Markus 2
2
Hi Yesu mampokoꞌoriꞌ haduo tokohu
(Mat. 9:1-8; Luk. 5:17-26)
1Haꞌumbora ando uko tiꞌo, hi Yesu mahuliꞌ womo nolou pe bolaꞌ Kapenau. Tekarebamo koꞌuwaꞌne hi Yesu i lali tambi. 2Iomo horiana woriꞌ toaꞌ to mehupaꞌ, hei buhaꞌhi i lali tambi tiꞌo. Howeꞌ wambaꞌ tambi tiꞌo buhaꞌ woꞌo toaꞌ. Tempo tiꞌo, hi Yesu mampowutekihi pohawaꞌna Pueꞌ Ala. 3KolentuꞌaNa mololita, hupaꞌhi haꞌumbora duo toaꞌ mangkomi tokohu. Tokohu tiꞌo nokowaꞌ iba duo toaꞌ. 4Angkana hawaꞌi uwaꞌ lalare nolou mangkododungkui hi Yesu, alaꞌ tambi tiꞌo buhaꞌ mpololeke hante toaꞌ. Iomo horiana ropeponeꞌki nolou pe dopiꞌ tambi, hei rohungkaꞌ dopiꞌne to uwaꞌ hipononto hi Yesu, honiꞌi roꞌulu tokohu tiꞌo hante koturuana. 5IkoNoꞌokiꞌnalu hapo to rowali, nobahaꞌmo hi Yesu komarohone pepoꞌohira, Notiꞌi pe tokohu tiꞌo, “AnaꞌKu, teꞌampunimo dosama.”
6Uwaꞌhi woꞌo haꞌumbora duo guru agama toYahudi to mahura i lali tambi tiꞌo. Rotiꞌi i lalira, 7“Podehoꞌ mpololeke toaꞌ hieꞌe mampononaꞌa Pueꞌ Ala! Io mampariwoiꞌ Pueꞌ Ala. Hawaꞌi uwaꞌ haduo toaꞌ to wadi moꞌampuni dosa, bateꞌnalu Pueꞌ Ala.”
8Angkana i tempo tiꞌo kaliuꞌ nobahaꞌ hi Yesu hapo to uwaꞌ i lalira, iomo horiana Notiꞌikihi, “Mahamporeꞌi hinaꞌ hatoꞌo pampekirimi? 9Imboꞌina to mololihaꞌ, nitiꞌi, ‘Teꞌampunimo dosama,’ ba ‘peꞌaro, ilulumo aliꞌma, hei matengkaꞌmoko’? 10#Dan. 7:13-14Hinewowoꞌena hingkiꞌ Kupotongawakikei koꞌuwaꞌne kuasaꞌna Anaꞌ Manusiaꞌ moꞌampuni dosa i duniaꞌ.” 11Katoꞌo Notiꞌi pe tokohu tiꞌo, “Meꞌaromoko! Ilulumo aliꞌma, hei mahuliꞌmoko!”
12Meꞌaromo mpuꞌu tokohu tiꞌo, kaliuꞌ molulu aliꞌna, hei matengkaꞌ pe howali moliu i hinarona toaꞌ to woriꞌ. Koroꞌokiꞌnalu toaꞌ to woriꞌ hapo to pewali tiꞌo, ropolomenia hei mampokodeꞌhi Pueꞌ Ala, rotiꞌi, “Handoaꞌi tene kahampiha toꞌokiꞌ to waheꞌe!”
Hi Yesu mowowoi hi Lewi toperuruꞌ sima, mewali topeguruNa
(Mat. 9:9-13; Luk. 5:27-32)
13Uko tiꞌo, nolou womo hi Yesu hante topeguruNa pe bota rano Galilea. Woriꞌ mpololeke toaꞌ to hupaꞌ pe Io, hei Nopaguruhi. 14Kolentuꞌana hi Yesu matengkaꞌ, Io pangkiꞌ haduo toaꞌ to nikokeneꞌi hi Lewi#2:14 Hi Lewi Woraio to nitiꞌi woꞌo hi Matius. Basa Mat. 9:9. anaꞌna hi Alpeu. Hi Lewi tiꞌo mahura i kantoroꞌna, meruruꞌ sima hei nopantiꞌiki hi Yesu, “Metuntumoko pe Aku!” Katoꞌo metotiꞌimo hi Lewi metuntu pe Io.
15Uko tiꞌo, hi Yesu hante topeguruNa nolouhi pe tambina hi Lewi hei mangkahi moꞌawa-awa. Kolentuꞌara mangka, woriꞌhi toperuruꞌ sima hante toaꞌ ntaniꞌna to nirekeꞌhi toaꞌ to madosa mehupaꞌhi woꞌo hei mangkahi moꞌawa hante hi Yesu, alaꞌ woriꞌhi to metuntu pe Io. 16Uwaꞌhi itoꞌo haꞌumbora duo guru agama Yahudi to motuntuni poturuꞌra toParisi. Koroꞌokiꞌnalu guru agama tiꞌo hi Yesu mangka moꞌawa hante toperuruꞌ sima hei toaꞌ to nirekeꞌhi madosa, meꞌitanohi pe topeguruNa rotiꞌi, “Mahamporeꞌi gurumi hinaꞌ mangka moꞌawa hante toperuruꞌ sima hante toaꞌ to madosa?”
