Lukas 7
7
Hi Yesu mampokoꞌoriꞌ haduo hawiꞌna tadulakora surodadu Roma
(Mat. 8:5-13; Yoh. 4:46-53)
1Koꞌukonalu hi Yesu mololita pe toaꞌ to woriꞌ, noloumo pe bolaꞌ Kapenau. 2I bolaꞌ tiꞌo, uwaꞌ haduo tadulakora surodadu Roma. Hawiꞌna tadulako tiꞌo madori hakiꞌne, hingkiꞌ mahi, hei io to nopokarima mpuꞌu. 3Konohorinalu tadulako tiꞌo koꞌuwaꞌna hi Yesu i lali bolaꞌ, norumbaꞌmohi haꞌumbora duo tomotodira toYahudi nolou merapiꞌ sulungi pe hi Yesu, hingkeꞌna humei mampokoꞌoriꞌ hawiꞌna. 4Kohupaꞌra i hi Yesu merapiꞌmohi rotiꞌi, “Tadulako hieꞌe, masipatoꞌ Isulungi, 5alaꞌ io mampokarima ingkiꞌ toYahudi, hei mampewei doiꞌna nipopoꞌaro tambi penombahangki.” 6Katoꞌo, noloumo hi Yesu moꞌawa hante iohi.
Dodungkumo hi Yesu pe tambina, tadulako tiꞌo morumbaꞌmo haꞌumbora duo awana nolou mampohidupaꞌki hi Yesu hingkeꞌna nitiꞌikiꞌi, “Tua, hawaꞌKo paralu humei pe tambingku, alaꞌ hawaꞌa masipatoꞌ mantorimoKo. 7Hei mohiliꞌa nolou pe Ingko, alaꞌ hawaꞌa masipatoꞌ mampohidupaꞌkiKo. Angkana ane Itiꞌiluꞌi hamokuꞌ lolita, hawiꞌku tiꞌo bateꞌna hingkiꞌ moꞌoriꞌ. 8Kubahaꞌ Ingko to makuasaꞌ mowali watoꞌo, alaꞌ aku hieꞌe, uwaꞌ to i wowomboꞌku, hei uwaꞌhi woꞌo to i wowoiꞌku. Ane rapaꞌna kupohawaꞌki haduo surodadu kutiꞌiki, ‘Nolouko!’ Bateꞌna nolou. Ane kuwowoiꞌi surodadu to ntaniꞌna, ‘Humeiko!’ Bateꞌna humei. Ane kutiꞌiki hawiꞌku, ‘Iwali tiꞌo!’ Bateꞌna nowali. Watoꞌo woꞌo Ingko tua, hapo to Itiꞌi iseꞌe, iomo to hingkiꞌ mewali i tambingku.”
9Nopolomomenia hi Yesu mampehoromua lolitaNe tadulako tiꞌo. Iomo hinaꞌ mehahiliꞌ pe toaꞌ to woriꞌ to metuntu pe Io, notiꞌikihi, “Kodeꞌ mpuꞌu pepoꞌohine toaꞌ hieꞌe! Kehapoꞌi i lumbura toSaraeli, handoaꞌi tene Kuhua howeꞌ haduo to kodeꞌ pepoꞌohina hibali toaꞌ hieꞌe.” 10Uko tiꞌo, mahuliꞌmohi awane tadulako tiꞌo nolou pe tambina. Kohupaꞌra itoꞌo, rohua moꞌoriꞌmo hawiꞌne to mohakiꞌ.
