Ibarani 6
6
1-2Mewaliꞌ halali-halali, inioꞌ tohuliꞌ-huliꞌi poturuꞌ to uluꞌ-uluꞌne. Ane toaꞌ to hongkoꞌ mewali toSarani, iohi to hangangaa nipoturuꞌ i poturuꞌ to uluꞌ-uluꞌna, hingkeꞌna nohohoꞌhi ka waliara to mangkomihi pe komahia, hei mepoꞌohihi pe Pueꞌ Ala. Hangangaa nipoturuꞌhi noniuꞌ i periu hante pohini korawe mobarakati toaꞌ. Hangangaa nipoturuꞌhi noniuꞌ hapo to hingkiꞌ mewali i ando to hingkiꞌ dongkaꞌ, iomo: peꞌarona huliꞌ to mahi hante pehuku to hawaꞌi mokoꞌukoa. Angkana ingkei hangangaa kupoturuꞌkei poturuꞌ kololiuhana hingkeꞌna pampekirimi hawaꞌi uwaꞌ komakuraꞌne. 3Poturuꞌ tiꞌo hingkiꞌ topegurui ane noponiuꞌi Pueꞌ Ala, 4alaꞌ toaꞌ to rotungkai maꞌoruꞌ ka pepoꞌohira, hamboaꞌmohi wadi nipoturuꞌ huliꞌ hingkeꞌna nohohoꞌhi ka dosara. Hampiha, mobaro lalire alaꞌ pobahaꞌmohi Kareba Moromiꞌ, motanaꞌhi mantorimo pebarakati ka Pueꞌ Ala, hei lalira nokuasaꞌi Inohaꞌ Mangkolehi; 5robahaꞌ mpololeke komoromiꞌne pohawaꞌna Pueꞌ Ala hante kuasaꞌna Pueꞌ Ala to hingkiꞌ mombaha i ando to hingkiꞌ dongkaꞌ. 6Angkana ane uko tiꞌo, rotungkai maꞌoruꞌ ka pepoꞌohira, hamboaꞌmohi wadi nipoturuꞌ huliꞌ hingkeꞌna nohohoꞌhi ka dosara, alaꞌ nokomi posapuakara Pueꞌ Yesu, hibalihi toaꞌ to mopaku huliꞌ AnaꞌNa Pueꞌ Ala hei ropononaꞌa i hinarona toaꞌ to woriꞌ.
7Toaꞌ to mepoꞌohi nipandiriꞌaki hibali woiꞌ to noꞌuroni hei nokotuwuꞌi huꞌa-huꞌa to modumbuꞌ i topokineteꞌ. Alaꞌ woiꞌ tiꞌo nobarakati Pueꞌ Ala. 8Angkana ane woiꞌ tiꞌo nokotuwuꞌi donaꞌ hante rui, hamboaꞌmo modumbuꞌ, hingkiꞌ notundaꞌ Pueꞌ Ala, hei koꞌukoana nihunu. Hatoꞌo woꞌo toaꞌ to maꞌoruꞌ ka pepoꞌohira, hingkiꞌ nohukuhi Pueꞌ Ala.
9Angkana ingkei halali-halali to kupokarima, kehapoꞌi hatoꞌo lolitangka, kibahaꞌ hawaꞌkei hibali woiꞌ to notundaꞌ Pueꞌ Ala. Kibahaꞌ koꞌuwaꞌna wuaꞌmi to meliu komoromiꞌne, tiꞌomo pepoꞌohimi hante waliami to hintotoꞌ i toaꞌ to pahua kotehompoꞌ ka Pueꞌ Ala. 10Pueꞌ Ala bateꞌna mononto. Hawaꞌi hingkiꞌ Nokombulihaki jamami to ijamakei. Tongawa ipokarimakei Pueꞌ Ala, alaꞌ woriꞌ mpihakei mosulungi toaꞌna Pueꞌ Ala, moromiꞌ ka uluꞌ-uluꞌana, moromiꞌ hinewowoꞌena. 11Angkana kiperapiꞌ mpololeke halali-halali, hingkeꞌna tuꞌu-tuꞌukei mampololiu walia to hatoꞌo wute i kotutuana, hingkeꞌna ihuakei mpuꞌu hapo to ipohinarukei ka Pueꞌ Ala. 12Inioꞌkei uwaꞌ to lohe, angkana hangangaa tuwuꞌkei hibali toaꞌ to mantorimo hapo to nodandi Pueꞌ Ala, alaꞌ mepoꞌohihi hei sabaraꞌhi mampekau hapo to Nodandikihi.
Dandina Pueꞌ Ala hawaꞌi tewolihi
13Tempona Pueꞌ Ala mampowute dandiNa pe hi Burahima, hawaꞌi uwaꞌ to moliuni kokodeꞌna tuwuꞌna Pueꞌ Ala, iomo horiana Io modandi moliu konaꞌNa hadoduona, Notiꞌi:
14 #
Pwl. 22:17
“Hingkiꞌ Kupopewali hapo to Kudandikiko hieꞌe:
Hingkiꞌ Kubarakatiko
hei hingkiꞌ Kupoworiꞌ muleꞌma
wute mawunene.”
15Hi Burahima sabaraꞌ mampekau horiana io pahua hapo to nodandi Pueꞌ Ala.
16Ane rapaꞌna uwaꞌ haduo toaꞌ to modandi, biasa io mosumpa mantiꞌi konaꞌ to meliu kokodeꞌne tuwuꞌna ka io. Sumpana tiꞌo mampokaroho lolitana hingkeꞌna hawaꞌi uwaꞌ toaꞌ to mampatiꞌikiꞌi io mowuti. 17Hatoꞌo woꞌo Pueꞌ Ala: i pampowuteNa dandiNa pe hi Burahima, tepekahi lekiꞌ-lekiꞌna toaꞌ to hingkiꞌ pahua dandi tiꞌo, Nokodokoꞌi mampokaroho lalira hingkeꞌna robahaꞌ kohawaꞌna tewolihi tungkaihaNe pe iohi. Iomo horiana Nopokaroho mpololeke dandiNe moliu sumpa. 18Ane Pueꞌ Ala modandi hante sumpaNa, rolangkaꞌ tiꞌo hawaꞌi hingkiꞌ tewolihi, alaꞌ Io hawaꞌi mowuti. Iomo horiana ingkiꞌ to mepohinaru pe Pueꞌ Ala, maroho lalinte mampekau hapo to topohinaru ka Io. 19Pepohinaruanta tiꞌo hibali rante to mapokaroho pepoꞌohinta pe Pueꞌ Ala. Pepohinaruanta tiꞌo mangkomiki moliuni porindi wida to mohidaki pe kamaraꞌ to meliu komanobaꞌne i Tambina Pueꞌ Ala i suruga. 20Hi Yesumola to mampodulukiki inoꞌo, hingkeꞌna metuntuki woꞌo nolou. Io to mewali Tadulako Mpenomba Ngkodeꞌ wute nantolou-louna, motuntuni konipotadulako mpenombana hi Mekisedeꞌ.
Currently Selected:
Ibarani 6: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
