Matius 28
28
Hi Yesu tuwuꞌ huliꞌ
(Mrk. 16:1-8; Luk. 24:1-12; Yoh. 20:1-10)
1Liumo ando penombara toYahudi, mihoꞌolu-olu ando Minggu, hi Maria toMadalena hante hi Maria to ntaniꞌna nolouhi mampeꞌele petowuana hi Yesu. 2Hangkaꞌ-hangkaꞌ romo mewali luanoko to makaja, alaꞌ haduo malaꞌekana Pueꞌ mengkohou ka suruga humei mololihaki watu potutuꞌina petowua, hei mahura i womboꞌna. 3Lentena mewanta hibali wiaꞌ, hei baduꞌna popuhiꞌ mpololeke. 4Surodadu-surodadu to mampodaꞌi itoꞌo, morokaꞌhi mpololeke, mororidiꞌhi liu modungkahi hibali romohi toaꞌ to mahi.
5Angkana notiꞌi malaꞌeka pe towoweꞌe tiꞌohi, “Inioꞌkei morokaꞌ. Kubahaꞌ to ipaliꞌkei iomo hi Yesu to nipaku i loti momehulepe. 6#Mat. 12:40; 16:21; 17:23; 20:19; 26:61Io hamboaꞌmo uwaꞌ iseꞌe. Io tuwuꞌmo huliꞌ hibali to Notiꞌikimokei. Humeikei iꞌele koniꞌuliꞌaNe. 7#Mat. 26:32Hohiꞌmokei nolou ipowutekei pe topeguruNahi: ‘Hi Yesu tuwuꞌmo huliꞌ. Io medulumo nolou pe woiꞌ Galilea, hei hingkiꞌ ikohidupaꞌkikei itoꞌo.’ Hangangaa ikolowoikei hapo to kutiꞌikikei hieꞌe!”
8Hohiꞌmohi towoweꞌe tiꞌo molai ka petowua. Morokaꞌhi mpololeke, angkana motanaꞌhi woꞌo. Mehilaimohi nolou pe topegurunahi hi Yesu alaꞌ rokodokoꞌi mampowutekihi hapo to pewali. 9Hangkaꞌ-hangkaꞌ hi Yesu mampohidupaꞌkihi hei Notabeꞌhi mantiꞌi tabea. Noloumohi mangkododungkui hei mokopui kapuꞌNa, tandaꞌ penombara pe Io. 10Notiꞌikihi hi Yesu, “Inioꞌkei morokaꞌ! Noloumokei itiꞌikikei halalingKu hingkeꞌna nolouhi pe Galilea. Hingkiꞌ hidupaꞌA itoꞌo hante iohi.”
Lolitara surodadu to mampoꞌodaꞌ petowuana hi Yesu
11I tempora towoweꞌe tiꞌo mahuliꞌ, haꞌumbora surodadu to mampoꞌodaꞌ petowua nolouhi pe lali kota mampowute pe tutuꞌ-tutuꞌ tadulako mpenomba lekiꞌ-lekiꞌna to mewali i petowua. 12Iomo horiana morapaꞌhi tutuꞌ-tutuꞌ tadulako mpenomba hante tomotodi-tomotodira toYahudi. I porapaꞌra tiꞌo, pudiꞌhi, mampaꞌani doiꞌ pe surodadu tiꞌo hingkeꞌna mampowowutiꞌi. 13Hei rotiꞌiki surodadu tiꞌo, “Ilolitakei pe toaꞌ waheꞌe: ‘I halumbu wini kolentuꞌangki leꞌo, wotalokaꞌNa hi Yesu nonako topeguruNahi.’ 14Ane lolitami tiꞌo nohori gubenuruꞌ Pilatu, ingka romoꞌi to mololita pe io hingkeꞌna inioꞌkei nihuku.” 15Surodadu tiꞌo mantorimohi doiꞌ to nipaꞌaniki, hei mampowutehi hapo to ukomohi nipoturuꞌkihi. Wute hinewowoꞌena, tekareba nturusi lolita tiꞌo i lumbura toYahudi.
Hi Yesu morumbaꞌ topeguruNahi mampowute Kareba Moromiꞌ
16Topeguruna hi Yesu to hampuluꞌ haduo, nolouhi pe woiꞌ Galilea. Nolouhi pe biri to nopokonontokimohi umbiꞌ hi Yesu. 17Itoꞌo, mohidupaꞌhi hante hi Yesu, hei menombahi pe Io. Angkana uwaꞌ woꞌo to mororangko tene lalira. 18Nokododungkuihi hi Yesu, honiꞌi Notiꞌikihi, “Lekiꞌ-lekiꞌna kuasaꞌ i suruga hante i duniaꞌ nopaꞌanikimoꞌA Pueꞌ Ala. 19Mewaliꞌ, noloumokei pe lekiꞌ-lekiꞌna roboꞌ i humanele duniaꞌ, ipoturuꞌkei toaꞌ hingkeꞌna mewalihi topetuntuKu. Hei niriuhi i lali Konaꞌna Umoꞌ, Anaꞌ hei Inohaꞌ Mangkolehi. 20Nipoturuꞌhi hingkeꞌna motuntunihi lekiꞌ-lekiꞌna to Kuhowoꞌikimokikei. Hei hangangaa ikolowoikei: Aku hingkiꞌ moꞌowonikei nturusi wute i kotutuana duniaꞌ.”#28:20 hingkiꞌ Kuꞌowonikei nturusi Tiꞌomo palaihane Konaꞌna hi Yesu to ntaniꞌna, “Imanuel” (Pueꞌ Ala moꞌowonikei). Basa Matius 1:23.
Currently Selected:
Matius 28: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