Hi Yesu mampotuwuꞌ huliꞌ haduo anaꞌntomaꞌani
11Hawaꞌi morue katoꞌo, noloumo hi Yesu hante topeguruNa pe bolaꞌ Nain, hei woriꞌ toaꞌ ntaniꞌna nolouhi woꞌo moꞌawa hante Io. 12Dodungkumohi i wambaꞌ bente bolaꞌ, roꞌokiꞌ haduo to mahi to nikowaꞌ nolou pe huwali bolaꞌ. To mahi tiꞌo haduo anaꞌntomaꞌani, anaꞌ hadoduona haduo tobembaꞌ. Woriꞌ tumpu bolaꞌ nolou pe potowua mampoꞌowoni inoꞌna. 13Konoꞌokiꞌnalu hi Yesu towoweꞌe tiꞌo, marima laliNe hei Notiꞌi, “Hampoliꞌmoko meꞌola!” 14Nokododungkuimo pekowaꞌne to mahi tiꞌo hei noperama. Meꞌohaꞌmohi toaꞌ to mangkowaꞌ. Notiꞌi hi Yesu, “Anaꞌntomaꞌani! Peꞌaromo!” 15Tuwuꞌmo huliꞌ anaꞌntomaꞌani to mahi tiꞌo. Io mahura hei mololita. Notiꞌi hi Yesu pe inoꞌna, “Hieꞌemo anaꞌma.”
16Toaꞌ to pangkiꞌhi hapo to mewali tiꞌo, motehuꞌhi lekiꞌ-lekiꞌra, hei mepongkamohi mampokodeꞌ Pueꞌ Ala rotiꞌi, “Haduo nabi to makuasaꞌ mpololeke uwaꞌ i iliꞌta! Hupaꞌmo Pueꞌ Ala mamposalamaꞌ toaꞌNa.” 17Kareba tiꞌo tekarebamo pe humanele woiꞌra toYahudi hei pe lekiꞌ-lekiꞌna bolaꞌ to dodungku itoꞌo.
Hi Yesu hante hi Yohanes Toperiu
18Topeguruna hi Yohanes Toperiu mampowute pe hi Yohanes lekiꞌ-lekiꞌna to nowali hi Yesu. Iomo hinaꞌ nowowoi hi Yohanes roduo topeguruna 19notiꞌikihi, “Noloumokei pe hi Yesu hei ipeꞌitanokikei, ‘Ba Ingkomo mpuꞌu Datu Topohompoꞌ to nodandi Pueꞌ Ala, ba uwaꞌ tene to ntaniꞌna to nipekau?’ ”
20Noloumohi mpuꞌu topeguruNe to roduo tiꞌo pe hi Yesu hei rotiꞌi, “Hi Yohanes morumbaꞌka humei meꞌitano pe Ingko ba Ingko mpuꞌu Datu Topohompoꞌ to nodandi Pueꞌ Ala, ba uwaꞌ tene to ntaniꞌne to nipekau?”
21I tempo tiꞌo woꞌo, hi Yesu kolentuꞌana mampokoꞌoriꞌ woriꞌ toaꞌ to mohakiꞌ iomo; mampopolai lomoa to mekahi pe toaꞌ, hei mampopangkiꞌ tobilo. 22Katoꞌo nohoniꞌ hi Yesu pe topeguruna hi Yohanes notiꞌi, “Pahuliꞌmokei, hei ipowutekikei hi Yohanes hapo to iꞌokiꞌkei hei to ihorikei: tobilo pangkiꞌmo, tokohu matengkaꞌmo, tokusta moꞌoriꞌmo, to bonoꞌ pohorimo, toaꞌ to mahi Kupotuwuꞌ huliꞌ, hei Kareba Moromiꞌ Kupowutemo pe toaꞌ to merima-rima tuwuꞌra.#7:22 Hieꞌe to noꞌukiꞌ nabi Yesaia hampiha noniuꞌ i Datu Topohompoꞌ. Yes. 35:5-6, 61:1. 23Motanaꞌmohi toaꞌ to hawaꞌi mororangko lalire mepoꞌohi pe Aku.”
