Yakobus 5
5
Pepangkolowoi pe toaꞌ tosugiꞌ
1Hieꞌemo poturuꞌka i toaꞌ tosugiꞌ. Aginamo meꞌolakei, alaꞌ hingkiꞌ norumpakei komaporiꞌ. 2Moholimo kosugiꞌami. Baduꞌmi noꞌokamo bubuꞌ. 3Bulawa hante peraꞌmi totohiꞌamo. Totohiꞌa tiꞌo mampokononto komasalaꞌmi alaꞌ mampokodeꞌlukei kosugiꞌmi. Iomo hinaꞌ hingkiꞌ nihukukei mpuꞌu. Ingkei hingkiꞌ mewali hibali toaꞌ to noꞌoka api. Morampulukei luma i duniaꞌ hieꞌe, angkana hamboaꞌmo morue hingkiꞌ mehupaꞌ kotutuane duniaꞌ! 4Topajama i kineteꞌmi, hawaꞌi nibaiari harore. Hinewowoꞌena nipehoromua peroraire! Topajamahi i kineteꞌmi, mekokaehi merapiꞌ sulungi, hei pekokaera Nohorimo Pueꞌ Ala to Makuasaꞌ. 5I duniaꞌ hieꞌe, tuwuꞌkei hibali tokeiꞌ. Mampaliꞌlukei komotanaꞌmi. Hibalikei pinatuwuꞌ to mampomolompoꞌ wotara hadoduora wute hupaꞌ tempore nirereꞌ! 6Mohukukei toaꞌ to moromiꞌ waliara i pampeꞌelena Pueꞌ Ala, angkana iohi hawaꞌhi meꞌewa. Kehapoꞌi hatoꞌo, irokoꞌkei.
Hangangaa sabaraꞌki i lali komaporiꞌ
7Halali-halali! Alaꞌ nobahaꞌluꞌi Pueꞌ komaporiꞌmi, hangangaa sabaraꞌkei wute i pehupaꞌNa huliꞌ Pueꞌ Yesu. Iꞌelekei hohumbo kosabaraꞌre topokineteꞌ mampekau powuaꞌna huꞌa-huꞌara to moromiꞌ mpololeke. Sabaraꞌhi mampekau ura i tempora mantudaꞌ wute i powuaꞌna. 8Hatoꞌo woꞌo ingkei. Hangangaa sabaraꞌkei. Hangangaa ipotintokei lalimi, alaꞌ hamboaꞌmo morue hingkiꞌ mehupaꞌmo mpuꞌu Pueꞌ Ala.
9Halali-halali! Inioꞌkei mangkonunuꞌ hei momesalaꞌ-salaꞌi, hingkeꞌna hawaꞌkei nihuku. Alaꞌ Topobutusi metotiꞌimo i hinaro wambaꞌ; hamboaꞌmo morue hingkiꞌ mehupaꞌ!
10Halali-halali! Iponindimokei nabi-nabi to hampiha to mangkomi hawaꞌna Pueꞌ Ala. Sabaraꞌhi hei tinto morii komaporiꞌ. Aginamo topetuntui kosabaraꞌre. 11Alaꞌ hihimoreꞌi to totiꞌi morasiꞌ? To motanaꞌ iomo toaꞌ to morii komaporiꞌ. Ibahaꞌkei mpololeke lolitonane hi Ayub to moriimo komaporiꞌ. Hei ibahaꞌlukei hapo to mewali i koukoana, io nobarakati Pueꞌ Ala, ka popuhiꞌ laliNa, hei io nopokarima mpololeke Pueꞌ Ala.
Noniuꞌ sumpa
12Halali-halali! Ka lekiꞌ-lekiꞌna poturuꞌku, hieꞌemo to paralu mpololeke: inioꞌkei mosumpa mantiꞌi laniꞌ ba duniaꞌ ba hapolu to ntaniꞌna. Ane tungkaihami mantiꞌi ioꞌ, hangangaa itiꞌikei “Ioꞌ.” Ane tungkaihami mantiꞌi hawaꞌi, hangangaa itiꞌikei “Hawaꞌi,” Hingkeꞌ hawaꞌkei pahua pehuku.
Hangangaa mekokaeki pe Pueꞌ Ala
13Ane uwaꞌ i lumbumi to pahua komaporiꞌ, agina mekokae. Ane uwaꞌ to motanaꞌ, agina molinga mampokodeꞌ Pueꞌ Ala. 14Ane uwaꞌ to mohakiꞌ, agina nipowowoiki hawiꞌ-hawiꞌna Pueꞌ i jumaꞌa, hingkeꞌna hawiꞌ-hawiꞌna Pueꞌ tiꞌo wadi mampekokaeki to mohakiꞌ tiꞌo hei mowau bokaꞌ i lali konaꞌna Pueꞌ Ala. 15Ane mekokaehi ka pepoꞌohi mpololeke, hangangaa moꞌoriꞌ to mohakiꞌ tiꞌo. Pueꞌ Ala hingkiꞌ mampokoꞌoriꞌ wotana to mohakiꞌ tiꞌo, hei ane uwaꞌ dosane, hangangaa hingkiꞌ Noꞌampuni woꞌo. 16Iomo hinaꞌ hangangaa ipangakuꞌkei salaꞌmi pe hangko awami, hei momepekokaekikei hingkeꞌna moꞌoriꞌkei.
Makuasaꞌ mpololeke pekokaene toaꞌ to mononto waliana. 17Iponindikei lolitonane nabi Elia hampiha. Nabi Elia tiꞌo, toaꞌ biasalu hibali woꞌo ingkiꞌ. Io mekokae ka lalina mpololeke hingkeꞌna hawaꞌi ura. Hawaꞌi mpuꞌu ura i lali tolu ntoꞌa oni mbula. 18#1Dat. 17–18Uko tiꞌo, io mekokae womo honiꞌi ura, hante woiꞌ mampopowuaꞌ huliꞌ lekiꞌ-lekiꞌna huꞌa-huꞌa.
19Halali-halali! Ane uwaꞌ i lumbumi haduo to mengkoꞌela ka poturuꞌ to tuꞌu to ka Pueꞌ Ala, hei uwaꞌ woꞌo haduo to morandaꞌi mahuliꞌ pe Pueꞌ Ala, 20ikolowoikei lolitangka hieꞌe: hihimo to mangkomi huliꞌ haduo toaꞌ to madosa ka waliana to masalaꞌ pe to moromiꞌ, iomo to mosulungi awana ka komahia tota uwaꞌ koꞌukoana, horiana dosana awana to woriꞌ teꞌampunimo.
Currently Selected:
Yakobus 5: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
