Lukas 6
6
Topeguruna hi Yesu mokoti wuaꞌ gandum i ando penombaha
1I hampiha tempo i ando penombaha,#6:1 ando penombaha wiharo Indonesia, hari Sabat. Ando Satu iomo ando penombahara toYahudi. hi Yesu hante topeguruna moliuhi i halimboꞌ kineteꞌ. Kolentuꞌara moliu i kineteꞌ tiꞌo, topeguruna hi Yesu mokoti wuaꞌ gandum, ropopio honiꞌi roꞌoka.
2Koroꞌokiꞌnalu toParisi hapo to rowali, rokamorokihi rotiꞌi, “Mahamporeꞌi hinaꞌ molungkaꞌikei atura agamanta? Majamakei i ando penombaha!”
3Mehoniꞌ hi Yesu notiꞌi, “Kutiꞌikae kaꞌibasamokei pohawaꞌne Pueꞌ noniuꞌ hapo to nowali datu Daudi hante awanahi hampiha i tempora bilora! 4Hi Daudi mekahi pe lali Bambaruꞌ Penombaha, honiꞌi mangka roti to nipopenomba pe Pueꞌ Ala, hei nodolaꞌ-dolaꞌkihi woꞌo awana. Motuntuni adaꞌ agamanta, tadulako mpenombalu to wadi mangka depa tiꞌo. Angkana kehapoꞌi watoꞌo, waliana hi Daudi tiꞌo hawaꞌi nisalaꞌi.”
5Nopololiu hi Yesu lolitaNe Notiꞌi, “Anaꞌ Manusiaꞌ makuasaꞌ mampokononto hapo to wadi niwali i ando penombaha.”
Hi Yesu mampokoꞌoriꞌ haduo toaꞌ to mahi korawena hamali
6I ando penombaha to ntaniꞌna, noloumo hi Yesu pe tambi penombahara toYahudi hei mepoturuꞌ itoꞌo. I tambi penombaha tiꞌo, uwaꞌ haduo toaꞌ to mahi korawe kuanana. 7Uwaꞌhi woꞌo haꞌumbora toParisi hante guru agama to mokamata mampaliꞌ komasalaꞌana hi Yesu, ba hingkiꞌ majama mpuꞌu i ando penombaha. 8Angkana nobahaꞌ hi Yesu tungkaihane lalira. Iomo hinaꞌ Nowowoi toaꞌ to mahi korawene tiꞌo, “Humeiko metotiꞌi i hinaro!” Noloumo mpuꞌu metotiꞌi itoꞌo. 9Uko tiꞌo hi Yesu meꞌitano, “Motuntuni adaꞌ agamanta, hapo to wadi towali i ando penombaha, mowaliki to moromiꞌ ba to kodake? Mosulungiki awanta ba morokoꞌki awanta?” 10Mehahiliꞌmo hi Yesu mampenotoꞌhi lekiꞌ-lekiꞌra, hei notiꞌi pe toaꞌ to mahi korawena tiꞌo, “Onaꞌi humei korawema!” Konoꞌonaꞌnalu korawene, kaliuꞌ moꞌoriꞌ.
11Katoꞌo bukotahi mpololeke guru agama hante toParisi. Iomo hinaꞌ morapaꞌmohi mampaliꞌ akala, ba hapo to hingkiꞌ ropoꞌintuꞌa pe hi Yesu.
Hi Yesu moꞌuwiꞌ topeguruna hampuluꞌ meroduo
12Hawaꞌi morue katoꞌo, hi Yesu noloumo pe bobirina, hei mekokae hamini pe Pueꞌ Ala. 13Mewanta ando, Nododoemohi toaꞌ to metuntu pe io, hei Noꞌuwiꞌ hampuluꞌ meroduo ka lumbura. Iomohi to Nopokononto hi Yesu hingkeꞌna mewali suroNa to mampowute Kareba Moromiꞌ pe toaꞌ to woriꞌ. 14-16Hieꞌemo konaꞌre:
Hi Simo (to nokokeneꞌi hi Yesu hi Peturuꞌ),
Hi Andaria hineeꞌna hi Simo,
Hi Yakobus hante hi Yohanes,
Hi Pilipu hante hi Bartolomeu,
Hi Matius hante hi Toma,
Hi Yakobus anaꞌna hi Alpeu,
Hi Simo toSeloꞌ,#6:14-16 Hi Simo iomo haduo ka paratei to nikokeneꞌi Selo to moꞌewa poparentana toRoma.
Hi Yudas anaꞌna hi Yakobus,
Hei hi Yudas Iskarioꞌ to hingkiꞌ mampobaluꞌ hi Yesu pe poniꞌNa.
