Roma 14
14
Inioꞌkei mosalaꞌi halali hampepoꞌohimi ane hawaꞌi hibobali pahuami hante pahuara
1Uwaꞌ halali hampepoꞌohinte to handoaꞌi tene maroho pepoꞌohire. Hangangaa itorimokei moromiꞌ toaꞌ tiꞌo, kehapoꞌi pahuami mosisalaꞌ noniuꞌ hapo to biasa nowali. 2Rapaꞌna: toaꞌ to maroho pepoꞌohira, mangkahi mampopengaa pangka, angkana toaꞌ to mororangko pepoꞌohira, mangkaluhi terua alaꞌ motehuꞌhi mangka bauꞌ. 3Ingkei to mangka mampopengaa pangka, inioꞌkei mampokokeniꞌa awami to hawaꞌhi mangka bauꞌ. Hei ingkei to hawaꞌi mangka bauꞌ, inioꞌkei woꞌo mosalaꞌi awami to mangka mampopengaa pangka, alaꞌ Pueꞌ Ala mantorimomohi woꞌo awami tiꞌo mewali anaꞌNa. 4Himokeireꞌi horiana podehoꞌkei mosalaꞌi hawiꞌna toaꞌ ntaniꞌ? Ba moromiꞌ waliane ba hawaꞌi, tuana romo to mampokononto. Hei bateꞌna hingkiꞌ moromiꞌ waliane, alaꞌ Pueꞌ hadoduoNa to pobiaꞌ mampoꞌodaꞌhi hingkeꞌna uwaꞌ wuaꞌne pajamara.
5 #
Gal. 4:10; Kol. 2:16 Uwaꞌ woꞌo pandiri' to ntaniꞌna: uwaꞌhi toaꞌ to mantiꞌi uwaꞌ ando to nipeꞌoꞌuwaꞌ ka ando to ntaniꞌna. Angkana uwaꞌhi toaꞌ ntaniꞌna to mantiꞌi lekiꞌ-lekiꞌna ando hibobalilu. Hieꞌemo to paralu tobahaꞌ: hapolu to towali, hangangaa hintotoꞌ hante to topoꞌohi. 6Toaꞌ to moꞌadaꞌi ando to nopokononto, tiꞌo rowali hingkeꞌna mampokodeꞌhi Pueꞌ. Toaꞌ to mangka mampopengaa pangka, tiꞌo roꞌoka hingkeꞌna mampokodeꞌhi Pueꞌ, hei mombaha tungkaihare hatoꞌo alaꞌ mantiꞌihi woriꞌ komoromiꞌne Pueꞌ Ala. Hatoꞌo woꞌo toaꞌ to mangka pangka motuntuni paliara, mangkahi woꞌo hingkeꞌna mampokodeꞌhi Pueꞌ, hei mantiꞌihi woꞌo woriꞌ komoromiꞌne pe Io. Mewaliꞌ rolangkaꞌ walia hieꞌe moromiꞌ, 7alaꞌ ingkiꞌ to mepoꞌohi, hamboaꞌmoki tuwuꞌ hingkeꞌna motuntuniluki peleihanta hadoduo. Hawaꞌki woꞌo mahi motuntuni peleihanta hadoduo. 8Tuwuꞌ ba mahiki, hingkeꞌna moꞌadaꞌiki Pueꞌta, alaꞌ toaꞌNaki. 9Tungkaihana Kerisitu mahi hante tuwuꞌ huliꞌ, hingkeꞌna Io mewali Pueꞌ lekiꞌ-lekiꞌna toaꞌ, moromiꞌ to tuwuꞌ tene, moromiꞌ to mahimo.
10Mewaliꞌ, mahamporeꞌi hinaꞌ mosalaꞌikei halali hampepoꞌohimi?#14:10 Pueꞌ Alalu to wadi mosalaꞌi toaꞌ, alaꞌ Nobahaꞌ lekiꞌ-lekiꞌna. Basa 1Kor. 2:15; Yak. 4:12. Mahamporeꞌi woꞌo horiana mampononaꞌakei halali hampepoꞌohimi? Alaꞌ hingkiꞌ hupaꞌ tempone, lekiꞌ-lekiꞌta hingkiꞌ metotiꞌiki i hinarona Pueꞌ Ala hingkeꞌna Nobutusiki. 11I lali Suraꞌ Mangkolehi, Pueꞌ Ala mantiꞌi:
Tuꞌu mpololeke to kutiꞌi hieꞌe:
lekiꞌ-lekiꞌna toaꞌ hingkiꞌ melingkotuꞌ i hinarongKu,
hei lekiꞌ-lekiꞌna toaꞌ hingkiꞌ mopangakuꞌ koꞌAkuna Pueꞌ Ala. (Yes. 45:23)
12Mewaliꞌ, lekiꞌ-lekiꞌta hangangaa mampangakuꞌki walianta pe Pueꞌ Ala.
