Matius 11
11
1Koꞌukonalu hi Yesu mampoturuꞌ topeguruNa to hampuluꞌ meroduo, Io noloumo mepoturuꞌ hei mampowute Kareba Moromiꞌ pe bolaꞌ-bolaꞌ i woiꞌ Galilea.
Hi Yesu hante hi Yohanes Toperiu
(Luk. 7:18-35)
2I tempo tiꞌo, hi Yohanes Toperiu kolentuꞌana nitarungkuꞌ. Konohorinalu hi Yohanes hapo to nowali Kerisitu, norumbaꞌmohi haꞌumbora topegurune nolou meꞌitano pe hi Yesu. Mewaliꞌ noloumohi mpuꞌu meꞌitano rotiꞌi: 3“Ba tuꞌuꞌi mpuꞌu Ingkomo Datu Topohompoꞌ to nodandi Pueꞌ Ala, ba uwaꞌ tene to ntaniꞌne to hangangaa kipekau?”
4Konohorina hi Yesu peꞌitanore, Nohoniꞌhi, “Pahuliꞌmokei hei ipowutekikei hi Yohanes hapo to ihorikei hei to iꞌokiꞌkei: 5Tobilo pangkiꞌmo, tokohu matengkaꞌmo, tokusta moꞌoriꞌmo, to bonoꞌ pohorimo, toaꞌ to mahi Kupotuwuꞌ huliꞌ, hei Kareba Moromiꞌ Kupowutemo pe toaꞌ to merima-rima tuwuꞌra. 6Motanaꞌmo toaꞌ to mantorimoꞌA hei mepoꞌohi pe Aku.”
7Pahuliꞌralu topegurune hi Yohanes Toperiu, mepongkamo hi Yesu mampololita pe toaꞌ to woriꞌ noniuꞌ i hi Yohanes, Notiꞌi, “Hapo tungkaihami nolou pe popada woꞌoni hampiha? Ba mangkodokoꞌilukei pangkiꞌ koraꞌ to noparowohi? 8Haporeꞌi to ikodokoꞌikei ako iꞌelekei? Ba mangkodokoꞌilukei pangkiꞌ toaꞌ to maranga baduꞌna? Toaꞌ to maranga baduꞌra meꞌohaꞌlu i tambina datu. 9Haporeꞌi to ikodokoꞌikei ako iꞌelekei? Ba mangkodokoꞌilukei pangkiꞌ haduo nabi? Ane hatoꞌoꞌi tungkaihami moromiꞌ. Hei Kutiꞌikikei, i wowomboꞌ tene hi Yohanes ka nabi to ntaniꞌna, 10alaꞌ hi Yohanes tiꞌomo to notungkai i lali Suraꞌ Mangkolehi hampiha to Notiꞌi Pueꞌ Ala:
‘Hieꞌemo rumbaꞌangKa
to hingkiꞌ Kurumbaꞌ medulu ka Ingko,
hingkeꞌna mampatimomo lalaMu.’ ” (Mal. 3:1)
11Notiꞌi womo hi Yesu, “Tuꞌu mpololeke to Kutiꞌikikei: ka lekiꞌ-lekiꞌna toaꞌ to nipoꞌanaꞌki i duniaꞌ hieꞌe, hawaꞌi uwaꞌ howeꞌ haduo to i wowomboꞌ tuwuꞌne ka hi Yohanes Toperiu. Angkana mepongka hinewowoꞌena, kehapoꞌi toaꞌ to nirekeꞌ i wowoiꞌ i lali poparentana Pueꞌ Ala, i wowomboꞌhi tene ka hi Yohanes. 12I tempona hi Yohanes Toperiu mepongka mampowute Kareba Moromiꞌ wute hinewowoꞌena, toaꞌ to kodake magegahi mokuasaꞌi toaꞌna Pueꞌ Ala. 13Lekiꞌ-lekiꞌna to noꞌukiꞌ hi Musa hante hapo to ropowute nabi-nabi wute ikohupaꞌana hi Yohanes, lekiꞌ-lekiꞌna tiꞌo mampokononto hapo to hingkiꞌ mewali hinewowoꞌena i tempona Pueꞌ Ala mepongka moparenta. 14#Mal. 4:5-6; Mat. 17:10-13; Mat. 3:4Mewaliꞌ, ane ileikei mantorimo lolita hieꞌe, hi Elia to notungkai nabi Maleaki hampiha, iomo hi Yohanes. 15Moromiꞌ mpololeke ane ipoꞌilalikei hapo to ihorimokei!
16Ingkei to tuwuꞌ tempo hieꞌe, wadikei nipandiriꞌ hibali oꞌanaꞌ to momewowoi-woihi i pororampua, 17rotiꞌi:
‘Kipolingakikei linga komotanaꞌ-tanaꞌ,
angkana hawaꞌkei hiniꞌ monariꞌ-nariꞌ.
Kipolingakikei linga to mepohanondoiha,
angkana hawaꞌkei woꞌo hiniꞌ meꞌola.’
