindungi nu anu lebe matangkas na pangkatnyo.
8Ka' mule' kantumuu'an nu tomundo' suele ola montaha'imani hasin nu anu opadak.
9Mian anu ola mompoginapa' doi madi' toho' sukup na doinyo; mian anu mangoa ihalata' madi' toho' puas i ka untungan. Iwi-iwi' aijo' madi' ko gunanyo. 10Mompaka panjoo' na kakaya'an nu toto samian, mompaka panjoo' na mian sangga'at anu tionyo ahi' obee'i mongkaan. Madi' ko ka untungan nu tumpunyo ola nu sumbu' ia mian anu kaya. 11Samian na anu ola mongala tambo ugaat madi' sukup na anu nu kaan panyo maumo sumo aijo' ia timbali hoyot bobogon. Panyo mule' ahi' samian na mian anu kaya manjoo' na halata'nyo, sahingga ia amdi' moko ala hoyot kalana bata-bata.
12Aku nontoa i dunia aiya daagi ko apa-apaa na anu momposusa' kinyonyoa. Samian na anu montambun halata' da bau ponginau kakulangan. 13Panyo halata' aijo' ningkotmo kalana kasusa'an sahingga madi'mo daagi ko anu i nguna'akon hi to ana-anaknyo. 14Kita i hampeakon langgo-langgo' sumo aitu mule' de kita mompala'imo dunia aiya madi' momboa apa-apaa anu i humpak nu lawento. 15#Ayb. 1:21, Mzm. 49:18, 1Tim. 6:7 Aijo' totu-totu'u moko susa' hondo kinyonyoanto. Kita mamba sumomo tempo'nyo kita uuka aiya tinoka mae. Kita ola ahi' malawe na mololoi' mombun ka' apaa na hasinnyo? 16Hau-haunyo kita tutuu' kita maha kanyangan i uno nu pintung, kita bala susa-susa'mo bata-batamo, mongka'idekimo ka' mule' motambuha'mo.
17Sahingga nangalati'mo na aku taalu' anu talalo hondo ma'ima' hi kita aijo'mo mongkaan, monginum ka' mongoa'i hasin nu kalajanto i uno nu kantumuu'an anu binee'mo nu Tumpu hi kita; aijo'mo nasibto. 18De samian mohumpakmo kakaya'an tiba halata' lengkat mae hi Tumpu, ka' ia opobee' na molasai kakaya'an aijo', ia tionyo ahi' montalima kase na molasai hasin nu kalajanyo. Aijo' anu binee'mo nu Tumpu. 19Tumpu nongganapimo tanga'an nu kinyonyoa nu mian aijo' nu kalame'an sahingga ia madi'mo daagi bata-bata na mompopikilakon kantumuu'an anu ola sasaingoni' aiya.
Currently Selected:
ANU MOMPOLELE POTATAE NU TUMPU 5: LAILOE
Highlight
Copy
Compare
Share
Want to have your highlights saved across all your devices? Sign up or sign in