Inioꞌkei mowali walia to mampomonawuꞌ hangko awami
13Pueꞌ Ala hingkiꞌ mobutusi kara-karana lekiꞌ-lekiꞌna toaꞌ, iomo horiana kutiꞌikikei: inioꞌkei momesalaꞌi. Aginamo ikororomiꞌikei hingkeꞌna hawaꞌi uwaꞌ waliami to mampomonawuꞌ halali hampepoꞌohimi koꞌukoana madosahi ba to mampomolalo pekirira. 14Alaꞌ pohintuwuꞌku hante Pueꞌ Yesu, kubahaꞌ mpololeke kohawaꞌna uwaꞌ to nipelaraꞌki niꞌoka i peꞌoꞌelena Pueꞌ. Angkana ane uwaꞌ toaꞌ to mantiꞌi pangka to halangkaꞌ nipelaraꞌki, bateꞌna mpuꞌu io madosa ane noꞌokaꞌi. 15Hatoꞌo woꞌo, ane uwaꞌ pangka to nokopalia awami, angkana iꞌokakei i hinarona, ipomolalokei pekirine hei hawaꞌkei marima i awami. Mewaliꞌ inioꞌ ipomonawuꞌi pepoꞌohine awami alaꞌ pangka to iꞌoka. Alaꞌ awami tiꞌo, iomo halali hampepoꞌohimi to nosulewotai woꞌo Kerisitu ikomahina. 16Mewaliꞌ, ane uwaꞌ to irekeꞌkei moromiꞌ, hantaro mampomonawuꞌ pepoꞌohina awami, inioꞌ iwalikei, hingkeꞌna waliami tiꞌo hawaꞌi nosalaꞌi toaꞌ ntaniꞌna. 17Alaꞌ poparentana Pueꞌ Ala, handoꞌiolu noniuꞌ i pangka ba inua. Angkana noniuꞌ tuwuꞌ mampetuntui peleihana Pueꞌ Ala, hei tuwuꞌ i lali kotanaꞌ lali hei romiꞌ ngkotuwuꞌ; Lekiꞌ-lekiꞌna tiꞌo pepongkana ka Inohaꞌ Mangkolehi. 18Ane iwalikei hatoꞌo pe Kerisitu, hingkiꞌ nopomotanaꞌkei Pueꞌ Ala hei noꞌadaꞌikei awami.
19Iomo horiana hangangaa ipaliꞌkei lala hingkeꞌna mohintuwuꞌkei hante hangko awami, hei momepokaroho lalikei haduo hei haduo. 20Inioꞌ ipokarugiꞌ hapo to nowali Pueꞌ Ala i lalina toaꞌ alaꞌ iꞌokakei to rotiꞌi awami hawaꞌi wadi roꞌoka. Kotuꞌuana, hawaꞌi uwaꞌ pangka to nikopali, angkana hawaꞌi moromiꞌ ane ipomonawuꞌkei awami pe lali dosa alaꞌ hapo to iꞌokakei. 21Inioꞌkei mangka bauꞌ ba maꞌinu to melolanu, ba mowalikei hapolu to mampomonawuꞌ halali hampepoꞌohimi, horiana madosahi. 22Hinamo Pueꞌ Alalu hadoduona to pobahaꞌ waliami hintotoꞌ hante pepoꞌohimi. Morasiꞌhi toaꞌ to mowali hapo to moromiꞌ motuntuni pahuara, hei lalira hawaꞌi mosalaꞌi waliara. 23Angkana ane uwaꞌ toaꞌ to mororangko tene laline mangka bauꞌ ba pangka ntaniꞌna, hei koꞌukoana noꞌokalu, palaihana io madosa, alaꞌ to nowali tiꞌo hawaꞌi hibobali hante hapo to nopoꞌohi i lalina. Mewaliꞌ, ane towali hapo to hawaꞌi hibobali hante pepoꞌohinta, bateꞌna madosaki alaꞌ walianta tiꞌo.
Currently Selected:
Roma 14: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