Hi Yesu mampokoꞌoriꞌ toaꞌ to mohakiꞌ
17Uko tiꞌo, mengkohoumo hi Yesu ka bobirina moꞌawa hante topeguruNa hei meꞌohaꞌhi i rantena. Itoꞌo woriꞌhi topetuntuNe hei toaꞌ ntaniꞌna mampekau hi Yesu, uwaꞌhi to ka humanele woiꞌna toYahudi, ka kota Yerusale hante ka kota Tiru hei Sido to i bota ntahiꞌ. 18Toaꞌ-toaꞌ tiꞌo dokoꞌhi mampehoromua lolitana hi Yesu hei merapiꞌhi hingkeꞌna Nopokoꞌoriꞌhi. To nopekahii tokodake hupaꞌhi woꞌo pe Io, hei Nopokoꞌoriꞌhi. 19Woriꞌhi toaꞌ to magega morama hi Yesu, alaꞌ uwaꞌ kuasaꞌNa to mesuwu ka wotaNa to mampokoꞌoriꞌ toaꞌ.
Motanaꞌhi toaꞌ to motuntuni peleihana Pueꞌ Ala
20Hi Yesu mampenotoꞌ topetuntuNa hei Notiꞌikihi,
“Ipotanaꞌlukei ane merima-rimaꞌi tuwuꞌmi,
alaꞌ ingkeimo to mewali toaꞌne Pueꞌ Ala i lali poparentaNa.
21Ipotanaꞌlukei ane bilorakei hinewowoꞌena,
alaꞌ ingkeimo to hingkiꞌ nipowohu.
Ipotanaꞌlukei ane meꞌolakei hinewowoꞌena,
alaꞌ ingkei to hingkiꞌ motanaꞌ.
22Ipotanaꞌlukei ane nikabiriꞌkei, hawaꞌkei nilei, hei nosalaꞌikei toaꞌ nokomi petuntumi pe Anaꞌ Manusiaꞌ. 23Alaꞌ iomo woꞌo to nowali tododulura hampiha pe nabi-nabina Pueꞌ Ala. Mewaliꞌ, ane tiꞌo to rowali pe ingkei, motanaꞌkei mpololeke hei motaroꞌ-taroꞌkei, alaꞌ kodeꞌ howonine to hingkiꞌ ihuakei i lali Suruga.
24Angkana hurewuꞌkei tosugiꞌ hinewowoꞌena.
Himaꞌmokei hingkiꞌ motanaꞌ, alaꞌ ihorimokei komotanaꞌmio hinewowoꞌena.
25Hurewuꞌkei to wohu hinewowoꞌena,
alaꞌ hingkiꞌ bilorakei.
Hurewuꞌkei to motanaꞌ hinewowoꞌena,
alaꞌ hingkiꞌ masusa lalimi hei hingkiꞌ meꞌolakei.
26Hurewuꞌkei ane noperenakikei lekiꞌ-lekiꞌna toaꞌ,
alaꞌ nabi-nabi to roperenaki woꞌo tododolura hampiha.”
Nipokarima poniꞌmi
27“Angkana ingkei to mampehoromua lolitangKu, hieꞌemo hawaꞌKa, ipokarimakei poniꞌmi, hei iwalikei hapo to moromiꞌ pe toaꞌ to mokabiriꞌkei. 28Ibarakatihi to motundaꞌkei, ipekokaekihi toaꞌ to mowali to kodake pe ingkei. 29Ane uwaꞌ toaꞌ to motampedaꞌ pipimu hambali, anioꞌ ihowoniꞌi. Agina ipaꞌaniki womo pipima hambali notampedaꞌ. Ane uwaꞌ to mamperompoꞌi jubamu, ipaꞌaniki womo baduꞌma. 30Ane uwaꞌ to merapiꞌ hapolu i ingkei, ipaꞌanikihi. Hei ane uwaꞌ parewami roperompoꞌi, anioꞌmo niperapiꞌ huliꞌ. 31Hapo to ileikei rowali toaꞌ pe ingkei, hatoꞌo woꞌo hangangaa iwalikei.
32Ane marimalukei pe toaꞌ to mampokarimakei, hapomo to hingkiꞌ ihuakei ka Pueꞌ Ala? Hingkoweꞌ woꞌo toaꞌ to kodake, marimahi pe toaꞌ to mampokarimahi. 33Ane moromiꞌlu waliami pe toaꞌ to mowali woꞌo to moromiꞌ pe ingkei, hawaꞌi uwaꞌ dumbuꞌna. Hingkoweꞌ woꞌo toaꞌ to kodake, watoꞌo woꞌo waliare. 34Ane mampeweilukei doiꞌmi nopebolo toaꞌ to nobiaꞌ mampopahuliꞌ, hawaꞌi uwaꞌ komoromiꞌmio. Howeꞌ woꞌo toaꞌ to kodake, mampeweilu woꞌo doiꞌna pe hangko awara to kodake ropebolo, alaꞌ hingkiꞌ ropopahuliluꞌi.
35Anioꞌkei watoꞌo! Hangangaa nipokarima poniꞌmi, hei hangangaa niwali hapo to moromiꞌ. Ane uwaꞌ toaꞌ to dokoꞌ mebolo ka ingkei, nipaꞌani hei anioꞌmo nipohinaru hingkiꞌ nopopahuliꞌ. Ane iwalikei watoꞌo, woriꞌ pebarakati hingkiꞌ nopaꞌanikikei Pueꞌ Ala, hei hingkiꞌ norekeꞌkei anaꞌna Pueꞌ Ala to i tanti, alaꞌ hatoꞌomo komoromiꞌne Pueꞌ Ala pe toaꞌ to kodake hei pe toaꞌ to hawaꞌi robahaꞌ moꞌawerasiꞌ pe Io. 36Komarimami hangangaa hibali komarimana Umoꞌmi to i Suruga.”
