ANU MOMPOLELE POTATAE NU TUMPU 1
1
1Iwi-iwi' na sisik i kitab aiya lengkat mae hi anu saja' Bapikin, anak mo'ane i Daud anu nombolosakon i Daud binau tomundo' i Yerusalem.
2Anu saja' Bapikin notatae; iwi-iwi' palasuma' madi' ko gunanyo! Kantumuu'an aijo' palasuma' iwi-iwi aijo' madi' ko alati'nyo. 3I uno nu kantumuu'anto kita mokalaja, mompao'i lisongu. Panyo iya na hasinnyo anu timbali okinti-kintiakonto? 4Tulunan sa'angu' tokamo mae ka' mule' tulunan sangga'at imadi'anmo, panyo dunia na sapulinyo ahi' tataap. 5Batu nu sinaa daagi'ahi' bete'mae ka' daagi' mule' ahi' makakinsap. Ia nongoa'imo lawe na ninsusule' itampatnyo momona, lantas bete' mule' ahi'. 6Mombun tobungmo mokiijo' sasu salatan, lantas mamba mule' sasu utara, ia mintombusisi'mo lantas po ule'mo minsusule'. 7Kaunyo iwi-iwi mo'ili mokaiyong i ambai, panyo ambai madi' ko kabuke'annyo. Ueenyo po ule' mule' minsusule' matanyo, lantas po ule' mule' mae mo'ili. 8Iwi-iwi' mongosaimo ka' kapa'osan madi'mo opoko ala otaeakon. Matanto aiya madi' ko kapobosuannyo na lewa' monjonohi, bihingto suele madi' kokapa'osannyo na mohongo. 9Apaa na anu toho'mo jinadi aijo' jadi mule'. Apaa na anu toho'mo binau aijo' obau mule'. Madi' ko sa'angu pe'e na anu salaje' omulai obau i dunia aiya. 10Daagi ko mian anu notatae, “Toa pe'e aiya na anu salaje' binau!” Panyo aijo' ma'isa pe'e kita ihampeakon polo-polo'mo daag. 11Apaa na anu jinadimo naipuan mae, madi'mo nu inau' nu mian. Sumo aitumo na kajadian tempo uuka aiya ka' mule' anu aiya mae i ahop madi'mo nu inau' nu mian imihinyo mae.
Anu toho'mo binau nu anu saja' Bapikin
12Aku anu saja' Bapikin nompalentahmo i Yerusalem susumo tomundo' nu Israel. 13Pinagala sinelidikanku ka' nonggulu'i ima-ima' apaa na anu jinadimo i dunia aiya.
Nasib anu pinosadiamo nu Tumpu Allah hi kita nonsaduakonmo da kinyonyoanto sinusa'mo hondo. 14Tinoangkumo iwi-iwi' na palabuatan nu mian i dunia aiya. Palesaya na uuka, iwi-iwi' aijo' madi' kogunanyo, sumomo mompagala mololoi' mombun. 15Anu tageo' madi'mo opoko ala opohodi' ka' mule' anu imadi'anmo madi'mo opoko ala olekeng.
16 #
1Raj. 4:29-31
Ku tutugi, “Aku aiya tinimbalimo anu o'angga'i ka' pinandemo majo'on na pompala'inyo nu kapandeanku de obandingakon hi iwi-iwi' na mian anu nompalentahmo i Yerusalem anu ma'isa pe'e kino akunyo. Manjoo' na anu ihumpaku na kapandean tiba ilimu'.” 17Pinagalangku sinumbu'ku na kapandean tiba kaponga'an pa' mosia na bedanyo ka' mule' kapandean mompopikilakon apa-apaa ka' mule' anu ponga' hondo. Panyo inyata' kuje taalu' aku aiya ola ahi' susumo mimbalu-balu' mololoi mombun. 18Saba' mompaka pintuang na kapandean bapikin, sumo aijo' mule' mompaka pintuangmo na bata-bata. Mompaka pintuang na kapandean, mompaka pintuang mule' na kasusa'anto.
Currently Selected:
ANU MOMPOLELE POTATAE NU TUMPU 1: LAILOE
Highlight
Copy
Compare
Share
Want to have your highlights saved across all your devices? Sign up or sign in
