Matius 12
12
ToParisi mosalaꞌi hi Yesu alaꞌ topeguruNa majama i ando penombaha
(Mrk. 2:23-28; Luk. 6:1-5)
1I ando penombahara toYahudi, Hi Yesu hante topeguruNa moliuhi i kineteꞌ gandum. Topegurunahi biloramo, iomo horiana mokotihi wuaꞌ gandum, ropopio honiꞌi roꞌoka. 2Ikonoꞌokiꞌnalu toParisi hapo to rowali tiꞌo, rotiꞌi toParisi pe hi Yesu, “Ele! TopeguruMa molungkaꞌihi atura agamanta. Majamahi i ando penombaha!”#12:2 Motuntuni Hawaꞌna hi Musa, toaꞌ hawaꞌi wadi mekina i ando penomba, hei hapo to rowali topeguruna hi Yesu tiꞌo nirekeꞌ “mekina”.
3Mehoniꞌ hi Yesu notiꞌi, “Kutiꞌikae kaꞌibasamokei pohawaꞌne Pueꞌ noniuꞌ hapo to nowali datu Daudi hante awanahi hampiha i tempora bilora! 4#Im. 24:5Io mekahi pe lali Bambaruꞌ Penombaha, hei iohi mangka roti to nipopenombamo pe Pueꞌ Ala. Motuntuni atura agamanta, tadulako mpenombalu to wadi mangka roti tiꞌo. Angkana waliana hi Daudi tiꞌo hawaꞌi rosalaꞌi. 5#Bil. 28:9Hei hawaꞌireꞌi ibasakei hapo to teꞌukiꞌ i lali Aturana hi Musa: tadulako mpenomba i lali Tambina Pueꞌ Ala, majamahi nturusi, kehapoꞌi i ando penomba, angkana hawaꞌhi rosalaꞌi. 6Mewaliꞌ, Kutiꞌikikei, i lumbumi uwaꞌ haduo to meliu tene ka Tambina Pueꞌ Ala, 7-8alaꞌ Anaꞌ Manusiaꞌ makuasaꞌ mampokononto hapo to wadi rowali i ando penombaha.
I lali Suraꞌ Mangkolehi, Pueꞌ Ala mantiꞌi waheꞌe:
‘Handoꞌio pinatuwuꞌ to Kulei nipopenomba pe Aku,
angkana to Kulei, hingkeꞌna marimakei pe hangko awami.’ (Hos. 6:6)
Mewaliꞌ, ane keꞌibahaꞌkei palaihane lolita hieꞌe, mononto kehawaꞌkei mosalaꞌi topegurungKu to hawaꞌi masalaꞌ.”
Hi Yesu mampokoꞌoriꞌ toaꞌ to mohakiꞌ i ando penombaha
(Mrk. 3:1-6; Luk. 6:6-11)
9Hi Yesu hante topeguruNahi nolouhi pe tambi penombahara toYahudi. 10Itoꞌo, uwaꞌ haduo toaꞌ to mahi korawene hamali. Uwaꞌhi to mampaliꞌ komasalaꞌane hi Yesu, mewaliꞌ meꞌitanohi, rotiꞌi, “Guru, wadireꞌi mampokoꞌoriꞌ to mohakiꞌ i ando penombahanta?”#12:10 Motuntuni aturana toYahudi, ane mampokoꞌoriꞌ toaꞌ i ando penomba, hibali hante majama i ando penomba. Keluaran 31:14-17.
11Nohoniꞌhi hi Yesu, “Ane rapaꞌna uwaꞌ ka lumbumi to uwaꞌ gimbana to monawuꞌ pe lali woloꞌ i ando penombaha, ba hingkiꞌ nopotedehiluꞌi i lali woloꞌ, ba hingkiꞌ niꞌoreꞌi? Kehapoꞌi i ando penombaha hangangaa niꞌoreꞌ. 12Pelumbuꞌna tene toaꞌ, alaꞌ meliu tuwuꞌra hintina gimba, mewaliꞌ wadi tosulungi, kehapoꞌi i ando penombaha.” 13Uko tiꞌo, notiꞌi hi Yesu pe toaꞌ to mahi korawena tiꞌo, Notiꞌi, “Onaꞌi korawema!” Noꞌonaꞌmo mpuꞌu korawene. Kaliuꞌ moꞌoriꞌ hei maroho huliꞌ hibali korawena to hamalina. 14Angkana ikonoꞌokiꞌnalu toParisi hapo to pewali tiꞌo, molaimohi ka tambi penombaha, hei mampaliꞌhi lala hingkeꞌna morokoꞌhi hi Yesu.