Anioꞌ mesosalaꞌi
37“Anioꞌkei mosalaꞌi toaꞌ ntaniꞌna, hingkeꞌna hawaꞌkei woꞌo nosalaꞌi Pueꞌ Ala. Anioꞌkei mohuku toaꞌ ntaniꞌna, hingkeꞌna hawaꞌkei woꞌo nohuku Pueꞌ Ala. Iꞌampunikei toaꞌ to masalaꞌ, hingkeꞌna noꞌampunikei woꞌo Pueꞌ Ala. 38Mepaꞌanimokei pe toaꞌ ntaniꞌ hingkeꞌ Pueꞌ Ala hingkiꞌ mepaꞌani huliꞌ hante melobi-lobi. Hukaꞌ to nopake Pueꞌ Ala nipandiriꞌ hibobali to mohukaꞌ kina: io hingkiꞌ mohukaꞌ pe lali pohukaꞌ hante nororoꞌ hei notambai wute buhaꞌ hiluaweꞌ, honiꞌi nopepaꞌaniki pe ingkei. Hukaꞌ hapo to ipakeꞌkei mampaꞌani toaꞌ ntaniꞌna, hukaꞌ tiꞌo woꞌo to nopakeꞌ Pueꞌ Ala mampopahuliꞌ pe ingkei.”
39Nopololiu hi Yesu lolitaNe hante pandiriꞌ waheꞌe, “Ane haduo tobilo moranda hangko tobiloana, bateꞌra hingkiꞌ monawuꞌhi roduo i lali woloꞌ. 40Watoꞌo woꞌo, hawaꞌi uwaꞌ topeguru to meliu komapandene ka guruna. Ane tutumoꞌi posikolaꞌne honiꞌi hibali woꞌo hante guruna.”
41Uko tiꞌo, hi Yesu mampowute pandiriꞌ hieꞌe notiꞌi, “Mahamporeꞌi hinaꞌ iꞌokiꞌkei kowilohane awami, hantaro rangka loti to i matami hawaꞌi iꞌokiꞌ? 42Hohumbomo kowadimi mampatiꞌiki awami, ‘Mai, kupopolaiꞌi kowilohama,’ hantarowae uwaꞌ tene rangka loti i matamu. Mampetomoromiꞌlukei i howali! Hangangaa ipopolaikei duluna rangka to uwaꞌ i matami hadoduomi hingkeꞌna pangkiꞌkei moromiꞌ, honiꞌkei wae mampopolai kowilohana awami.”
Loti hante wuaꞌna
43“Hawaꞌi uwaꞌ loti to moromiꞌ, kodake wuaꞌne, hei hawaꞌi woꞌo uwaꞌ loti to kodake, moromiꞌ wuaꞌne. 44Nibahaꞌ komoromiꞌna lekiꞌ-lekiꞌna loti ane niꞌokiꞌmo powuaꞌne. Wuaꞌ anggoroꞌ hante ara hawaꞌi nirupuꞌ ka rui. 45Watoꞌo woꞌo toaꞌ to moromiꞌ hingkiꞌ mampasuwu lolita to moromiꞌ, alaꞌ lalira buhaꞌ hante komoromiꞌa. Toaꞌ to kodake hingkiꞌ mampasuwu lolita to kodake, alaꞌ lalira buhaꞌ hante kokodakea. Alaꞌ hapo to uwaꞌ i lalinta, tiꞌo woꞌo to mesuwu ka omeꞌta.”
Tambi to maroho hante tambi to hawaꞌi maroho
46“Mahamporeꞌi hinaꞌ iwowoiꞌA Pueꞌ, angkana hawaꞌi ipetuntui hawaꞌKa? 47-48Lekiꞌ-lekiꞌna toaꞌ to mampehoromua hei motuntuni lolitangKu io nipandiriꞌ hibali haduo toaꞌ to moꞌaro tambi. Io mangkoweꞌ dulu woiꞌ nopokuladu, honiꞌi nopampetoꞌoi watu to maroho, honiꞌi noꞌaro woꞌo orine i womboꞌ watu tiꞌo. Tempona ura to makaja, uwai meluaweꞌ honiꞌi moholuꞌi tambina, angkana hawaꞌi modungka alaꞌ tambina tiꞌo maroho. 49Angkana toaꞌ to mampehoromua lolitangKu hei hawaꞌi notuntuni, io hibali haduo toaꞌ to moꞌaro tambina i womboꞌ woiꞌ, hawaꞌi mopakeꞌ watu. Ane kodeꞌi uwai hei moholuꞌi tambina, hingkiꞌ modungka wute morenda lekiꞌ-lekiꞌna.”
Currently Selected:
Lukas 6: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)