24Ikopahuliꞌralu topegurune hi Yohanes tiꞌo, mepongkamo hi Yesu mampololita pe toaꞌ to woriꞌ noniuꞌ i hi Yohanes notiꞌi, “Hapo tungkaihami nolou pe hi Yohanes i popada woꞌoni hampiha? Ba mangkodokoꞌilukei pangkiꞌ kora to noparowohi? Matantu hawaꞌ! 25Hade, haporeꞌi to ikodokoꞌikei nolou iꞌelekei? Ba dokoꞌkei mampeꞌele toaꞌ to maranga baduꞌna? Matantu hawaꞌi woꞌo, alaꞌ toaꞌ to maranga baduꞌna hei tosugiꞌ tuwuꞌra meꞌohaꞌluhi i tambi kodatua. 26Haporeꞌi to ikodokoꞌikei ako iꞌelekei? Ba dokoꞌkei mampeꞌele nabi? Ane watoꞌoꞌi, tuꞌuluiae. Angkana Kutiꞌikikei, meliu kokodeꞌna tuwuꞌna hi Yohanes ka nabi to ntaniꞌna. 27Alaꞌ hi Yohanes tiꞌo to teꞌukiꞌ i lali Suraꞌ to mangkolehi hampiha to mantiꞌi waheꞌe,
‘Hieꞌemo surongKa
to hingkiꞌ Kurumbaꞌ medulu ka Ingko,
io to hingkiꞌ mampatimomo lalaMu.’ ” (Mal. 3:1)
28Hei notiꞌi womo hi Yesu, “Pehoromuakei moromiꞌ: ka lekiꞌ-lekiꞌna toaꞌ to nipoꞌanaꞌki i duniaꞌ hieꞌe, hawaꞌi uwaꞌ haduo to meliu kokodeꞌne tuwuꞌna ka hi Yohanes. Angkana haduo toaꞌ to merima-rima tuwuꞌna i lali kodatuana Pueꞌ Ala, meliu kokodeꞌne tuwuꞌna ka hi Yohanes.”
29Lolitana hi Yesu tiꞌo ropehoromua lekiꞌ-lekiꞌna toaꞌ, tekahihi toperuruꞌ sima. Toaꞌ to woriꞌ tiꞌo mopangakuꞌ komonontona Pueꞌ Ala, alaꞌ iohi mampoperiu pe hi Yohanes. 30Angkana toParisi hei guru-guru agama mosapuakahi tungkaihana Pueꞌ Ala pe iohi, alaꞌ hawaꞌhi mampoperiu pe hi Yohanes.
31-32Hei notiꞌi womo hi Yesu, “Ingkei to tuwuꞌ i tempo hieꞌe wadikei nipandiriꞌ hibali oꞌanaꞌ to mahohura i pobaluꞌ-baluꞌa to momewowoi-woihi rotiꞌi,
‘Kupolingakikei linga komotanaꞌ-tanaꞌ,
hawaꞌkei hiniꞌ monariꞌ,
Kipolingakikei linga to mepohanondoiha,
hawaꞌkei hiniꞌ meꞌola.’
33Palaihana, hi Yohanes Toperiu hawaꞌi nilei. Kohumeina hi Yohanes, io hawaꞌi mangka kopongkona hibali biasa hei hawaꞌi maꞌinu to melolanu. Itiꞌikei, ‘Io nopekahii lomoa!’ 34Katoꞌo hupaꞌmo Anaꞌ manusiaꞌ, Io mangka hante maꞌinu, angkana ipantiꞌikikei, ‘Io haduo to hariko hei poko malanu, awana toperuruꞌ sima hei toaꞌ to madosa!’ 35Angkana kehapoꞌi watoꞌo, komonontona lalana Pueꞌ Ala mombaha i kotuwuꞌna toaꞌ to motuntuni peleihana Pueꞌ Ala.”
Haduo towoweꞌe to mominyaꞌ-minyaꞌi kapuꞌna hi Yesu
36Uwaꞌ haduo toParisi to nikokeneꞌi hi Simo, mowowoi hi Yesu nolou mangka pe tambina. Noloumo mpuꞌu hi Yesu pe tambina, mahurahi honiꞌhi mangka. 37I lali bolaꞌ tiꞌo, uwaꞌ woꞌo haduo towoweꞌe to kodake waliana. Konohorinalu hi Yesu uwaꞌ mangka i tambina toParisi, noloumo mampohidupaꞌkiꞌI. Towoweꞌe tiꞌo mangkomi habutoloꞌ minyaꞌ-minyaꞌi to mewowau, to masuliꞌ mpololeke hilina. 38Kohupaꞌna towoweꞌe tiꞌo, metotiꞌi i tinaꞌ kapuꞌna hi Yesu hei meꞌola. Kapuꞌna hi Yesu nowaheꞌ hante uwai matana, uko tiꞌo, nopahi hante wiloluna honiꞌi noꞌumaꞌ hei nominyaꞌ-minyaꞌi to mewowau.