Hi Yesu iomo Hawiꞌna Pueꞌ Ala
15Nobahaꞌ hi Yesu koꞌuwaꞌna tungkaihare toParisi to kodake pe Io, iomo horiana Io molai katoꞌo. Woriꞌ toaꞌ ntaniꞌna metuntu woꞌo pe Io, hei Io mampokoꞌoriꞌ lekiꞌ-lekiꞌna toaꞌ to mohakiꞌ. 16Angkana Noꞌopihi hingkeꞌna inioꞌ ropololitaꞌi kohihimona Io. 17Notiꞌi hatoꞌo hingkeꞌna tebuhoꞌi lolitana Pueꞌ Ala to nopowute nabi Yesaia hampiha waheꞌe:
18“Hieꞌemo HawiꞌKa to Kuꞌuwiꞌ,
to Kupokarima, hei to mampomotanaꞌ lalingKu.
Hingkiꞌ Kupaꞌani InohaꞌKu pe Io.
Io hingkiꞌ mampowute kohingkiꞌ Kubutusine lekiꞌ-lekiꞌna toaꞌ hante maniuꞌ.
19Io hawaꞌi hingkiꞌ momehoniꞌ, hawaꞌi hingkiꞌ moloaꞌ-loaꞌ,
hei hawaꞌi hingkiꞌ mololita nopokobue i lumbu lala.
20Io hawaꞌi hingkiꞌ molehoꞌ balo to molueꞌ,
hei Io hawaꞌi hingkiꞌ mampopideꞌ palita to memomarolu makiꞌna,
watoꞌo woꞌo Io hawaꞌi hingkiꞌ makasaraꞌ pe toaꞌ to moledeꞌ.
Io hingkiꞌ majama nturusi wute mombaha komonontona Pueꞌ Ala.
21I imbo-imbo i duniaꞌ, toaꞌ hingkiꞌ mepohinaru pe Io.” (Yes. 42:1-4)
ToParisi mantiꞌi kuasaꞌNa hi Yesu ka Belisiꞌ
(Mrk. 3:20-30; Luk. 11:14-23; 6:43-45)
22Uko tiꞌo, uwaꞌ haduo toaꞌ to rokomi nolou pe hi Yesu. Toaꞌ tiꞌo bilo hei hawaꞌi hohumbo mololita, alaꞌ nopekahii tokodake. Mewaliꞌ nopokoꞌoriꞌ hi Yesu, horiana pangkiꞌmo hei mololitamo. 23Lemeniahi toaꞌ to pangkiꞌ hapo to pewali tiꞌo, hei mometenei-teneihi, rotiꞌi, “Ba Iomo mpuꞌu Datu Topohompoꞌ, muleꞌna datu Daudi to nodandi Pueꞌ Ala hampiha?” 24Angkana Korohorinalu toParisi lolitare tiꞌo, rotiꞌi, “KuasaꞌNa tiꞌo ka Belsebul, tadulakora lekiꞌ-lekiꞌna tokodake. Iomo horiana Io wadi mampopolai tokodake.”
25Angkana nobahaꞌ hi Yesu pekirire toParisi tiꞌo, iomo horiana Notiꞌikihi, “Rapaꞌna, uwaꞌi haduo datu, hei toaꞌna mosisalaꞌhi nturusi, kodatua tiꞌo hingkiꞌ mokero. Ane to habolaꞌ ba tohantino poko mosisalaꞌ hingkiꞌ mokero pohintuwuꞌre 26Hatoꞌo woꞌo i kodatua Belisiꞌ. Ane tokodake moꞌewa hangko tokodakena, koꞌukoana kodatua Belisiꞌ mokero. 27Mewaliꞌ, ane Aku mampopolai tokodake hante kuasaꞌna Belsebul, kuasaꞌna hihimo to ropakeꞌ topeguruMa tiꞌo mampopolai tokodake? Ka waliana topegurumu tongawamo kohawaꞌne tuꞌu lolitami to mantiꞌi mampopolaiꞌa tokodake hante kuasaꞌna Belisiꞌ. 28Mampopolaiꞌa tokodake nokomi kuasaꞌna Inohaꞌna Pueꞌ Ala. Tiꞌomo to mampotongawa Pueꞌ Ala meparentamo i lumbumi.
