Lukas 6:27-49

“Angkana ingkei to mampehoromua lolitangKu, hieꞌemo hawaꞌKa, ipokarimakei poniꞌmi, hei iwalikei hapo to moromiꞌ pe toaꞌ to mokabiriꞌkei. Ibarakatihi to motundaꞌkei, ipekokaekihi toaꞌ to mowali to kodake pe ingkei. Ane uwaꞌ toaꞌ to motampedaꞌ pipimu hambali, anioꞌ ihowoniꞌi. Agina ipaꞌaniki womo pipima hambali notampedaꞌ. Ane uwaꞌ to mamperompoꞌi jubamu, ipaꞌaniki womo baduꞌma. Ane uwaꞌ to merapiꞌ hapolu i ingkei, ipaꞌanikihi. Hei ane uwaꞌ parewami roperompoꞌi, anioꞌmo niperapiꞌ huliꞌ. Hapo to ileikei rowali toaꞌ pe ingkei, hatoꞌo woꞌo hangangaa iwalikei. Ane marimalukei pe toaꞌ to mampokarimakei, hapomo to hingkiꞌ ihuakei ka Pueꞌ Ala? Hingkoweꞌ woꞌo toaꞌ to kodake, marimahi pe toaꞌ to mampokarimahi. Ane moromiꞌlu waliami pe toaꞌ to mowali woꞌo to moromiꞌ pe ingkei, hawaꞌi uwaꞌ dumbuꞌna. Hingkoweꞌ woꞌo toaꞌ to kodake, watoꞌo woꞌo waliare. Ane mampeweilukei doiꞌmi nopebolo toaꞌ to nobiaꞌ mampopahuliꞌ, hawaꞌi uwaꞌ komoromiꞌmio. Howeꞌ woꞌo toaꞌ to kodake, mampeweilu woꞌo doiꞌna pe hangko awara to kodake ropebolo, alaꞌ hingkiꞌ ropopahuliluꞌi. Anioꞌkei watoꞌo! Hangangaa nipokarima poniꞌmi, hei hangangaa niwali hapo to moromiꞌ. Ane uwaꞌ toaꞌ to dokoꞌ mebolo ka ingkei, nipaꞌani hei anioꞌmo nipohinaru hingkiꞌ nopopahuliꞌ. Ane iwalikei watoꞌo, woriꞌ pebarakati hingkiꞌ nopaꞌanikikei Pueꞌ Ala, hei hingkiꞌ norekeꞌkei anaꞌna Pueꞌ Ala to i tanti, alaꞌ hatoꞌomo komoromiꞌne Pueꞌ Ala pe toaꞌ to kodake hei pe toaꞌ to hawaꞌi robahaꞌ moꞌawerasiꞌ pe Io. Komarimami hangangaa hibali komarimana Umoꞌmi to i Suruga.” “Anioꞌkei mosalaꞌi toaꞌ ntaniꞌna, hingkeꞌna hawaꞌkei woꞌo nosalaꞌi Pueꞌ Ala. Anioꞌkei mohuku toaꞌ ntaniꞌna, hingkeꞌna hawaꞌkei woꞌo nohuku Pueꞌ Ala. Iꞌampunikei toaꞌ to masalaꞌ, hingkeꞌna noꞌampunikei woꞌo Pueꞌ Ala. Mepaꞌanimokei pe toaꞌ ntaniꞌ hingkeꞌ Pueꞌ Ala hingkiꞌ mepaꞌani huliꞌ hante melobi-lobi. Hukaꞌ to nopake Pueꞌ Ala nipandiriꞌ hibobali to mohukaꞌ kina: io hingkiꞌ mohukaꞌ pe lali pohukaꞌ hante nororoꞌ hei notambai wute buhaꞌ hiluaweꞌ, honiꞌi nopepaꞌaniki pe ingkei. Hukaꞌ hapo to ipakeꞌkei mampaꞌani toaꞌ ntaniꞌna, hukaꞌ tiꞌo woꞌo to nopakeꞌ Pueꞌ Ala mampopahuliꞌ pe ingkei.” Nopololiu hi Yesu lolitaNe hante pandiriꞌ waheꞌe, “Ane haduo tobilo moranda hangko tobiloana, bateꞌra hingkiꞌ monawuꞌhi roduo i lali woloꞌ. Watoꞌo woꞌo, hawaꞌi uwaꞌ topeguru to meliu komapandene ka guruna. Ane tutumoꞌi posikolaꞌne honiꞌi hibali woꞌo hante guruna.” Uko tiꞌo, hi Yesu mampowute pandiriꞌ hieꞌe notiꞌi, “Mahamporeꞌi hinaꞌ iꞌokiꞌkei kowilohane awami, hantaro rangka loti to i matami hawaꞌi iꞌokiꞌ? Hohumbomo kowadimi mampatiꞌiki awami, ‘Mai, kupopolaiꞌi kowilohama,’ hantarowae uwaꞌ tene rangka loti i matamu. Mampetomoromiꞌlukei i howali! Hangangaa ipopolaikei duluna rangka to uwaꞌ i matami hadoduomi hingkeꞌna pangkiꞌkei moromiꞌ, honiꞌkei wae mampopolai kowilohana awami.” “Hawaꞌi uwaꞌ loti to moromiꞌ, kodake wuaꞌne, hei hawaꞌi woꞌo uwaꞌ loti to kodake, moromiꞌ wuaꞌne. Nibahaꞌ komoromiꞌna lekiꞌ-lekiꞌna loti ane niꞌokiꞌmo powuaꞌne. Wuaꞌ anggoroꞌ hante ara hawaꞌi nirupuꞌ ka rui. Watoꞌo woꞌo toaꞌ to moromiꞌ hingkiꞌ mampasuwu lolita to moromiꞌ, alaꞌ lalira buhaꞌ hante komoromiꞌa. Toaꞌ to kodake hingkiꞌ mampasuwu lolita to kodake, alaꞌ lalira buhaꞌ hante kokodakea. Alaꞌ hapo to uwaꞌ i lalinta, tiꞌo woꞌo to mesuwu ka omeꞌta.” “Mahamporeꞌi hinaꞌ iwowoiꞌA Pueꞌ, angkana hawaꞌi ipetuntui hawaꞌKa? Lekiꞌ-lekiꞌna toaꞌ to mampehoromua hei motuntuni lolitangKu io nipandiriꞌ hibali haduo toaꞌ to moꞌaro tambi. Io mangkoweꞌ dulu woiꞌ nopokuladu, honiꞌi nopampetoꞌoi watu to maroho, honiꞌi noꞌaro woꞌo orine i womboꞌ watu tiꞌo. Tempona ura to makaja, uwai meluaweꞌ honiꞌi moholuꞌi tambina, angkana hawaꞌi modungka alaꞌ tambina tiꞌo maroho. Angkana toaꞌ to mampehoromua lolitangKu hei hawaꞌi notuntuni, io hibali haduo toaꞌ to moꞌaro tambina i womboꞌ woiꞌ, hawaꞌi mopakeꞌ watu. Ane kodeꞌi uwai hei moholuꞌi tambina, hingkiꞌ modungka wute morenda lekiꞌ-lekiꞌna.”