18Palaihana: Hi Yohanes toperiu hawaꞌkei ilei hei Aku woꞌo hawaꞌAkei ilei. Kohumeina hi Yohanes, io poko maboki hei hawaꞌi maꞌinu to melolanu, angkana itiꞌikei: ‘Io nopekahii lomoa!’ 19Hinewowoꞌena hupaꞌmo Anaꞌ Manusiaꞌ. Io mangka hei maꞌinu anggoroꞌ, angkana ipantiꞌikikei, ‘Io haduo to hariko hei poko malanu, awara toperuruꞌ sima hei toaꞌ to madosa!’ Angkana kehapoꞌi hatoꞌo, komonontona lalana Pueꞌ hingkiꞌ mombaha i kotuwuꞌna toaꞌ to motuntuni peleihana Pueꞌ Ala.”
Hi Yesu mosalaꞌi toYahudi to hawaꞌhi mepoꞌohi i Galilea
(Luk. 10:13-15)
20Katoꞌo, hi Yesu mosalaꞌi toYahudi to meꞌohaꞌhi i haꞌumbora kota i woiꞌ Galilea, alaꞌ kehapoꞌi woriꞌ tandaꞌ kuasaꞌ to Nowali i bolaꞌra, hawaꞌhi mpuꞌu mengkatobaꞌ ka waliara to kodake. 21Notiꞌi hi Yesu, “Horewuꞌmokei to i Korasi hante to i Besaida! Woriꞌ tandaꞌ kuasaꞌ to Kuwali i bolaꞌmi, angkana hawaꞌkei mpuꞌu nohohoꞌ ka dosami. Ane rapaꞌna Kuwaliꞌi tandaꞌ kuasaꞌ tiꞌo i kota Tiru hante Sido, kemoruemohi nohohoꞌ hei mampolihihi dosara kehapohi handoꞌio toYahudi. Kemebaduꞌmohi baduꞌ mperorima hei wotara niꞌawui, tandaꞌ konohohoꞌra. 22Mewaliꞌ, hingkeꞌna ibahaꞌkei: i ando pobutusi i kotutuana duniaꞌ, hingkiꞌ makaja tene pehukune Pueꞌ Ala pe ingkei hintina pehukuNa i toTiru hante toSido.
23Hei ingkei woꞌo toKapenau! Ba itiꞌikeireꞌi hingkiꞌ noꞌoreꞌkei Pueꞌ Ala wute i suruga? Hawaꞌi! Angkana hingkiꞌ Notubekei pe lali naraka! Ane rapaꞌna tandaꞌ kuasaꞌ to Kuwali i bolaꞌmi, Kuwaliꞌi i kota Sodomo hampiha, kota tiꞌo kehawaꞌi noropuꞌi Pueꞌ Ala, hei keꞌuwaꞌ tene wute hinewowoꞌena. 24Mewaliꞌ, hingkeꞌna ibahaꞌkei: i ando pobutusi i kotutuana duniaꞌ, hingkiꞌ makaja tene pehukune Pueꞌ Ala pe ingkei hintina pehukuNa pe toSodomo hampiha.”
Hi Yesu mekokae hei mowowoi toaꞌ to hingkiꞌ metuntu pe Io
(Luk. 10:21-22)
25I tempo tiꞌo, mekokaemo hi Yesu, Notiꞌi, “O Umoꞌ, Pueꞌ to mokuasaꞌi laniꞌ hante duniaꞌ! KupokodeꞌKo, alaꞌ lekiꞌ-lekiꞌna to tewowuni hampiha, Ipomombahamo pe toaꞌ to i wowoiꞌ tuwuꞌra, angkana Iwowuni ka toaꞌ to buhaꞌ pekiri hei toaꞌ to mapande, 26alaꞌ iomo peleihaMa Umoꞌ.”
27Uko tiꞌo, notiꞌi womo hi Yesu, “Lekiꞌ-lekiꞌna nopaꞌanikimoꞌA UmoꞌKu. Hawaꞌi uwaꞌ to pobahaꞌ Anaꞌ ukonalu UmoꞌNa hadoduona. Hatoꞌo woꞌo, hawaꞌi uwaꞌ howeꞌ haduo to pobahaꞌ Umoꞌ, bateꞌnalu Aku AnaꞌNa, hante himolu to Kuponobahaꞌi kohihimona UmoꞌKu.
28Humeimokei pe Aku lekiꞌ-lekiꞌmi to moledeꞌ hei masusa pehorimi alaꞌ hingkiꞌ Kupaꞌanikei komonangkoꞌ. 29Iriimokei komaporiꞌ metuntu Aku, hei megurukei ka Aku alaꞌ waliangKu maꞌalusuꞌ hei mengkaꞌiwowoiꞌA. Ane iwalikei hatoꞌo, hingkiꞌ himpononohaꞌ lalimi. 30PoturuꞌKu hawaꞌi masusa ipetuntuikei, hei jama to hingkiꞌ Kupaꞌanikikei hawaꞌi madori.”
Currently Selected:
Matius 11: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