29Belisiꞌ wadi nipandiriꞌ hibali haduo toaꞌ to maroho. Ane haduo toaꞌ to mekahi pe lali tambina toaꞌ to maroho hei mangkodokoꞌi manako ohi tambina, hangangaa nohiluꞌ duluna tumpune tambi tiꞌo, honiꞌi wadi noroa lumane. Hatoꞌo woꞌo Aku, ane mampopolaiꞌa tokodake, palaihana, mohiluꞌmoꞌA Belisiꞌ.
30 #
Mat. 9:37-38
Hihimo tota tinaꞌ ka Aku, iomo poniꞌKu. Hihimo tota mosulungiꞌA mangkomi toaꞌ mewali toaꞌna Pueꞌ Ala, iomo to mampomoꞌela toaꞌ ka Pueꞌ Ala. 31-32Mewaliꞌ, hingkeꞌna ibahaꞌkei: lekiꞌ-lekiꞌna dosa hante lolita pepononaꞌa wadi niꞌampuni. Ane uwaꞌ toaꞌ to moꞌewa Anaꞌ Manusiaꞌ hante lolita pepononaꞌa, dosa tiꞌo wadi tene niꞌampuni. Angkana ane uwaꞌ toaꞌ to moꞌewa Inohaꞌ Mangkolehi hante lolita pepononaꞌa, hawaꞌi uwaꞌ ampuniane, moromiꞌ i tempo hieꞌe, moromiꞌ i ando pobutusi.”
33Notiꞌi womo hi Yesu pe toParisi, “Ane loti to moromiꞌ, moromiꞌ woꞌo wuaꞌne. Ane loti to hawaꞌi moromiꞌ, hawaꞌi woꞌo moromiꞌ wuaꞌne. Komoromiꞌna ba kohawaꞌna moromiꞌ loti, tobahaꞌ ka wuaꞌna. 34Hibalikei muleꞌna ule to moꞌupoꞌ! Hawaꞌkei mpuꞌu wadi mampasuwu lolita to moromiꞌ ane kodakeꞌi lalimi. Alaꞌ hapo to uwaꞌ i lalinta, tiꞌo woꞌo to mesuwu i omeꞌta. 35Toaꞌ to moromiꞌ, bateꞌra mampasuwu hapo to moromiꞌ, alaꞌ lalira buhaꞌ romiꞌ. Toaꞌ to kodake, bateꞌra mampasuwu hapo to kodake, alaꞌ lalira woꞌo kodake. 36Mewaliꞌ, hingkeꞌna ibahaꞌkei: i ando pobutusi i kotutuana duniaꞌ, lekiꞌ-lekiꞌna toaꞌ hangangaa mampangakuꞌ lekiꞌ-lekiꞌna lolitara. Kehapoꞌi lolita to hawaꞌi modumbuꞌ, hangangaa ropangakuꞌ. 37Alaꞌ ka lolitamu hadoduomu, hingkiꞌ mampokononto komasalaꞌmu ba komoromiꞌmu.”
ToParisi merapiꞌ hingkeꞌna hi Yesu mowali tandaꞌ kuasaꞌ
(Luk. 11:29-32)
38Uko tiꞌo, haꞌumbora guru agama hei toParisi merapiꞌ pe hi Yesu hingkeꞌna mowali tandaꞌ kuasaꞌ, rotiꞌi, “Guru, kikodokoꞌi pangkiꞌ tandaꞌ kuasaꞌ to Iwali, hingkeꞌna mombaha i ingka koka Pueꞌ Alana kuasaꞌMa.”