39Konoꞌokiꞌnalu hi Simo waliane towoweꞌe tiꞌo, notiꞌi i lalina, “Ane toaꞌ hieꞌe tuꞌu-tuꞌu mpuꞌu haduo nabi, bateꞌna Nobahaꞌ kohihimona towoweꞌe to humei mominyaꞌ-minyaꞌi kapuꞌNa, hei bateꞌna nobahaꞌ woꞌo kokodakene waliana towoweꞌe tiꞌo.”
40Iomo hinaꞌ hi Yesu mantiꞌi pe hi Simo, “Simo, uwaꞌ to hingkiꞌ Kutiꞌikiko.”
Notiꞌi hi simo, “Tiꞌimoꞌi guru.”
41Notiꞌi hi Yesu, “Uwaꞌ roduo toaꞌ to maꞌinda pe haduo toaꞌ to mampaꞌanihi doiꞌ ropebolo. Indana haduo limo natuna doiꞌ peraꞌ, hei indana to haduona limo mpuluꞌlu doiꞌ peraꞌ. 42Alaꞌ kohawaꞌna robiaꞌ mobaiari indara, notiꞌimo toaꞌ to mampaꞌanihi doiꞌ tiꞌo, ‘Hamboaꞌmo paralu nibaiari indami.’ Motuntuni pahuamu, ka toaꞌ to meroduo tiꞌo, hihimo to hingkiꞌ kodeꞌ rimane pe toaꞌ to mampaꞌanihi doiꞌ ropebolo?”
43Mehoniꞌ hi Simo, “Hibali pahuangku, toaꞌ to woriꞌ indana.”
Notiꞌi hi Yesu, “Tuꞌu pehoniꞌma.” 44Uko tiꞌo, hi Yesu mampenotoꞌ towoweꞌe tiꞌo hei mololita pe hi Simo notiꞌi, “Ele towoweꞌe hieꞌe. KohupaꞌKu i tambimu, hawaꞌAkei ipaꞌani uwai powaheꞌna kapuꞌKu, motuntuni adaꞌmi pe tolori. Angkana towoweꞌe hieꞌe mowaheꞌ kapuꞌKu hante uwai matana, honiꞌi nopahi hante wiloluna. 45Ingko hawaꞌA idupaꞌ hante iꞌumaꞌ motuntuni adaꞌmi pe tolori. Angkana towoweꞌe hieꞌe moꞌumaꞌ woꞌo kapuꞌKu mepongka ka kohupaꞌangKu hingkonia. 46Ingko hawaꞌko mobobohi tutuꞌKu hante minyaꞌ-minyaꞌ motuntuni adaꞌmi pe tolori. Angkana towoweꞌe hieꞌe mominyaꞌ-minyaꞌi kapuꞌKu. 47Alaꞌ dosana to woriꞌ niꞌampunikimo, pepokarimana woriꞌ woꞌo. Angkana toaꞌ to hangkiuꞌlu dosane niꞌampuni, hangkiuꞌlu woꞌo pepokarimane.”
48Uko tiꞌo notiꞌi hi Yesu pe towoweꞌe tiꞌo, “Teꞌampunimo dosama.”
49Iomo hinaꞌ mantiꞌihi toaꞌ to mangka moꞌawa-awa i lalira, “Wurani mpuꞌu toaꞌ hieꞌe mantiꞌi hatoꞌo. Pueꞌ Alalu to pobiaꞌ moꞌampuni dosa!”
50Katoꞌo notiꞌi hi Yesu pe towoweꞌe tiꞌo, “Alaꞌ pepoꞌohimu, iomo hinaꞌ himpolohoꞌmoko ka pehuku dosamu. Mahuliꞌmoko, romiꞌ ngkotuwuꞌ mampoꞌowoniko.”
Currently Selected:
Lukas 7: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)