Wahiu 19
19
Komokerona Babeli ropotanaꞌ i suruga
1Uko tiꞌo, kuhori hibali loaꞌra toaꞌ to woriꞌ i suruga. Mololitahi ropokobue, rotiꞌi:
“Haleluia! Topokodeꞌmo Pueꞌ Ala!#19:1 Topokodeꞌmo Pueꞌ Ala I wiharo Yahudi: Haleluia.
Alaꞌ Io to mampaꞌaniki kotuwuꞌ to wolaꞌ.
Io to manobaꞌ tuwuꞌNa hei to makuasaꞌ.
2Topokodeꞌ Pueꞌ Ala alaꞌ pobutusiNa mononto hei maniuꞌ.
Nohukumo towoweꞌe to mekokomaꞌi mpololeke waliane,
alaꞌ nokomi waliana to hawaꞌi masipatoꞌ, duniaꞌ hieꞌe metuntu pe io.
Nohukumo towoweꞌe tiꞌo alaꞌ morokoꞌi rumbaꞌanahi Pueꞌ Ala.”
3Mololita womohi toaꞌ to woriꞌ ropokobue, rotiꞌi:
“Haleluia!
Oroꞌ ka api to mangka kota tiꞌo hingkiꞌ moneꞌ nturusi wute nantolou-louna.”
4Uko katoꞌo, to tuwuꞌ iba hei tadulako-tadulako to rompuluꞌ iba, melingkotuꞌmohi lekiꞌ-lekiꞌra i hinaro pahurahana Pueꞌ Ala, hei menombahi pe Io, rotiꞌi, “Amin! Haleluia!”
5Uko tiꞌo, kuhori womo loaꞌ to mololita ka pahura datu tiꞌo, notiꞌi:
“Topokodeꞌ Pueꞌ Ala Pueꞌta,
ingkei lekiꞌ-lekiꞌna to mewali rumbaꞌaNa!
Topokodeꞌmo, ingkei lekiꞌ to mengkoruꞌ pe Io,
mepongka to i wowoiꞌ tuwuꞌmi, wute-wute i to mokonaꞌ tuwuꞌmi!”
6Uko tiꞌo, kuhori woꞌo poloaꞌ-loaꞌre toaꞌ to woriꞌ. Poloaꞌra tiꞌo hibali peroruuna uwai to kodeꞌ, hei hibali monina boluntuꞌ. Kuhorihi mantiꞌi:
“Haleluia,
alaꞌ Pueꞌ Ala Pueꞌta to meliu kuasaꞌNa ka lekiꞌ-lekiꞌna,
moparentamo!
7Humeimoki molinga-linga i komotanaꞌ-tanaꞌ,
mampokodeꞌki konaꞌNa,
alaꞌ hupaꞌmo ando konipohamokone Anaꞌ Gimba
hei towoweꞌe to nipohamoko mampatimomomo wotana hingkiꞌ nipohamoko.#19:7 palaihana: toaꞌ to mepoꞌohi mampatimomohi lalira hingkeꞌna wadihi tuwuꞌ moꞌawa hante hi Yesu.
8Pueꞌ Ala mampatimomokiꞌi baduꞌ to malolunu,
to popuhiꞌ hei manakiꞌ.”
(Baduꞌna toaꞌ to mepoꞌohi tiꞌo, mopalaiha waliara toaꞌna Pueꞌ Ala to tuꞌu.)
9Uko katoꞌo, notiꞌikiꞌa malaꞌeka tiꞌo, “Iꞌukiꞌmo waheꞌe: Motanaꞌhi toaꞌ to niwowoi nolou pe posusaꞌa pepohamoko Anaꞌ Gimba.” Hei notiꞌi womo, “Hieꞌemo lolitane Pueꞌ Ala, hei bateꞌna tuꞌu.”
10Katoꞌo metumpapaꞌa i kapuꞌna malaꞌeka tiꞌo menombaꞌa pe io, angkana notiꞌikiꞌa, “Anioꞌko hatoꞌo! Inioꞌa ipenombai, alaꞌ aku hieꞌe rumbaꞌanaluꞌa woꞌo Pueꞌ Ala hibali hante ingko hante lekiꞌ-lekiꞌna halali hampepoꞌohimu to mampangakuꞌ kohiYesuna Pueꞌra. Bateꞌnalu Pueꞌ Ala to masipatoꞌ ipenombai, alaꞌ Inohaꞌna Pueꞌ Ala to mampaꞌani kuasaꞌ pe toaꞌ hingkeꞌna mampowuteki kohiYesuna Datu to Mamposalamaꞌ.”