39Angkana notiꞌi hi Yesu, “Kodakekei mpuꞌu to tuwuꞌ hinewowoꞌena! Hawaꞌkei tungkuꞌ pe Pueꞌ Ala angkana merapiꞌkei tandaꞌ kuasaꞌ! Hawaꞌi uwaꞌ tandaꞌ kuasaꞌ to hingkiꞌ niponoꞌokiꞌikikei, ukonalu tandaꞌ to mewalimo i nabi Yunus hampiha. 40Hibali nabi Yunus tolu ando tolu mini i lali hinaꞌina bouꞌ to kodeꞌ, hatoꞌo woꞌo Anaꞌ Manusiaꞌ hingkiꞌ tolu ando tolu mini i lali petawua. 41Watoꞌo woꞌo i ando pebutusi i koꞌukoana duniaꞌ, toNiniwe hingkiꞌ nipatuwuꞌ huliꞌ hiꞌoꞌalu hante ingkei to tuwuꞌ hinewowoꞌena, hei iohi hingkiꞌ mosalaꞌikei, alaꞌ hawaꞌkei mepoꞌohi pe Aku. Alaꞌ mampehoromuamohi lolitaNa nabi Yunus, nohohoꞌmohi ka dosara. Hinewowoꞌena uwaꞌmo Anaꞌ Manusiaꞌ i lumbumi to meliu kokodeꞌne tuwuꞌNa ka hi Yunus, angkana hawaꞌkei mampoꞌohi lolitaNa. 42#1Dat. 10:1-14; 2Dat. 9:1-12Hatoꞌo woꞌo i ando pobutusi i kotutuana duniaꞌ, datu towoweꞌe to ka woiꞌ Seba hingkiꞌ metotiꞌi moꞌawa hante ingkei to tuwuꞌ hinewowoꞌena, hei io woꞌo hingkiꞌ mosalaꞌikei, alaꞌ hampiha datu towoweꞌe tiꞌo hupaꞌ ka woiꞌ to moꞌela, humei mampehoromua kopebahaꞌna Datu Salomo. Angkana hinewowoꞌena uwaꞌmo i lumbumi Haduo to meliu kokodeꞌne tuwuꞌNa ka Datu Salomo, angkana hawaꞌi ipoꞌohikei lolitaNe.”
Pandiriꞌ noniuꞌ i haduo tokodake to mahuliꞌ
(Luk. 11:24-26)
43Hi Yesu mololita womo pe toParisi, Notiꞌi, “Ane tokodake molaimo ka toaꞌ, io nolou matengkaꞌ pe popada woꞌoni mampaliꞌ peꞌohaꞌa to wadi nopeꞌohaꞌi. Alaꞌ kohawaꞌna uwaꞌ to nohua, 44iomo horiana notiꞌi, ‘Aginamo mahuliꞌa nolou pe peꞌohaꞌa to kupolihi hampiha.’ Mahuliꞌmo mpuꞌu tokodake tiꞌo pe toaꞌ to nopolihi hampiha, hei noꞌokiꞌ handoaꞌi tene uwaꞌ to mampeꞌohaꞌi. Toaꞌ tiꞌo wadi nipandiriꞌ hibali tambi to terewahi ngkoromiꞌ, hantaro hoo. 45Iomo horiana noloumo tokodake tiꞌo mowowoi pitu tokodake ntaniꞌna to meliu kokodakere ka io. Noloumohi mekahi pe toaꞌ to nopolihimo hampiha, hei lebaꞌ i toaꞌ tiꞌo. Koꞌukoana, tetambaimo komaporiꞌne toaꞌ tiꞌo ka ulu-uluꞌna. Hatoꞌo woꞌo to mewali pe toaꞌ to kodake to tuwuꞌ hinewowoꞌena.”
Himo halaline hi Yesu
(Mrk. 3:31-35; Luk. 8:19-21)
46 #
Mat. 13:55-56; Mrk. 6:3 Kolentuꞌana tene hi Yesu mololita hante toaꞌ to woriꞌ, hupaꞌmohi inoꞌNe hante halaliNahi. Metotiꞌihi i howali tambi, rokodokoꞌi hingkiꞌ mampohidupaꞌki hi Yesu. 47Uwaꞌ haduo toaꞌ mampatiꞌiki hi Yesu, “Guru, inoꞌMu hante halaliMu uwaꞌhi i howali, rokodokoꞌi mampohidupaꞌkiKo.”
48Nohoniꞌ hi Yesu, “Himoto inoꞌKa? Himoto halalingKa?” 49Honiꞌi hi Yesu motidoꞌ topeguruNahi, Notiꞌi, “Ingkeimola inoꞌKa hante halalingKu, 50alaꞌ hihimolu to mowali peleihana UmoꞌKu to uwaꞌ i suruga, iomohi inoꞌKa hante halalingKu.”
Currently Selected:
Matius 12: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
