Yakobus 4
4
Inioꞌki motuntuni peleihana lalinta to kodake
1Halali-halali! Mahampokeireꞌi hinaꞌ mosisalaꞌkei hei moheꞌerokei? Tiꞌo mewali alaꞌ motuntunikei peleihami to kodake to moponiꞌ nturusi i lalimi. 2Hapolu to ikodokoꞌikei, hawaꞌkei ihua. Iomo hinaꞌ merorokoꞌkei. Mowahiꞌkei pe awami, alaꞌ mangkohokakei hapo to noꞌompui awami. To ikohokakei tiꞌo hawaꞌi tepobuhoꞌi, horiana moheꞌerokei hante motudaꞌkei. Hawaꞌkei ihua hapo to ipaliꞌkei, alaꞌ hawaꞌikei iperapiꞌ pe Pueꞌ Ala. 3Kehapoꞌi iperapiꞌkei, hawaꞌi hingkiꞌ ihuakei, alaꞌ hawaꞌi moromiꞌ tungkaihami. Hapo to iperapiꞌkei tiꞌo, ikodokoꞌikei mampobuhoꞌi peleihana lalimi hadoduomi. 4Halali-halali! Hawaꞌi hintotoꞌ ane mampolihiki Pueꞌta hante motuntuniki walia to kodake i duniaꞌ hieꞌe. Ibahaꞌkei mpololeke halali-halali, ane mampetuntuiki walia to kodake i duniaꞌ hieꞌe, bateꞌna mewaliki poniꞌna Pueꞌ Ala. Kutiꞌikikei, hihimo to palei walia to kodake i duniaꞌ hieꞌe, poniꞌne Pueꞌ Ala! 5Inioꞌ ipekirikei hawaꞌi uwaꞌ tungkaihane to teꞌukiꞌ i lali Suraꞌ Mangkolehi to mantiꞌi waheꞌe: i wotanta hieꞌe, Pueꞌ Ala mampaꞌaniki inohaꞌ, hei Pueꞌ Ala mohiriꞌ ane hawaꞌki tinto i Io.#4:5 mohiriꞌ Pueꞌ Ala: Notiꞌi Pueꞌ Ala, ane mengkoruꞌki pe to ntaniꞌna, hibali hante mebualosiki. Yer. 5:7; Ul. 4:24, 5:9, 6:14, 15; Yos. 24:19-20; Mas. 79:5; Yeh. 39:25. 6Angkana kodeꞌ tene kopopuhiꞌne laliNa ntina komohiriꞌNa pe ingkiꞌ. Iomo hinaꞌ uwaꞌ to teuꞌkiꞌ i lali Suraꞌ Mangkolehi waheꞌe:
“Pueꞌ Ala moꞌewa toaꞌ to mampokokodeꞌ,
angkana toaꞌ to mengkaꞌiwowoiꞌ,
Nosulungihi nokomi kopopuhiꞌna laliNa.” (Ams. 3:34)
7Iomo hinaꞌ kupaꞌanikei lolita hingkeꞌna mengkoruꞌmokei pe Pueꞌ Ala. Iꞌewakei nturusi Belisiꞌ, hei io hingkiꞌ mampolihikei. 8Ane ikododungkuikei Pueꞌ Ala, Io woꞌo hingkiꞌ mangkododungkuikei. Ane uwaꞌ dosami, hangangaa ipangakuꞌkei hei ipohentekei. Inioꞌ morodaꞌa lalimi, hangangaa ipomangkolehikei lalimi. 9Meꞌolamokei alaꞌ komadosami. Nohohoꞌmokei ka waliami to kodake. Ane ibahaꞌkei koꞌuwaꞌne dosami, hangangaa masusa lalimi alaꞌ mowalikei dosa hei hangangaa mengkatobaꞌkei, 10hei mengkaꞌiwowoikei i hinarona Pueꞌ Ala. Ane watoꞌoꞌi, hingkiꞌ nopoꞌiwomboꞌkei Pueꞌ Ala.
Inioꞌki mampononaꞌa toaꞌ
11Halali-halali! Inioꞌkei mepononaꞌa. Ane uwaꞌ haduo toaꞌ to mampononaꞌa hei mosalaꞌi awana ba halalina, palaihana mampononaꞌa hei mosalaꞌi woꞌo Aturana Pueꞌ Ala. Toaꞌ to mampononaꞌa hei mosalaꞌi awana, hawaꞌi mampetuntui Aturana Pueꞌ Ala, angkana mewali topobutusi Aturana Pueꞌ Ala. 12Kotuꞌuana Haduolu to hintotoꞌ mepaꞌani atura i toaꞌ hei mewali Topobutusi. Iomo Pueꞌ Ala. Uwaꞌ kuasaꞌNe mohukuki ba mampohinteki ka pehuku dosanta. Angkana hihimokei to podehoꞌ mewali topobutusi pe awami?
Inioꞌki mangkolembuliki Pueꞌ i lali pangkoliwo
13Hieꞌemo poturuꞌka pe ingkei to mampokokodeꞌ hei to mantiꞌi waheꞌe: “Ando hieꞌe ba poꞌonina, hingkiꞌ molaika nolou pe haꞌanu kota. Hingkiꞌ meꞌohaꞌka itoꞌo hantoꞌa komoruene mobaluꞌ-baluꞌ wute pahuaka rasiꞌ to woriꞌ.” 14Kotuꞌuana hawaꞌkei ibahaꞌ hapo to hingkiꞌ mewali poꞌonina! Kotuwuꞌmi hibalilu oroꞌ, hampaiꞌlu niꞌokiꞌ, honiꞌi moholi! 15Aginamo keꞌitiꞌikei waheꞌe: “Ane noponiuꞌi Pueꞌ Ala, hingkiꞌ tuwuꞌka hei hingkiꞌ kiwali waheꞌe hante watoꞌo.” 16Angkana hawaꞌi hatoꞌo pololitami. Mampokokodeꞌkei hei mampeꞌiwowomboꞌkei. Lekiꞌ-lekiꞌna waliami to hatoꞌo, masalaꞌ mpololeke.
17Mewaliꞌ, hihimo to nobahaꞌ mowali hapo to moromiꞌ, angkana hawaꞌi nowali, toaꞌ tiꞌo bateꞌna madosa.
Currently Selected:
Yakobus 4: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