To melambaꞌ i nara to popuhiꞌ
11Uko tiꞌo, kuꞌokiꞌ suruga teweaꞌ, hei kuꞌokiꞌ hambaꞌa nara to popuhiꞌ. To mampelambaꞌi nara tiꞌo, konaꞌNa “To nipoꞌohi hei to tuꞌu.” Mononto pobutusiNe, hei ane moponiꞌI, moponiꞌ i lali kototuꞌuana. 12Matana mewanta hibali api to makiꞌ mpololeke, hei i tutuꞌNa woriꞌ totali datu. I wotaNa teꞌukiꞌ konaꞌNe, hei Iolu to pobahaꞌ palaihana konaꞌ tiꞌo. 13Hei Io mopakeꞌ Juba to nilomiꞌ i lali raꞌa. KonaꞌNa iomo “Boona Pueꞌ Ala.” 14Woriꞌ surodadu ka suruga motuntuniꞌi melambaꞌhi nara mpopuhiꞌ hei mebaduꞌhi to malolunu hante popuhiꞌ mpololeke hei to motuntuniꞌI kamuri, mampelambaꞌi woꞌo nara to popuhiꞌ. Baduꞌra ka wida to malolunu, popuhiꞌ hei hawaꞌi mokomaꞌ. 15#Yes. 11:4; 49:2; Yoh. 12:47-50; Eps. 6:17; 2Tes. 2:8; Ibr. 4:12Ka lali omeꞌNa mesuwumo lolita to hibali hamato piho to motari. Hei lolitaNa tiꞌo hingkiꞌ monanihi lekiꞌ-lekiꞌna toaꞌ to kodake i duniaꞌ. Uko tiꞌo, hingkiꞌ Noparentahi hante lekiꞌna rohoNa, hawaꞌi uwaꞌ to pobiaꞌ moꞌewaꞌI. Io to hingkiꞌ mampetidoꞌki kobukotana Pueꞌ Ala to Makuasaꞌ, hibali to mopiꞌi wuaꞌ anggoroꞌ i lali popiꞌia anggoroꞌ. 16I jubaNa tinaꞌ i paꞌaNa teꞌukiꞌ woꞌo haꞌanu konaꞌ:
“Datu ka lekiꞌ-lekiꞌna datu,
Pueꞌ ka lekiꞌ-lekiꞌna pueꞌ.”
17Uko tiꞌo, kuꞌokiꞌ haduo malaꞌeka to metotiꞌi i womboꞌ ando. Malaꞌeka tiꞌo mowowoi lekiꞌ-lekiꞌna tinti to kodeꞌ to meloka-loka i raoha, notiꞌi nopokobue, “Humeimokei pe posusaꞌ ngkodeꞌ to nopoꞌuwaꞌ Pueꞌ Ala. 18Humeimokei mangka ohira lekiꞌ-lekiꞌna to mahi: ohina datu, ohina tadulako mpoponiꞌ, ohina tantara, ohina nara to ropakeꞌ moponiꞌ, hei ohina toaꞌ to melambaꞌ i nara, hei ohina lekiꞌ-lekiꞌna toaꞌ, mepongka to i wowoiꞌ tuwuꞌra, wute-wute i to mokonaꞌ tuwuꞌra, moromiꞌ to nipohawiꞌ tuwuꞌra, moromiꞌ to hawaꞌi nipohawiꞌ tuwuꞌra.”
19Uko tiꞌo, kuꞌokiꞌ womo pinatuwuꞌ to kodake, hante datu-datu i duniaꞌ hei lekiꞌ-lekiꞌna surodadura, morampuhi hingkeꞌna moꞌewahi To mampelambaꞌi nara to popuhiꞌ moꞌawa hante surodaduNa. 20Katoꞌo pinatuwuꞌ tiꞌo nihokiꞌ moꞌawa hante nabi to mepomonawuꞌ to mowalimo tanda-tanda to mepohele i hinarona pinatuwuꞌ tiꞌo. Hante to mepohele tiꞌo, Pinatuwuꞌ moꞌakalai toaꞌ to uwaꞌ tanda pinatuwuꞌ, hante toaꞌ-toaꞌ to menomba pe lentena pinatuwuꞌ tiꞌo. Katoꞌo pinatuwuꞌ tiꞌo hante nabi to mepomonawuꞌ tiꞌo nitube ntuwuꞌ pe lali tahiꞌ api belerang.#19:20 Tahiꞌ api belerang to makiꞌ mpololeke. Wadi woꞌo rotiꞌi Gehena ba naraka. Mat. 5:22, 10:28; Mrk. 9:43. 21Katoꞌo, To melambaꞌ i nara to popuhiꞌ morokoꞌ lekiꞌ-lekiꞌna surodaduna pinatuwuꞌ tiꞌo, Norokoꞌhi hante lolitaNa to mesuwu ka omeꞌNa hibali piho. Hei uko tiꞌo, mehupaꞌmohi mpuꞌu tinti, mangka ohi toaꞌ to nirokoꞌ wutehi wohu mpololeke.
Currently Selected:
Wahiu 19: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