17Nohori hi Yesu lolitare, iomo horiana Notiꞌikihi, “Toaꞌ to hawaꞌi mohakiꞌ, hawaꞌhi moparaluꞌi sando. Toaꞌ to mohakiꞌlu moparaluꞌi sando. KohumeingKu hieꞌe hawaꞌA mowowoi toaꞌ to morekeꞌmo waliara moromiꞌ, angkana humeiꞌA mowowoi toaꞌ to madosa.”
Noniuꞌ paboki
(Mat. 9:14-17; Luk. 5:33-39)
18Hampiha tempo, topegurunahi hi Yohanes Toperiu hante toParisi kolentuꞌara maboki, uwaꞌhi toaꞌ to nolou meꞌitano pe hi Yesu, rotiꞌi, “Topegurunahi hi Yohanes Toperiu pokohi maboki. Hatoꞌo woꞌo topegurunahi toParisi. Mewaliꞌ, mahamporeꞌi topeguruMa hinaꞌ hawaꞌhi maboki?”
19Nohoniꞌhi hi Yesu moliu pandiriꞌ hieꞌe, Notiꞌi, “Ane uwaꞌi tene tomaꞌani to nipohamoko, hapo to rowali tolorine: mosusaꞌhi ba mabokihi? Bateꞌna hawaꞌhi maboki. 20Angkana hampiha tempo, tomaꞌani to nipohamoko tiꞌo hingkiꞌ niroa ka lumbura. Tempo tiꞌo honiꞌhi wae maboki.”
21Uko tiꞌo, hi Yesu mampowute womo pandiriꞌ, Notiꞌi, “Hawaꞌi uwaꞌ haduo toaꞌ to modampelei baduꞌ to hohai hante wida to wolaꞌ, alaꞌ wida to wolaꞌ tiꞌo hingkiꞌ mengkuruꞌ, mampomohepaꞌ baduꞌ to hohai tiꞌo, koꞌukoana kokorobaa-robaa hepaꞌne. 22Hatoꞌo woꞌo, hawaꞌi uwaꞌ toaꞌ to mantula anggoroꞌ to wolaꞌ i pebolaꞌana#2:22 hampiha pebolaꞌa anggoroꞌ niwali ka koliꞌ pinatuwuꞌ. to hohaimo. Anggoroꞌ to wolaꞌ bateꞌna hingkiꞌ mampomohepaꞌ pebolaꞌana to hohai hei hibobo angoroꞌne. Mewaliꞌ, anggoroꞌ to wolaꞌ hangangaa nitula i pebolaꞌana to wolaꞌ.”
Topeguruna hi Yesu majama i ando penombaha
(Mat. 12:1-8; Luk. 6:1-5)
23Hampiha tempo i ando penombahana toYahudi, hi Yesu hante topeguruNa moliuhi i halimboꞌ kineteꞌ. Kolentuꞌara moliu i kineteꞌ tiꞌo, topeguruNa mokoti wuaꞌ gandum hei roꞌoka. 24ToParisi to uwaꞌ itoꞌo meꞌitanohi pe hi Yesu, rotiꞌi, “Mahamporeꞌi topeguruMa hinaꞌ molungkaꞌihi atura agamanta? Majamahi i ando penombaha, alaꞌ mokotihi wuaꞌ gandum!”
25 #
1Sem. 21:1-6
Notiꞌi hi Yesu, “Kutiꞌikae kaꞌibasamokei pohawaꞌne Pueꞌ noniuꞌ hapo to nowali datu Daudi hante awanahi hampiha i tempora bilora! 26I tempona hi Abiata mewali Tadulako Mpenomba ngkodeꞌ, hi Daudi mekahi pe lali Bambaruꞌ Penombaha#2:26 bambaruꞌ penombahatiꞌo to ropakeꞌ menomba ikohandoaꞌana tene datu Salomo moꞌaro Tambina Pueꞌ Ala., katoꞌo mangka roti to nipopenombamo pe Pueꞌ Ala, hei nopepaꞌaniki woꞌo pe topetuntunahi, hantaro to wadi mangka roti tiꞌo iomo tadulako mpenombaluhi.” 27#Pwl. 2:2-3; Kel. 20:8-11; 23:12; Ul. 5:12-15Uko tiꞌo, notiꞌi womo hi Yesu, “Pueꞌ Ala hawaꞌi mowali ando penombaha hingkeꞌna mampomaporiꞌ toaꞌ, angkana Nowali ando penombaha hingkeꞌna mosulungi toaꞌ. 28Mewaliꞌ, Anaꞌ Manusiaꞌ makuasaꞌ mampokononto hapo to hawaꞌi masipatoꞌ niwali hei hapo to masipatoꞌ niwali i ando penombaha.”
Currently Selected:
Markus 2: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
